ଓଡ଼ିଶାରେ ସୁନୀଲ୍ ବଂଶଲ୍ : ତାଲିକା ହେବ ଫାଇନାଲ୍
Rasmita Behera
ଭୁବନେଶ୍ୱର: କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ ଏବେ ଓଡ଼ିଶାରେ । ଯାହାକୁ ନେଇ ବିଜେପି ଶିବିର ଚଳଚଞ୍ଚଳ ହୋଇଯାଇଛି । ସଂଗଠନ ଓ ସରକାରଙ୍କ ମଧ୍ୟରେ ସୁମନ୍ୱୟ ରକ୍ଷା ସହ ନିଗମ ଅଧ୍ୟକ୍ଷ ତାଲିକା ପ୍ରସ୍ତୁତି ନେଇ ସେ ବରିଷ୍ଠ ନେତାମାନଙ୍କ ସହ ଆଲୋଚନା କରିଛନ୍ତି ।
ମିଳିଥିବା ସୂଚନା ଅନୁଯାୟୀ, ବିଭିନ୍ନ କମିଶନ, ନିଗମ ଅଧ୍ୟକ୍ଷ ପଦ ନେଇ ପ୍ରଥମେ ବିଚାରବିମର୍ଷ କରାଯାଇଛି । ଏନେଇ ଚୂଡ଼ାନ୍ତ ତାଲିକା ବି ପ୍ରସ୍ତୁତି ସରିଛି । ତେବେ କେତେକ ପ୍ରସଙ୍ଗରେ ଅଙ୍କ ଛିଣ୍ଡୁନଥିବାରୁ ସେନେଇ ଅଧିକ ବିଚାରବିମର୍ଷ ହୋଇଛି । ପ୍ରଥମେ କିଛି ନିଗମର ଅଧ୍ୟକ୍ଷଙ୍କ ନାମ ଘୋଷଣା କରାଯିବ । ପରେ ଆଉ ଏକ ଦଫାରେ ଆଉ କେତେକଙ୍କ ନାମ ଘୋଷଣା ହେବ । ଏହାଛଡ଼ା ଆଗାମୀ ଦିନରେ ମନମୋହନ ସାମଲ ନୂଆ ଟିମ୍ ବି ଘୋଷଣା କରିବେ । ସେ ସଂକ୍ରାନ୍ତରେ ବି ଆଲୋଚନା ହୋଇଥିବା ଜାଣିବାକୁ ମିଳିଛି । ସମ୍ଭବତଃ ଚଳିତ ମାସରେ ହିଁ ନିଗମ ଅଧ୍ୟକ୍ଷଙ୍କ ନାମ ଘୋଷଣା ହେବାର ଯଥେଷ୍ଟ ସମ୍ଭାବନା ରହିଛି ।
ଖାଲି ସେତିକିନୁହେଁ, ତୃଣମୂଳସ୍ତରରେ ସଂଗଠନକୁ ମଜବୁତ କରିବା ପାଇଁ ଖୁବଶୀଘ୍ର ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହେବ । ଜିଲ୍ଲା ସଭାପତି ଓ ମଣ୍ଡଳ ସଭାପତିମାନଙ୍କ ପାଇଁ ପ୍ରଶିକ୍ଷଣ ଶିବିର ବି କରାଯିବ ବୋଲି ଜାଣିବାକୁ ମିଳିଛି ।
