ଶ୍ରୀକାନ୍ତ ହେବେ ପିସିସି ସଭାପତି

ଭୁବନେଶ୍ୱର : ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା ହୋଇପାରନ୍ତି ପିସିସି ସଭାପତି  । କଂଗ୍ରେସ ଅଳିନ୍ଦରେ ଏବେ ଏଭଳି ଚର୍ଚ୍ଚା ଜୋରଧରିଛି  । ଶ୍ରୀକାନ୍ତଙ୍କୁ ଦିଲ୍ଲୀରୁ ଡକରା ଆସିଥିବାବେଳେ ସେ ଅନେକ କେନ୍ଦ୍ରୀୟ ନେତାଙ୍କୁ ଭେଟିଥିବା ଜାଣିବାକୁ ମିଳିଛି  । ରାଜନୀତିକ ଗୋଟିଚାଳନାରେ ଶ୍ରୀକାନ୍ତ ବେଶ୍‌ ମାହିର  । ତେଣୁ ତାଙ୍କୁ ଥରେ ପିସିସି ସଭାପତି କରି ପରୀକ୍ଷା ନୀରିକ୍ଷା କରିବାକୁ ରାହୁଲ ଗାନ୍ଧୀ ଯୋଜନା କରିଛନ୍ତି  । ୱାୟନାଡ଼ରେ ଭୟଙ୍କର ଭୂସ୍ଖଳନ ହୋଇଥିବାରୁ ରାହୁଲ ସେଠାରେ ଅଛନ୍ତି  । ପ୍ରିୟଙ୍କା ଗାନ୍ଧୀ ସେଠାରୁ ନିର୍ବାଚନ ଲଢ଼ିବାର ଥିବାରୁ ସେ ମଧ୍ୟ ୱାୟନାଡ଼ରେ ଅଛନ୍ତି  । ସେଠାରେ ସ୍ଥିତି ସୁଧୁରିବା ପରେ ଓଡ଼ିଶାରେ କଂଗ୍ରେସର ପୁନର୍ଗଠନ ନେଇ ରାହୁଲ ରଣନୀତି କରିବେ  । ୨୪ ବର୍ଷ ପରେ ବିଜେଡ଼ି ସରକାରକୁ ବିଜେପି କ୍ଷମତାଚ୍ୟୁତ କରିଛି  । ଆଗାମୀ ଦିନରେ ବିଜେଡ଼ିରେ ବି ଭୟଙ୍କର ବିସ୍ଫୋରଣର ଆଶଙ୍କା ରହିଛି  । ବିଜେଡ଼ିରେ ସବୁ କିଛି ଠିକ ନଥିବାରୁ ଏହି ମଉକାର ଫାଇଦା ନେବାକୁ କଂଗ୍ରେସ ଉଦ୍ୟମ କରିଛି  । କଂଗ୍ରେସ ଯଦି ଏହାର ଶକ୍ତି ବୃଦ୍ଧି କରେ ତେବେ ୨୦୨୯ରେ ଦଳ ନିଶ୍ଚିତ ଫାଇଦା ପାଇପାରିବ  । ପୂର୍ବରୁ ବିଜେଡ଼ି ସମଦୂରତ୍ୱ ରକ୍ଷା କରୁଥିଲା  । ବିଜେପି କିମ୍ବା କଂଗ୍ରେସ କ୍ୟାମ୍ପରେ ରହୁନଥିଲା  । ଏବେ ବିଜେପି ହିଁ ବିଜେଡ଼ିର ପରମ ଶତ୍ରୁ ପାଲଟି ଯାଇଛି  । ତେଣୁ ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କର ଆଭିମୁଖ୍ୟ ବଦଳିଯାଇଛି  । ସଂସଦରେ ଏବେ ବିଜେପି ବିରୋଧରେ ଗର୍ଜୁଛି ବିଜେଡ଼ି  । ନିକଟରେ ବିଜେଡ଼ି ସାଂସଦଙ୍କୁ ବିଜେପି ନେଇଯିବା ପରେ ନବୀନ ଆହୁରି ଫିଡ଼ିକି ଯାଇଛନ୍ତି  । ଏହାକୁ ମଧ୍ୟ କଂଗ୍ରେସ ଭଲ ଭାବେ ଅନୁଶୀଳନ କରିଛି  । ଓଡ଼ିଶାରେ ଏବେ କଂଗ୍ରେସ ୱିନ ୱିନ ସ୍ଥିତିରେ ରହିଛି  । ଅର୍ଥାତ୍‌ କଂଗ୍ରେସ ସହ ବିଜେଡ଼ି ହାତ ମିଳାଇବା ନିଶ୍ଚିତ  । ବିଜେପିକୁ ରୋକିବା ପାଇଁ ବିରୋଧୀ ଏବେ ଏକାଠି ହେବା ଆରମ୍ଭ କରିଦେଇଛନ୍ତି  । ଏଭଳି ସ୍ଥିତିରେ ଶ୍ରୀକାନ୍ତ ଜେନା ହିଁ ଭଲଭାବେ ଗୋଟି ଚଳାଇପାରିବେ ବୋଲି ଦିଲ୍ଲୀର କେତେକ କଂଗ୍ରେସ ନେତା ଅନୁଭବ କରୁଛନ୍ତି  । ଅପରପକ୍ଷରେ ୨୦୨୯ରେ ନିର୍ବାଚନ ଥିବାରୁ ଏବେ କଂଗ୍ରେସର ଦାୟିତ୍ୱ ମୁଣ୍ଡାଇବାକୁ ଅନେକ ବରିଷ୍ଠ ନେତା ଅମଙ୍ଗ ହେଉଛନ୍ତି  । ତେବେ ଖାଲି ଶ୍ରୀକାନ୍ତ ଜେନା ନୁହଁନ୍ତି ପିସିସି ସଭାପତି ଦୌଡ଼ରେ ଭକ୍ତ ଚରଣ ଦାସ, ମହମ୍ମଦ ମୋକିମ ଓ ପ୍ରସାଦ ହରିଚନ୍ଦନ ମଧ୍ୟ ରହିଛନ୍ତି  । ତେବେ ରାହୁଲ କାହା ଉପରେ ଆସ୍ଥା ପ୍ରକଟ କରିବେ ତାହା ଦେଖିବାକୁ ବାକି ରହିଲା  ।