ଫଟା ଥିଲେ ଗୋଟା ହେଲେ 

କଥାରେ କହନ୍ତି ମଇଁଷି ଶିଙ୍ଘ ଫଟା, ହେଲେ ଯୁଝିଲା ବେଳକୁ ଗୋଟା  । ମାନେ ମଇଁଷି ପଲରୁ ବାଘ ବି ମୁକୁଳିବା ମୁସ୍କିଲ  । ଏବେ ରାଜ୍ୟ ବିଜେପିର ତୁଙ୍ଗ ନେତାମାନେ ବିଜେଡ଼ିକୁ ଟାର୍ଗେଟ କରିବା ଆଳରେ ଏକାଠି ବୋଲି ବାର୍ତ୍ତା ଦେଇଛନ୍ତି  । ପୂର୍ବର ଫାଟରେ ଏବେ
ସେମାନେ ବି ଯାହିତାହି ନେତା ନୁହଁନ୍ତି, ଏକୁ ଆରକେ ବଳି  । ସମସ୍ତେ ସିଏମ ମ୍ୟାଟେରିଆଲ୍‌  । ପ୍ରତାପ ଚନ୍ଦ୍ର ଷଡ଼ଙ୍ଗୀ, ବୈଜୟନ୍ତ ପଣ୍ଡା, ମନମୋହନ ସାମଲ, ଧର୍ମେନ୍ଦ୍ର ପ୍ରଧାନ ଓ ଅପରାଜିତା ଷଡ଼ଙ୍ଗୀ  । ଏମାନେ ପରସ୍ପରର ପ୍ରତିଦ୍ୱନ୍ଦ୍ୱୀ ବୋଲି ସମସ୍ତେ ଜାଣନ୍ତି  । ନିର୍ବାଚନ ପୂର୍ବରୁ ଯିଏ ଯାହା ବାଟରେ ଶକ୍ତି ପ୍ରଦର୍ଶନ କରୁଥିଲେ  । ଅନ୍ୟକୁ ନୀଚ୍ଚା ଦେଖାଇବା ପାଇଁ କୌଣସି ପ୍ରକାର ସୁଯୋଗକୁ ହାତଛଡ଼ା କରୁନଥିଲେ  । ମନ ଫଟାଫଟି କାରଣରୁ ବିଜେପି ଆଗେଇ ପାରୁନାହିଁ ବୋଲି ବାର୍ତ୍ତା ଯାଉଥିଲା  । 
କିନ୍ତୁ ଏବେ ସମସ୍ତେ ଅଠାକାଠିରେ ପଡ଼ିଯାଇଥିବାରୁ ଏକାଠି ହେବାକୁ ବାଧ୍ୟ ହୋଇଛନ୍ତି  । ଧର୍ମେନ୍ଦ୍ର ଏବେ ସମ୍ବଲପୁରରୁ ଲଢୁଛନ୍ତି  । ତାଙ୍କୁ ସେଠାରେ ଟକ୍କର ଦେଉଛନ୍ତି ବିଜେଡ଼ିର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ  । ସମ୍ବଲପୁରର ହାଇଭୋଲଟେଜ ଲଢେ଼ଇ ଉପରେ ଏବେ ସାରା ଓଡ଼ିଶାର ବି ନଜର ରହିଛି  । ବୈଜୟନ୍ତ ପଣ୍ଡା ଗତଥର କେନ୍ଦ୍ରାପଡ଼ାରୁ ହାରିଥିବାବେଳେ ଏଥର ହଁ ନାହିଁ ଭିତରେ ମଇଦାନକୁ ଓହ୍ଲାଇଛନ୍ତି  । କଂଗ୍ରେସ ନେତା ଅଂଶୁମାନ ମହାନ୍ତି, ଗଣେଶ୍ୱର ବେହେରା ଓ ପ୍ରକାଶ ବେହେରା ବିଜେଡ଼ିକୁ ଆସିଥିବାବେଳେ ବରିଷ୍ଠ ନେତା ବିଜୟ ମହାପାତ୍ରଙ୍କ ପୁଅ ଅରବିନ୍ଦ ମଧ୍ୟ ବିଜେଡ଼ିରେ  । ଫଳରେ ବୈଜୟନ୍ତ ଏବେ ପ୍ରତିକୂଳ ସ୍ଥିତିରେ ନିର୍ବାଚନ ଲଢୁଛନ୍ତି  ।
ପ୍ରତାପ ଚନ୍ଦ୍ର ଷଡ଼ଙ୍ଗୀ ବି ଏଥର ଲୋକସଭା ନିର୍ବାଚନ ଲଢ଼ିବାକୁ ଚାହୁଁନଥିଲେ  । ସେ ବିଧାୟକ ହେବାକୁ ଚାହୁଁଥିବାବେଳେ ଦଳ ତାଙ୍କୁ ଏମପି ଟିକେଟ ଧରେଇଦେଲା  । ବାଲେଶ୍ୱରରୁ ଏଥର ତାଙ୍କୁ କଡ଼ା ଟକ୍କରର ସାମ୍ନା କରିବାକୁ ପଡୁଛି  । ଅପରାଜିତା ଷଡ଼ଙ୍ଗୀ ଗତଥର ବାଜିମାତ କରି ସମସ୍ତଙ୍କୁ ଚକିତ କରିଦେଇଥିଲେ  । ପରେପରେ ସେ ନିଜକୁ ସିଏମ ଚେହେରା ଭାବେ ଉପସ୍ଥାପିତ କରିବାରେ ଲାଗିଥିଲେ  । ଏବେ ବିଜେଡ଼ି ସମୀକରଣ ତାଙ୍କର ଟେନସନ ବଢାଇଦେଇଛି  । 
ରାଜ୍ୟ ବିଜେପି ସଭାପତି ମନମୋହନ ସାମଲ ଏଥର ଧର୍ମେନ୍ଦ୍ରଙ୍କୁ ଚକମା ଦେଇ ସଭାପତି ହୋଇଯାଇଥିଲେ  । ଏହାପରେ ମନମୋହନ ନିଜର କୋଟରୀ ଗଢ଼ିବା ସହ ଧର୍ମେନ୍ଦ୍ରଙ୍କ କୋଟରୀକୁ କୋଣଠେସା କରି ଦେଇଥିଲେ  । ତିନି ତିନି ଥର ହାରିବା ପରେ ଏଥର ସେ ବିଜୟର ସ୍ୱପ୍ନ ଦେଖୁଛନ୍ତି  । ତେବେ ଚାନ୍ଦାବାଲିରେ ବିଜୁ ଯୁବ ଜନତା ଦଳ ସଭାପତି ବ୍ୟୋମକେଶ ରାୟଙ୍କ ସହ ତାଙ୍କର କଡ଼ା ଲଢେ଼ଇ ହେବ  । ନିର୍ବାଚନ ପୂର୍ବରୁ ଏହି ନେତାମାନେ ଯଦି ଏକାଠି ହୋଇଥା’ନ୍ତେ ଆଜି ବିଜେପି ଆହୁରି ମଜବୁତ ହୋଇପାରିଥା’ନ୍ତା  । ତେବେ ବାହାଘର ବେଳେ ବାଇଗଣ ରୋଇଲେ କି ଫଳ ମିଳିବ ତାହା ଜୁନ ୪ରେ ଜଣାପଡ଼ିବ  ।