ଗୁଜରାଟରେ ପ୍ରବଳ ବର୍ଷା, ୨୭ଟି ଜିଲ୍ଲାକୁ ରେଡ୍ ଆଲର୍ଟ: ୩ ମୃତ
Rasmita Behera
ଗୁଜରାଟରେ ଜାରି ରହିଛି ପ୍ରବଳ ବର୍ଷା। ଦୁଇ ଦିନ ହେବ ଲଗାଣ ବର୍ଷା ପରେ ସବୁଠି ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଛି। କାନ୍ଥ ଭୁଶୁଡ଼ି କିମ୍ବା ଅନ୍ୟାନ୍ୟ କାରଣରୁ ତିନି ଜଣଙ୍କ ମୃତ୍ୟୁ ଘଟି ଥିବାବେଳେ ୨୦ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଆଗାମୀ କିଛି ଦିନ ମଧ୍ୟ ପ୍ରବଳ ବର୍ଷା ନେଇ ପାଣିପାଗ ବିଭାଗ ସତର୍କ ସୂଚନା ଜାରି କରିଛି।
ଭାରତ ପାଣିପାଗ ବିଭାଗ ସୂଚନା ଅନୁଯାୟୀ, ଅଗଷ୍ଟ ୨୯ ତାରିଖ ସକାଳ ପର୍ଯ୍ୟନ୍ତ ରାଜ୍ୟର ବିଭିନ୍ନ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ଆରବ ସାଗରରେ ସୃଷ୍ଟ ଲଘୁଚାପ ଗଭୀର ଅବପାତର ରୂପ ନେଇଥିବାରୁ ଗୁଜରାଟରେ ପ୍ରବଳ ବର୍ଷା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ। ଏହି ସମୟରେ କ୍ଷୟକ୍ଷତି ହେବାର ଆଶଙ୍କା କରାଯାଉଛି। ତେଣୁ ତଳିଆ ଅଞ୍ଚଳବାସୀଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର ହେବାକୁ ପରାମର୍ଶ ଦିଆଯାଇଛି।
ସେହିପରି ମତ୍ସଜୀବୀମାନଙ୍କୁ ମଧ୍ୟ ସମୁଦ୍ର ମଧ୍ୟକୁ ନ ଯିବାକୁ ସତର୍କ କରାଯାଇଛି। ଆସନ୍ତା ତିନି ଦିନ ପର୍ଯନ୍ତ ରାଜ୍ୟର ୨୭ଟି ଜିଲ୍ଲାକୁ ରେଡ୍ ଆଲର୍ଟ ଜାରି କରାଯାଇଛି। ଏହି ସବୁ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ। କୁଚ୍, ମୋର୍ବି, ସୁରେନ୍ଦ୍ରନଗର, ଜାମନଗର, ରାଜକୋଟ, ଦ୍ୱାରକା, ପୋରବନ୍ଦର, ଗିର୍ ସୋମନାଥ, ଜୁନାଗଡ, ପଞ୍ଚମାହଲ, ଦାହୋଦ, ତାପି, ନାଭସାରୀ, ଭଲସାଦ, ଅହମ୍ମଦାବାଦ, ବୋତାଡ, ଆମ୍ରେଲି, ଆନନ୍ଦ, ଖେଡା, ମହିଷାଗର, ପଞ୍ଚମାହଲ, ନର୍ମଦା, ଭଦୋଦରା, ଛୋଟା ଉଦେପୁର, ସୁରଟ, ଏବଂ ଦାଙ୍ଗ ଜିଲ୍ଲାକୁ ରେଡ୍ ଆଲର୍ଟ ଜାରି କରାଯାଇଛି । ସେହିପରି ବନାସକାନ୍ତ, ପାଟନ, ମେହସାନା, ଗାନ୍ଧିନଗର, ସାବରକାନ୍ତ, ଏବଂ ଅରବାଲିକୁ ଅରେଞ୍ଜ ଆଲର୍ଟ ଜାରି କରାଯାଇଛି।
