ଆରଆଇଙ୍କୁ ଦୁର୍ବ୍ୟବହାର,କିରାଣି ନିଲମ୍ବିତ
Rasmita Behera
ମାଲକାନଗିରି: ମାଲକାନଗିରି ଜିଲ୍ଲା ମୋଟୁ ତହସିଲ କାଯ୍ୟଳୟର ଜଣେ କିରାଣୀ ସେହି କାଯ୍ୟଳୟର ରାଜସ୍ୱ ନିରୀକ୍ଷକଙ୍କୁ କାର୍ଯ୍ୟଳୟ ପରିସରରେ ଦୁର୍ବ୍ୟବହାର ପ୍ରଦର୍ଶନ କରୁଥିବା ସହ ଅସଭ୍ୟ ଭାଷାରେ ଗାଳି କରି ଚପଲ ଖୋଲି ମାଡ ମାରିବାକୁ ଆସୁଥିବାର ଖବର ବିଭିନ୍ନ ଗଣ ମାଧ୍ୟମରେ ଖବର କାଗଜରେ ପ୍ରକାଶ ହେବା ପରେ ଉକ୍ତ କିରାଣୀଙ୍କୁ ଜିଲ୍ଲାପାଳ ନିଲମ୍ବନ କରିଥିବା ସହ ଉପ ଜିଲ୍ଲାପାଳଙ୍କ ପକ୍ଷରୁ ସମ୍ପୃକ୍ତ କିରାଣୀଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି । ସୂଚନା ଅନୁଯାୟୀ ମୋଟୁ ତହସିଲରେ କାର୍ଯ୍ୟରତ ପ୍ରଦୀପ କୁମାର ମହାପାତ୍ର ନାମକ ଜଣେ କିରାଣୀ ନିଜ କକ୍ଷରେ ବସିଥିବା ବେଳେ ତାଙ୍କ ସମ୍ମୁଖରେ ସେଠାରେ କାର୍ଯ୍ୟରତ ଜଣେ ରାଜସ୍ୱ ନିରିକ୍ଷକଙ୍କୁ ମୋତେ କାହିଁକି ଫୋନ କଲୁ, ତୋର କେତେ ସାହସ କହି ଅସଭ୍ୟ ଭାଷାରେ ଗାଳି କରୁଥିବା ସହ ଚପଲ ଖୋଲି ମାରିବାକୁ ଉଦ୍ୟମ କରୁଥିବା ଏବଂ ମୋତେ ୫୦୦୦ ଟଙ୍କା ଦେବୁ ବୋଲି ଧମକ ଦେଉଥିବା ଭିଡିଓ ଭାଇରାଲ ହେବା ପରେ ଏନେଇ ବିଭିନ୍ନ ଗଣ ମାଧ୍ୟମରେ ଖବର ପରିବେଷଣ ହୋଇଥିଲା । ଏହି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଥିବା ବେଳେ ଶ୍ରୀ ମହାପାତ୍ରଙ୍କ ବିରୋଧରେ କଠୋର କାର୍ଯ୍ୟନୁଷ୍ଠାନ ପାଇଁ ମଧ୍ୟ ଦାବି ହୋଇଥିଲା । ଶ୍ରୀ ମହାପାତ୍ର ଯେଉଁ ରାଜସ୍ୱ ନିରିକ୍ଷକଙ୍କୁ ଦୁର୍ବ୍ୟବହର ଦେଖାଉଥିଲେ ସେ ଦିବ୍ୟାଙ୍ଗ ହୋଇଥିବା ବେଳେ କିପରି ତାଙ୍କ ସହ ଏପରି ଅସଭ୍ୟ ବ୍ୟବହାରକୁ ସାଧାରଣରେ ନିନ୍ଦା କରଯାଇଥିଲା । ତେବେ ବିଭିନ୍ନ ଗଣ ମାଧ୍ୟମରେ ଖବର କାଗଜରେ ଏସବୁକୁ ନେଇ ଖବର ପ୍ରକାଶ ପରେ ଶ୍ରୀ ମହାପାତ୍ରଙ୍କୁ ଜିଲ୍ଲାପାଳ ନିଲମ୍ବନ କରିଥିବା ଜଣା ପଡିଛି । ଏହାସହ ଉପ ଜିଲ୍ଲାପାଳଙ୍କ ପକ୍ଷରୁ ମଧ୍ୟ ଘଟଣାକୁ ନେଇ ଶ୍ରୀ ମହାପାତ୍ରଙ୍କୁ କାରଣ ଦର୍ଶାଅ ନୋଟିସ ଜାରି କରି ୩ ଦିନ ମଧ୍ୟରେ ଉତ୍ତର ରଖିବାକୁ ଆଦେଶ ଦିଆଯାଇଛି ।
