ଓଡିଶା ଦିବସ ପାଳିତ

କେନ୍ଦୁଝର : କେନ୍ଦୁଝର ସିଟିଜି ଫାଉଣ୍ଡେସନ ଦ୍ୱାରା ପ୍ରତିଷ୍ଠିତ କେନ୍ଦୁଝର ହାୟର ସେକେଣ୍ଡାରୀ ସ୍କୁଲ, କେନ୍ଦୁଝର ଡିଗ୍ରୀ କଲେଜ, ସିଟିଜି ପ୍ରଫେସନାଲ, ସିଟିଜି ଗ୍ଲୋବାଲ ସ୍କୁଲ ଏବଂ ସିଟିଜି ବିଦ୍ୟାମନ୍ଦିରରେ ୮୯ତମ ଓଡିଶା ଦିବସ ଚେୟାରମ୍ୟାନ୍‌ ଡଃ ରାଜେନ୍ଦ୍ର ପଲେଇଙ୍କ ତତ୍ତ୍ୱାବଧାନରେ ଶିକ୍ଷା ନିକେତନ ନିଉ କଲେଜରେ ପାଳିତ ହୋଇଯାଇଛି । ଓଡିଶା ଦିବସ ପାଳନ ଅବସରରେ ସର୍ବପ୍ରଥମେ ବନ୍ଦେ ଉତ୍କଳ ଜନନୀ ଗାନ କରାଯାଇଥିଲା  । ସ୍ୱତନ୍ତ୍ର ଉତ୍କଳ ପ୍ରଦେଶ ଗଠନରେ ଓଡିଶାର ବରେଣ୍ୟ ସନ୍ତାନ ଯେଉଁମାନେ କି ସ୍ୱତନ୍ତ୍ର ପ୍ରଦେଶ ଗଠନର ପ୍ରମୁଖ ଭୂମିକା ଗ୍ରହଣ କରିଥିଲେ ଉତ୍କଳ ଗୌରବ ମଧୁସୂଦନ ଦାସ, ଉତ୍କଳମଣି ଗୋପବନ୍ଧୁ ଦାଶ, ଫକୀର ମୋହନ ସେନାପତି, ପାରଳା ରାଜା ଗଜପତି କୃଷ୍ଣଚନ୍ଦ୍ର ନାରାୟଣ ଦେବ, ମୟୁରଭଞ୍ଜର ରାଜା ଶ୍ରୀରାମଚନ୍ଦ୍ର ଭଞ୍ଜଦେଓ, ଗୌରୀ ଶଙ୍କର, ଗଙ୍ଗାଧର ମେହେର ଏବଂ ରାଧାନାଥ ରଥ ପ୍ରମୁଖଙ୍କୁ ଭକ୍ତିପୂତ ଶ୍ରଦ୍ଧାଞ୍ଜଳି ଜ୍ଞାପନ କରିବା ସହିତ ସେମାନଙ୍କ ତ୍ୟାଗ, ଉଦ୍ୟମ, ବଳିଦାନ ଏବଂ ପ୍ରଚେଷ୍ଟାର ସୁନ୍ଦର ଅବତାରଣା କଲେଜର ଅଧ୍ୟାପକ, ଅଧ୍ୟାପିକାଙ୍କ ଦ୍ୱାରା କରାଯାଇଥିଲା  । ଆଜିର ଦିବସ ପ୍ରତ୍ୟେକ ଓଡିଆମାନଙ୍କ ପାଇଁ ଏକ ମହତ୍ତ୍ୱପୂର୍ଣ୍ଣ ଦିବସ ପ୍ରତ୍ୟେକ ଓଡିଆ ପାଇଁ ସ୍ୱାଭିମାନ, ସଂସ୍କୃତି, ଅସ୍ମିତାର, ଗର୍ବ, ଗୌରବର ଗାଥା ବହନ କରେ । ପିଲାମାନେ ସ୍ୱତନ୍ତ୍ର ଉତ୍କଳ ପ୍ରଦେଶ ଗଠନର ଘଟଣାବଳୀକୁ ଏବଂ ଓଡିଶାର ବରପୁତ୍ର ଏବଂ ମହାନ ମନୀଷିମାନଙ୍କ ଆନ୍ଦୋଳନକୁ ଅତି ସକରାତ୍ମକ ଭାବେ ବର୍ଣ୍ଣନା କରିଥିଲେ । ଆଜିର ଓଡିଶା ଏବଂ ୧୯୩୬ ମସିହାର ଓଡିଶାଠୁ ଅର୍ଥନୈତିକ, ସାମାଜିକ, ବୌଦ୍ଧିକ ଏବଂ ଶିକ୍ଷା କ୍ଷେତ୍ରରେ ଅନେକ ପରିବର୍ତ୍ତନ ଆସିଛି । ଏହି ବିକାଶକୁ ଆହୁରି ବିକଶିତ ଧାରାରେ ଅଗ୍ରସର କରିବା ପାଇଁ ସମସ୍ତଙ୍କର ଅକ୍ଳାନ୍ତ ପରିଶ୍ରମ ଏବଂ ପ୍ରଘାଡ ନିଷ୍ଠାର ଆବଶ୍ୟକତା ରହିବା ଦରକାର । ଆଜିର ଏହି ଉତ୍କଳ ଦିବସ ପାଳନ ସମସ୍ତ ଓଡିଆ ଭାଇ ଭଉଣୀଙ୍କୁ ଏକ ନୂତନ ପ୍ରେରଣା ଓ ଉଦ୍ଦିପନା ଆଣିଦେଉ । ପ୍ରତ୍ୟେକ ଓଡିଆ ନିଜର ଖାଦ୍ୟ, ବସ୍ତ୍ର,ସଂସ୍କୃତି,ଭାଷା ଓ ସାହିତ୍ୟର ଉନ୍ନତ କରି ଏକ ସମୃଦ୍ଧଶାଳୀ ନୂତନ ଓଡିଶା ଗଠନ କରିବା ପାଇଁ ସର୍ବସମ୍ମତି ମତ ପ୍ରକାଶ ପାଇଥିଲା  । ବିଶେଷ କରି ପ୍ରତ୍ୟେକ ଓଡିଆ ନିଜ ପରିବାର ସହିତ ଏହି ଦିବସକୁ ପାଳନ କରିବା ପାଇଁ ନିଜକୁ ପ୍ରସ୍ତୁତ କରିବାର ଆବଶ୍ୟକତା ରହିଛି ବୋଲି ସମସ୍ତେ ପ୍ରକାଶ କରିଥିଲେ । ଶେଷରେ ବାଣିଜ୍ୟ ବିଭାଗର ଅଧ୍ୟାପିକା ସୁଶ୍ରୀ ନିକିତା ପଲେଇ ଧନ୍ୟବାଦ ଅର୍ପଣ କରି ସଭାକାର୍ଯ୍ୟ ସମାପନ କରିଥିଲେ ।