ବିଦାହେବେ ଅପାରଗ ଓ ଦୁର୍ନୀତିଖୋର ବାବୁ : ମୁଖ୍ୟ ଶାସନ ସଚିବଙ୍କ କଡ଼ା ନିର୍ଦ୍ଦେଶ
Rasmita Behera
ମୁଖ୍ୟ ଶାସନ ସଚିବଙ୍କ କଡ଼ା ନିର୍ଦ୍ଦେଶ । ଏଣିକି ବିଦା ହେବେ ଅପରାଗ ଓ ଦୁର୍ନୀତିଖୋର ବାବୁ । କାର୍ଯ୍ୟରେ ଅବହେଳା କିମ୍ବା ସାଧୁତାର ଅଭାବ ଦେଖାଇଲେ ବାଜିବ ସରକାରୀ ଛାଟ । ଅବସର ପୂର୍ବରୁ ଚାକିରିରୁ ବହିଷ୍କାର କରାଯିବ । ଏନେଇ ମୁଖ୍ୟ ଶାସନ ସଚିବ ମନୋଜ ଆହୁଜା କଡ଼ା ଚେତାବନୀ ଦେଇଛନ୍ତି । ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ଏକ ସର୍କୁଲାର ଜାରି କରାଯାଇଛି । ଏହାକୁ କାର୍ଯ୍ୟକାରୀ କରିବାକୁ ମୁଖ୍ୟ ଶାସନ ସଚିବ ସମସ୍ତ ବିଭାଗକୁ ନିର୍ଦ୍ଦେଶ ଦେଇଛନ୍ତି ।
ସଚ୍ଚୋଟତା ଓ ଦକ୍ଷତାର ଅଭାବ ଥିବା ଅଧିକାରୀ ଏବଂ କର୍ମଚାରୀମାନେ ସରକାରୀ ଚାକିରିରେ ରହିଛନ୍ତି ତାହା ଜନସ୍ବାର୍ଥ ପାଇଁ ଅତ୍ୟନ୍ତ କ୍ଷତିକାରକ । ତେଣୁ ଅପାରଗ ବ୍ୟକ୍ତିମାନଙ୍କୁ ସରକାରୀ ସେବାରୁ ହଟାଇ ସରକାରୀ କାର୍ଯ୍ୟାଳୟ ଗୁଡ଼ିକର ପ୍ରଭାବଶାଳୀ କାର୍ଯ୍ୟକାରିତା ପାଇଁ ଜିଏ ଓ ପିଜି ବିଭାଗ ସର୍କୁଲାର ଜାରି କରିଛି । ଜାରି ହୋଇଥିବା ନିର୍ଦ୍ଦେଶାବଳୀ ଅନୁଯାୟୀ ନିୟମିତ ସମୀକ୍ଷା ବୈଠକ କରିବାକୁ ମୁଖ୍ୟ ଶାସନ ସଚିବ ସମସ୍ତ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି । ଏଠି ପ୍ରଶ୍ନ ଉଠୁଛି, ଅପରାଗ ଓ ଦୁର୍ନୀତିଖୋର ବାବୁ କିଏ ? କିଏ ପାଳନ କରୁନି ମୁଖ୍ୟ ଶାସନ ସଚିବଙ୍କ ନିର୍ଦ୍ଦେଶ ? କାହାକୁ ଦିଆଯାଇଛି ଅପାରଗ ବାବୁଙ୍କୁ ଚିହ୍ନଟ ଦାୟିତ୍ବ ? ଜିଲ୍ଲା ଗସ୍ତ ନିର୍ଦ୍ଦେଶକୁ କାହିଁକି କରାଯାଉନି ପାଳନ ? କାହିଁକି ଜିଲ୍ଲା ଗସ୍ତ କରୁନାହାନ୍ତି ବାବୁ ? ହୁଗୁଳି ଗଲାଣି କି ଶାସନ ବ୍ୟବସ୍ଥା ?
