ଯୁବକଙ୍କୁ ରାସ୍ତାରେ ଅଟକାଇ ଆକ୍ରମଣ ; ଅଭିଯୁକ୍ତ ଗିରଫ
Jitendra Sahu
ଭୁବନେଶ୍ୱର, ୭ା୫ : ଘରକୁ ଫେରୁଥିବା ବେଳେ ଏକ ସ୍କୁଟିକୁ ଧକ୍କା ଦେବାକୁ ନେଇ ବିରୋଧ କରିବାରୁ ରାସ୍ତାରେ ଅଟକାଇ ଯୁବକଙ୍କୁ ମରଣାନ୍ତକ ଆକ୍ରମଣ କଲେ ନିଶାଡି । ଏନେଇ ଏୟାରଫିଲ୍ଡ ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁକରି ଜଣେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି । ଅନ୍ୟ ଜଣେ ସହଯୋଗୀ ଫେରାର ରହିଛି । ଗିରଫ ଅଭିଯୁକ୍ତ ହେଲା, ସୁନ୍ଦରପଦା ଢ଼ିପାସାହିର ବିରେନ୍ଦ୍ର ଭୋଇ ।
ସୂଚନାଯୋଗ୍ୟଯେ, ଗତ ଫେବୃୟାରୀ ମାସ ୨ ତାରିଖ ସନ୍ଧ୍ୟା ୫ଟା ସମୟରେ ଅଭିଯୋଗକାରୀ ଜଗନ ସାହୁ ତାଙ୍କ ବାଇକରେ ଘରକୁ ଫେରୁଥିଲେ । ସେହି ସମୟରେ କାଳିଆଶୁଣି ମନ୍ଦିର ନିକଟରେ ଅଭିଯୁକ୍ତ ଓ ତାର ସହଯୋଗୀ ନିଶାଶକ୍ତ ଅବସ୍ତାରେ ବେପରୁଆ ଗାଡି ଚଳାଈ ଅଭିଯୋଗକାରୀଙ୍କ ଗାଡିକୁ ଧକ୍କା ଦେଇଥିଲେ । ଏଥିରେ ଅଭିଯୋଗକାରୀ ସେମାନଙ୍କୁ ପଚାରିବାରୁ ଅଭିଯୁକ୍ତ ଓ ତାର ସହଯୋଗୀ ତାଙ୍କୁ ଗାଳି ଗୁଲଜ କରି ଧମକ ଦେଇ ସେଠାରୁ ଚାଲିଯାଇଥିଲେ । ଏହି ଘଟଣା ପରେ ଅଭିଯୋଗକାରୀ ସେଠାରୁ ଘରକୁ ଫେରିବା ବେଳେ ସୁନ୍ଦରପଦା ଦୋମୁଖୀ ବରଗଛ ନିକଟରେ ଅଭିଯୁକ୍ତ ଓ ତାର ଅନ୍ୟ କିଛି ସହଯୋଗୀ ମାନେ ତାଙ୍କୁ ପୁଣି ଅଟକାଇ ଏକ ଲୁହାରଡ ଓ ଏକ ଭୁଜାଲିରେ ମରଣାନ୍ତକ ଆକ୍ରମଣ କରିଥିଲେ । ଅଭିଯୋଗକାରୀ ଆହତ ହୋଇଥିବା ବେଳେ ସେ ନିଜର ଜୀବନ ବଞ୍ଚାଇ ସେଠାରୁ କୌଶଳ କ୍ରମେ ଖସି ପଳାଇଥିଲେ । ପରେ ଏୟାରଫିଲ୍ଡ ଥାନାକୁ ଯାଇ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଆଜି ଜଣେ ଅଭିଯୁକ୍ତକୁ ଗିରଫ କରିଛି ।
