ସୁରକ୍ଷାକର୍ମୀଙ୍କ ଏନ୍କାଉଣ୍ଟରରେ ୩ ଆତଙ୍କବାଦୀ ନିପାତ
Rasmita Behera
ଏପ୍ରିଲ ୨୨ ତାରିଖରେ ପହଲଗାମ ଆତଙ୍କବାଦୀ ଆକ୍ରମଣ ପରେ ଜମ୍ମୁ କାଶ୍ମୀରରେ ଆତଙ୍କୀ ନିରୋଧ ଅପରେସନ୍ ଜୋରଦାର ହୋଇଛି। ଗତ ଗୋଟିଏ ସପ୍ତାହ ମଧ୍ୟରେ ସୁରକ୍ଷାବାହିନୀର ‘ଅପରେସନ୍ ମହାଦେବ’ ଏବଂ ‘ଅପରେସନ୍ ଶିବଶକ୍ତି’ରେ ୫ ଆତଙ୍କବାଦୀ ନିପାତ ହେବାପରେ ଶୁକ୍ରବାର ପୁଣିଥରେ ଅପରେସନ୍ ଅଖଲ୍ ଆରମ୍ଭ ହୋଇଥିଲା। ଅପରେସନ୍ ଅଖଲ୍ରେ ମଧ୍ୟ ୩ ଆତଙ୍କବାଦୀ ନିପାତ ହୋଇଛନ୍ତି । ଜମ୍ମୁ କାଶ୍ମୀର କୁଲଗାମ ଜିଲ୍ଲାର ଅଖଲ୍ ଜଙ୍ଗଲ ଅଞ୍ଚଳରେ ସୁରକ୍ଷାକର୍ମୀଙ୍କ ଏନ୍କାଉଣ୍ଟରରେ ୩ ଆତଙ୍କବାଦୀ ନିପାତ ହୋଇଛନ୍ତି । ଆତଙ୍କବାଦୀମାନେ ଏଲ୍ଇଟିର ଶାଖା ଟିଆରଏଫ୍ ସହ ଜଡ଼ିତ ଏବଂ ସେମାନଙ୍କର ପହଲଗାମ ଆତଙ୍କବାଦୀ ଆକ୍ରମଣରେ ସମ୍ପୃକ୍ତି ଥିବା ଜଣାପଡ଼ିଛି । ଅଖଲ ଜଙ୍ଗଲ ଅଞ୍ଚଳରେ ଆତଙ୍କବାଦୀଙ୍କ ଗତିବିଧି ସଂକ୍ରାନ୍ତରେ ସୂଚନା ପାଇବାପରେ ସେନା, ସିଆରପିଏଫ୍, ଜମ୍ମୁ କାଶ୍ମୀର ପୁଲିସ ସର୍ଚ୍ଚ ଅପରେସନ୍ ଆରମ୍ଭ କରିଥିଲେ । ଅପରେସନ୍ ସମୟରେ ଆତଙ୍କବାଦୀମାନେ ସୁରକ୍ଷାକର୍ମୀଙ୍କ ଉପରକୁ ଗୁଳି ଚଳାଇବାରୁ ଏହା ଏନ୍କାଉଣ୍ଟରରେ ପରିଣତ ହୋଇଥିଲା । ଅଧିକାରୀମାନେ କହିଛନ୍ତି, ଆତଙ୍କବାଦୀମାନେ ଶ୍ରୀନଗର ନିକଟସ୍ଥ ଦଚିଗାମ୍ ଜାତୀୟ ଉଦ୍ୟାନରେ ଲୁଚିଥିଲେ ବୋଲି ବିଶ୍ବାସ କରାଯାଉଛି । ଉଲ୍ଳେଖଯୋଗ୍ୟ, ଅପରେସନ୍ ମହାଦେବ ଏବଂ ଶିବଶକ୍ତିର କିଛି ଦିନ ପରେ ଏହି ଏନ୍କାଉଣ୍ଟର ହୋଇଛି । ଅପରେସନ୍ ମହାଦେବରେ ପହଲଗାମ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ସୁଲେମାନ ଶାହ ଓରଫ ମୁସା ସମେତ ୩ ଆତଙ୍କବାଦୀ ନିପାତ ହୋଇଥିଲେ । ସେମାନଙ୍କ ନିକଟରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ମଧ୍ୟ ଜବତ ହୋଇଥିଲା ।
