ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବକୁ ଭବ୍ୟ କରିବାକୁ ଯୋଜନା, ୫୦ରୁ ଅଧିକ ସେଲିବ୍ରିଟି ଯୋଗଦେବେ

ନୂଆଦିଲ୍ଲୀ : ଦିଲ୍ଲୀ ସରକାରଙ୍କ ଶପଥ ଗ୍ରହଣ ଉତ୍ସବର ପ୍ରସ୍ତୁତି ସମୀକ୍ଷା କରିବା ପାଇଁ ମଙ୍ଗଳବାର ସକାଳେ ଭାଜପା ନେତା ବିନୋଦ ତାୱଡେ, ତରୁଣ ଚୁଗ, ବୀରେନ୍ଦ୍ର ସଚଦେବ ରାମଲୀଳା ମଇଦାନ ଯିବେ। ନୂଆଦିଲ୍ଲୀ ସରକାରଙ୍କ ଶପଥ ଗ୍ରହଣ ସମାରୋହ ଫେବୃଆରୀ ୨୦ରେ ରାମଲୀଳା ମଇଦାନରେ ଅନୁଷ୍ଠିତ ହେବାକୁ ଯାଉଛି, ଯାହାର ତାରିଖ ଚୂଡ଼ାନ୍ତ ହୋଇସାରିଛି କିନ୍ତୁ ଏପର୍ଯ୍ୟନ୍ତ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାମ ଫାଇନାଲ କରାଯାଇ ନାହିଁ।

ମିଳିଥିବା ସୂଚନା ଅନୁସାରେ, ଫେବୃଆରୀ ୧୯ ରାତିରୁ ରାମଲୀଳା ମୈଦାନକୁ ଯାଉଥିବା ସମସ୍ତ ରାସ୍ତା ବନ୍ଦ ହୋଇଯିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ୫୦ରୁ ଅଧିକ ହାଇ ସିକ୍ୟୁରିଟି ନେତା ମଧ୍ୟ ରାମଲୀଳା ମଇଦାନରେ ପହଞ୍ଚିବେ। କେବଳ ଭିଭିଆଇପି ଗାଡ଼ିଗୁଡ଼ିକୁ ପ୍ରବେଶ ଅନୁମତି ଦିଆଯିବ। ଏହି ଶପଥ ଗ୍ରହଣ ଉତ୍ସବରେ ୨୦ଟି ରାଜ୍ୟର ମୁଖ୍ୟମନ୍ତ୍ରୀ ଯୋଗ ଦେବେ, ସମସ୍ତ କେନ୍ଦ୍ର ମନ୍ତ୍ରୀ ଏବଂ ଏନଡିଏ ନେତାମାନଙ୍କୁ ମଧ୍ୟ ଉତ୍ସବରେ ଯୋଗଦେବାକୁ ନିମନ୍ତ୍ରଣ କରାଯାଇଛି।
ଶପଥ ଗ୍ରହଣ ଉତ୍ସବ ପୂର୍ବରୁ, ରାମଲୀଳା ମୈଦାନର ମଞ୍ଚରେ ଏକ ରଙ୍ଗାରଙ୍ଗ ସଙ୍ଗୀତ କାର୍ଯ୍ୟକ୍ରମ ହେବ ଯେଉଁଥିରେ କୈଳାସ ଖେର ତାଙ୍କର ସଙ୍ଗୀତ ପରିବେଷଣ କରିବେ। ଏହି ସମାରୋହରେ କୈଳାସ ଖେରଙ୍କ ସମେତ ୫୦ ରୁ ଅଧିକ ଫିଲ୍ମ କଳାକାର ଅଂଶଗ୍ରହଣ କରିବେ, ଯେଉଁଥିରେ ଅକ୍ଷୟ କୁମାର, ବିବେକ ଓବେରୟ, ହେମା ମାଳିନୀ ସାମିଲ ହୋଇପାରନ୍ତି। ସେହି ସମୟରେ ମୁମ୍ବାଇର ପ୍ରସିଦ୍ଧ ଶିଳ୍ପପତି ମୁକେଶ ଅମ୍ବାନୀ, ଗୌତମ ଆଦାନୀ ଏବଂ ଆହୁରି ଅନେକ ଶିଳ୍ପପତି ମଧ୍ୟ ଉପସ୍ଥିତ ରହିବେ। ବାବା ରାମଦେବ, ସ୍ବାମୀ ଚିଦାନନ୍ଦ, ବାବା ବାଗେଶ୍ୱର ଧୀରେନ୍ଦ୍ର ଶାସ୍ତ୍ରୀଙ୍କୁ ମଧ୍ୟ ଶପଥ ଗ୍ରହଣ ସମାରୋହକୁ ନିମନ୍ତ୍ରଣ କରାଯାଇଛି।

ଦିଲ୍ଲୀ ବିଧାନସଭା ନିର୍ବାଚନ ପାଇଁ ଭାଜପା ଦ୍ୱାରା ନିୟୋଜିତ ଅନ୍ୟ ରାଜ୍ୟର ଭାଜପା ନେତା ଏବଂ କର୍ମୀମାନଙ୍କୁ ମଧ୍ୟ ଏହି କାର୍ଯ୍ୟକ୍ରମରେ ନିମନ୍ତ୍ରଣ କରାଯାଇଛି। ଏହା ବ୍ୟତୀତ, ଲାଡଲି ବେହେନମାନଙ୍କୁ ମଧ୍ୟ ଶପଥ ଗ୍ରହଣ ସମାରୋହ ପାଇଁ ନିମନ୍ତ୍ରଣ କରାଯାଇଛି। ଏହା ମଧ୍ୟ ସମ୍ଭବ ଯେ ଦିଲ୍ଲୀର ଚାଷୀମାନଙ୍କୁ ମଧ୍ୟ ଶପଥ ଗ୍ରହଣ ସମାରୋହ ପାଇଁ ନିମନ୍ତ୍ରଣ କରାଯାଇପାରେ। ଶପଥ ଗ୍ରହଣ ସମାରୋହ ପାଇଁ ପ୍ରାୟ ୩୦ହଜାର ଅତିଥିଙ୍କୁ ନିମନ୍ତ୍ରଣ କରାଯାଇଛି।
ସୂଚନାଯୋଗ୍ୟ, ଦିଲ୍ଲୀର ନୂଆ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ସମାରୋହ ୨୦ ଫେବୃଆରୀ ଅପରାହ୍ନ ୪.୩୦ ରେ ଦିଲ୍ଲୀର ରାମଲୀଳା ମୈଦାନରେ ଅନୁଷ୍ଠିତ ହେବ। ଏଥିପାଇଁ ରାମଲୀଳା ମୈଦାନରେ ତିନୋଟି ମଞ୍ଚ ନିର୍ମାଣ କରାଯାଉଛି। ଏଥିରେ ଏକ ବଡ଼ ମଞ୍ଚ ନିର୍ମାଣ କରାଯିବ। ମଞ୍ଚରେ ପ୍ରାୟ ୧୦୦ ରୁ ୧୫୦ ଚେୟାର ଲଗାଯିବ। ଏହା ବ୍ୟତୀତ, ମଞ୍ଚ ସାମ୍ନାରେ ପ୍ରାୟ ୩୦ ହଜାର ଚେୟାର ରଖାଯିବ, ଯାହା ସାଧାରଣ ଲୋକଙ୍କ ବସିବା ପାଇଁ ହେବ। ଦିଲ୍ଲୀ ବିଧାନସଭା ନିବାଚନର ଫଳାଫଳ ଫେବୃଆରୀ ୮ରେ ଆସିଥିଲା, ଯେଉଁଥିରେ ୭୦ଆସନ ବିଶିଷ୍ଟ ବିଧାନସଭାରେ ଭାଜପାକୁ ୪୮ଏବଂ ଆମ ଆଦମୀ ପାର୍ଟିକୁ ୨୨ ଆସନ ମିଳିଥିଲା। ତୃତୀୟ ଥର ପାଇଁ କଂଗ୍ରେସର ଖାତା ଖୋଲିନାହିଁ।