ଆମେରିକା ଗସ୍ତ କରିବେ ପ୍ରଧାନମନ୍ତ୍ରୀ ମୋଦି!
Rasmita Behera
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଫୋନରେ କଥା ହୋଇଛନ୍ତି। ଉଭୟ ଭାରତ ଏବଂ ଆମେରିକା ମଧ୍ୟରେ ସମ୍ପର୍କକୁ ଆହୁରି ଉନ୍ନତ କରିବା ଉପରେ ଆଲୋଚନା କରିଥିଲେ। ଟ୍ରମ୍ପ ନିଜେ ପ୍ରଧାନମନ୍ତ୍ରୀ ମୋଦିଙ୍କ ସହ ତାଙ୍କର ଆଲୋଚନା ବିଷୟରେ କହିଛନ୍ତି।
ପୁନର୍ବାର ରାଷ୍ଟ୍ରପତି ପଦ ଗ୍ରହଣ କରିବା ପରେ ଏହା ଟ୍ରମ୍ପଙ୍କ ମୋଦିଙ୍କ ସହ ପ୍ରଥମ ଆଲୋଚନା ଥିଲା।
ଟ୍ରମ୍ପ କହିଛନ୍ତି ଯେ ମୋଦି ଫେବୃଆରୀରେ ଆମେରିକା ଗସ୍ତ କରିବେ। ଟ୍ରମ୍ପ କହିଛନ୍ତି ଯେ ଭାରତ ଅବୈଧ ପ୍ରବାସୀମାନଙ୍କୁ ଫେରାଇ ନେବା ପାଇଁ ସଠିକ ପଦକ୍ଷେପ ନେବ ଏବଂ ସେ ମୋଦିଙ୍କ ସହ ପ୍ରବାସ ବିଷୟରେ ଆଲୋଚନା କରିଥିଲେ।
ଉଭୟ ନେତା ଭାରତ-ଆମେରିକା ସମ୍ପର୍କକୁ ବଢାଇବା ଏବଂ ବିଶ୍ୱ ଶାନ୍ତି ଏବଂ ସୁରକ୍ଷା ପାଇଁ ଏକାଠି କାମ କରିବାକୁ ସଂକଳ୍ପ ନେଇଥିଲେ। ସୂଚନାଯୋଗ୍ୟ, ଟ୍ରମ୍ପ ୨୦ ଜାନୁଆରୀ, ୨୦୨୫ରେ ଆମେରିକାର ରାଷ୍ଟ୍ରପତି ଭାବରେ ଶପଥ ନେଇଥିଲେ।
ମୋଦି ଏକ୍ସରେ ଲେଖିଛନ୍ତି, ମୋର ପ୍ରିୟ ବନ୍ଧୁ ଡୋନାଲ୍ଡ ଟ୍ରମ୍ପଙ୍କ ସହ କଥା ହୋଇ ଖୁସି ଲାଗିଲା। ତାଙ୍କର ଐତିହାସିକ ବିଜୟ ଏବଂ ପୁନର୍ବାର ରାଷ୍ଟ୍ରପତି ହେବା ଅବସରରେ ତାଙ୍କୁ ଅଭିନନ୍ଦନ। ଆମେ ଏକ ପାରସ୍ପରିକ ଲାଭଦାୟକ ଏବଂ ବିଶ୍ୱସ୍ତ ସହଭାଗୀତା ପାଇଁ ପ୍ରତିବଦ୍ଧ। ଆମେ ଆମ ଲୋକଙ୍କ କଲ୍ୟାଣ, ବିଶ୍ୱ ଶାନ୍ତି, ସମୃଦ୍ଧି ଏବଂ ସୁରକ୍ଷା ପାଇଁ ଏକାଠି କାମ କରିବୁ।
ସୂଚନାଯୋଗ୍ୟ, ଟ୍ରମ୍ପଙ୍କ ଶପଥ ଗ୍ରହଣ ଉତ୍ସବରେ ପ୍ରଧାନମନ୍ତ୍ରୀ ମୋଦିଙ୍କ ଯୋଗଦାନ ବିଷୟରେ ଆଲୋଚନା ହେଉଥିଲା, କିନ୍ତୁ ଏହି ଉତ୍ସବରେ ମୋଦି ଯୋଗ ଦେଇ ନ ଥିଲେ। ବୈଦେଶିକ ମନ୍ତ୍ରୀ ଏସ ଜୟଶଙ୍କର ମୋଦିଙ୍କ ସ୍ବତନ୍ତ୍ର ପ୍ରତିନିଧି ଭାବରେ ଯୋଗ ଦେଇଥିଲେ।
