ରାଜ୍ୟ ବିଜେପିରେ ଝଡ଼

ଭୁବନେଶ୍ୱର : ରାଜ୍ୟ ବିଜେପିରେ ଏବେ ଅସନ୍ତୋଷର ଲଘୁଚାପ ଦାନା ବାନ୍ଧି ସାରିଲାଣି  ।  ନୂଆ ସରକାର ଆସିବା ପରେ କେବଳ ପ୍ରଶାସନିକ କଳ ହିଁ ତତ୍ପର ହୋଇଛି  । ମନ୍ତ୍ରୀ ଓ ବିଧାୟକମାନେ ହିଁ କ୍ଷମତାର ସ୍ୱାଦ ଚାଖିଛନ୍ତି  । କିନ୍ତୁ ଦଳର ଶହେ ସରିକି ଆଗଧାଡ଼ିର ନେତାମାନେ କିନ୍ତୁ ପରିବର୍ତ୍ତନ କ’ଣ ତାହା ଦେଖିପାରୁନାହାନ୍ତି  । କେବଳ ରାସ୍ତାଘାଟରେ ସବୁଜ ବିଲ୍‌ବୋଡର଼୍ ବଦଳରେ ଗେରୁଆ ବିଲ୍‌ ବୋଡର଼୍ ହିଁ ବଦଳିଛି  । ଦଳ କ୍ଷମତାକୁ ଆସିବା ପରେ ସେମାନଙ୍କ ଭବିଷ୍ୟତ କିନ୍ତୁ ବଦଳି ପାରିନାହିଁ  । ରାଜ୍ୟ ବିଜେପିରେ ଝଡ଼ ସୃଷ୍ଟି ହେବା ଘଟଣା ଏବେ ନେତା ଓ କର୍ମୀଙ୍କୁ ଚିନ୍ତାରେ ପକାଇ ଦେଇଛି  ।
ରାଜ୍ୟରେ ସରକାର ଗଢ଼ିବା ପରେ ଆଗଧାଡ଼ିର ବିଜେପି ନେତାମାନେ ଖୁସି ହୋଇଯାଇଥିଲେ  । ନୂଆ ସରକାର ଶପଥ ନେବା ପରଠାରୁ ଦଳୀୟ କାର୍ଯ୍ୟାଳୟରେ ସେମାନଙ୍କ ଭିଡ଼ ଜମୁଥିଲା  । ନୂଆ ଜାମା ଯୋଡ଼ ପିନ୍ଧି ଟହଲ ମାରୁଥିଲେ  । ବିଧାୟକ ନହେଲେ ନାହିଁ, ନିଗମ ଅଧ୍ୟକ୍ଷ ପଦ ମିଳିବାଟା ଥୟ  । ଜୁଲାଇରୁ ହିଁ ସେମାନେ ଲବି ଆରମ୍ଭ କରିଦେଇଥିଲେ  ।  କିନ୍ତୁ ମାସ ପରେ ମାସ ବିତିଯାଇଛି ସିନା ନିଗମ ଅଧ୍ୟକ୍ଷ ପଦ୍ମ ଘୁଞ୍ଚି ଘୁଞ୍ଚି ଚାଲିଛି  । କେବେ ହେବ ସେନେଇ କେହି ପଦୁଟିଏ ବି କହିପାରୁନାହାନ୍ତି  । 
ଖାଲି ସେତିକିନୁହେଁ, ମହିଳା କମିଶନ ଠାରୁ ନେଇ ସୂଚନା ଅଧିକାର, ଖାଦ୍ୟ କମିଶନ ଭଳି ଅନେକ କମିଶନ ରହିଛି  । ସେଥିରେ ବି ଥଇଥାନ ହେବାକୁ ଅନେକ ନେତା ଆଶା ବାନ୍ଧି ବସିଥିଲେ  । ଯେଉଁ ବିଧାୟକମାନେ ମନ୍ତ୍ରୀ ହୋଇପାରିନାହାନ୍ତି ସେମାନେ ଜିଲ୍ଲା ଯୋଜନା ବୋଡର଼୍ ଅଧ୍ୟକ୍ଷ ପଦବୀ ଉପରେ ଆଖି ପକାଇଥିଲେ  । ହେଲେ ବିଧାୟକମାନଙ୍କୁ ବି ନିରାଶ ହେବାକୁ ପଡ଼ିଛି  । ଦଳୀୟ କର୍ମୀମାନେ ସରକାରୀ ଏପିପି ହେବାକୁ ବି ଧାଡ଼ି ଲଗାଇଥିଲେ  । ସେହି ପ୍ରକ୍ରିୟା ବି ଏବେ ଶୀତଳ ଭଣ୍ଡାରରେ ରହିଛି  । ଦଳ ଓ ସରକାର ମଧ୍ୟରେ ତାଳମେଳ ଓ ସମନ୍ୱୟ ରହୁନଥିବାରୁ ବିଜେପି ନେତାଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଲାଣି  ।
ବିଜେଡ଼ି ଅମଳରେ ନବୀନ ଉଭୟ ସରକାର ଓ ଦଳର ମୁଖ୍ୟ ଥିଲେ  । କିନ୍ତୁ ବିଜେପିରେ ଅବସ୍ଥା ଭିନ୍ନ  । ଦଳୀୟ  ଦୃଷ୍ଟିରୁ ମନମୋହନ ସାମଲଙ୍କ ହାତରେ ପାୱାର ରହିଛି  । ସରକାର ହିସାବରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ହାତରେ କ୍ଷମତା ଅଛି  । ଏସବୁ ଭିତରେ ରାଜ୍ୟ ବିଜେପିର ପୋଷ୍ଟର ବୟ ଧର୍ମେନ୍ଦ୍ର ପ୍ରଧାନଙ୍କର ପାୱାରକୁ ବି ନଜରଅନ୍ଦାଜ କରାଯାଇପାରିବ ନାହିଁ  । ଖାଲି ସେତିକିନୁହେଁ ବୈଜୟନ୍ତ ପଣ୍ଡା ରାଷ୍ଟ୍ରୀୟ ଉପାଧ୍ୟକ୍ଷ ଥିବାରୁ ସେ ବି ପତିଆରା ଜାହିର କରିବାର ସୁଯୋଗକୁ ହାତଛଡ଼ା କରୁନାହାନ୍ତି  । ଏବେ କ୍ଷମତା ପାଇଁ ପତିଆରା ଲଢେ଼ଇ ଚାଲିଥିବାରୁ ନେତା ଓ କର୍ମୀମାନେ ଚିନ୍ତାରେ ପଡ଼ିଯାଇଛନ୍ତି  । ନୂଆବର୍ଷରୁ ବିଜେଡ଼ି ଆକ୍ରମଣାତ୍ମକ ରଣନୀତି କରୁଥିବାବେଳେ ବିଜେପି ନେତାଙ୍କ ମଧ୍ୟରେ ଏଭଳି ଅସନ୍ତୋଷ ବଢ଼ିଲେ ଦଳ ଘାଟାରେ ପଡ଼ିବ ବୋଲି କୁହାଯାଉଛି  ।