ବାହୁବଳୀଙ୍କ ଭାଗ୍ୟ ନିର୍ଦ୍ଧାରଣ କରିବ ‘ବାଲଟି’

ଖୋର୍ଦ୍ଧା ରାଜନୀତି ଏବେ ରୋଚକ ମୋଡ଼ ନେଇଛି  । ଦୁଇ ହେଭିୱେଟ ନେତା ପ୍ରଥମ ଥର ପାଇଁ ମୁହାଁମୁହିଁ ହୋଇଛନ୍ତି  । ବିଜେଡ଼ି ପ୍ରାର୍ଥୀ ରାଜେନ୍ଦ୍ର ସାହୁ ଖୋର୍ଦ୍ଧାରୁ ଦୁଇଥର ଓ ବେଗୁନିଆରୁ ଥରେ ବିଧାୟକ ହେବାର ସୁଯୋଗ ପାଇଛନ୍ତି  । ସେପଟେ ବେଗୁନିଆ ଓ ଚିଲିକାରୁ ଦୁଇଥର ବିଧାୟକ ହେବାର ସୌଭାଗ୍ୟ ପାଇଛନ୍ତି ପ୍ରଶାନ୍ତ ଜଗଦ୍ଦେବ  । ରାଜେନ୍ଦ୍ର ଓ ଗଣେଶ ଗୋଟିଏ ଦଳରେ ଥିଲେ ମଧ୍ୟ ସେମାନଙ୍କ ମଧ୍ୟରେ ସବୁବେଳେ ତିକ୍ତତା ରହି ଆସିଥିଲା  । ଏବେ ଉଭୟ ନେତା ନିର୍ବାଚନ ମଇଦାନକୁ ଓହ୍ଲାଇଥିବାରୁ ଖୋର୍ଦ୍ଧାରେ ହାଇଭୋଲଟେଜ ଲଢେ଼ଇ ଦେଖିବାକୁ ମିଳିଛି  ।
ପ୍ରଶାନ୍ତ ଓ ରାଜେନ୍ଦ୍ରଙ୍କ ଘର ହେଉଛି ଖୋର୍ଦ୍ଧାରେ  । ରାଜେନ୍ଦ୍ର ଖୋର୍ଦ୍ଧା ସହରରେ ରହୁଥିବାବେଳେ ଗଣେଶଙ୍କ ଘର ହେଉଛି ଟାଙ୍ଗୀ ବ୍ଳକ  । ଟାଙ୍ଗୀ ବ୍ଳକରୁ ଏଯାଏଁ କେହି ଖୋର୍ଦ୍ଧାର ବିଧାୟକ ହୋଇନାହାନ୍ତି  । ତେଣୁ ଗଣେଶ ଟାଙ୍ଗୀ ବ୍ଳକର ଭୋଟରଙ୍କ ଉପରେ ଅଧିକ ଆସ୍ଥା ରଖିଛନ୍ତି  । ବାସ୍ତବରେ ଟାଙ୍ଗୀ ବ୍ଳକ ହିଁ ହାରଜିତର ଫଇସଲା କରିଥାଏ  । ସେହିପରି ଖୋର୍ଦ୍ଧା ସହରରେ ରାଜେନ୍ଦ୍ରଙ୍କର ଭୋଟ ଥିବାବେଳେ ବିଧାୟକ ଜ୍ୟୋତିରିନ୍ଦ୍ର ନାଥ ମିତ୍ରଙ୍କର ବି ଭଲ ଭୋଟ ବ୍ୟାଙ୍କ ରହିଛି  । ପୂର୍ବରୁ ଜିତୁ ଓ ଗଣେଶଙ୍କ ମଧ୍ୟରେ ଭଲ ସମ୍ପର୍କ ରହିଥିଲା  । ଜିତୁ କିନ୍ତୁ ଗଣେଶଙ୍କୁ ଖୋଲାଖୋଲି ସମର୍ଥନ କରୁନଥିବାରୁ ତାଙ୍କ ଭୋଟ କୁଆଡେ଼ ଯିବ ତାହା ସ୍ପଷ୍ଟ ହୋଇପାରୁନାହିଁ  । ତେବେ ଜିତୁଙ୍କ କେତେକ ଆଗଧାଡ଼ିର କର୍ମୀ ଗଣେଶଙ୍କ ସହ ଅଛନ୍ତି  । ଅପରପକ୍ଷରେ ବିଜେଡ଼ିର କିଛି ଅସନ୍ତୁଷ୍ଟ ନେତା ବି ଗଣେଶଙ୍କୁ ଭିତିରିଆ ସମର୍ଥନ କରୁଛନ୍ତି  । ଏଭଳି କ୍ଷେତ୍ରରେ ଗଣେଶଙ୍କ ପାଇଁ କିଳା ଖଞ୍ଜିଛନ୍ତି କାଳୁ ଖଣ୍ଡାୟତରାୟ  । ସେ ବିଜେପି ଟିକେଟ ନପାଇବାରୁ ଏବେ ‘ବାଲଟି’ ଚିହ୍ନରେ ସ୍ୱାଧୀନ ଭାବେ ନିର୍ବାଚନ ଲଢୁଛନ୍ତି  । ଯାହାଫଳରେ ବିଜେପି ଭୋଟର କିଛି ଅଂଶ ବାଲଟିକୁ ଯିବା ନିଶ୍ଚିତ  । କାଳୁ ଯେତେ ଅଧିକ ଭୋଟ ପାଇବେ ଗଣେଶ ସେତେ କ୍ଷତିଗ୍ରସ୍ତ ହେବେ  । ତେଣୁ ବାଲଟି ଉପରେ ହିଁ ଗଣେଶଙ୍କ ଭାଗ୍ୟ ନିର୍ଭର କରେ ବୋଲି ଚର୍ଚ୍ଚା ହେଉଛି  ।
ସେପଟେ ରାଜେନ୍ଦ୍ର ସବୁବେଳେ କମ୍‌ ଭୋଟରେ ହେଉ ପଛେ ଜିତି ଆସୁଛନ୍ତି  । ଏବେ କିନ୍ତୁ ତାଙ୍କୁ ହରାଇବା ପାଇଁ ଦଳ ଭିତରେ ହିଁ ଗୋଟିଚାଳନା କରାଯାଉଛି  । କିନ୍ତୁ କାଳୁ ଏବେ ଗଣେଶଙ୍କ ଭୋଟରେ ଭାଗ ବସାଉଥିବାରୁ ତାହା ତାଙ୍କ ପାଇଁ ସୁଯୋଗ ସୃଷ୍ଟିକରିଛି  । ତେବେ ଖୋର୍ଦ୍ଧାରେ ସାଂସଦ ଅପରାଜିତା ଷଡ଼ଙ୍ଗୀଙ୍କର ଭଲ ଭୋଟ ରହିଛି  । ଏଭଳି ସ୍ଥିତିରେ ବିଜେଡ଼ି ଓ ବିଜେପି ମଧ୍ୟରେ କଡ଼ା ଟକ୍କର ହେଉଛି  ।