ରାଷ୍ଟ୍ରପତିଙ୍କୁ ସାକ୍ଷାତ କଲେ ବିଶ୍ୱବିଜୟୀ ମହିଳା କ୍ରିକେଟ ଟିମ୍‌

ନୂଆଦିଲ୍ଲୀ : ଆଇସିସି ମହିଳା କ୍ରିକେଟ ବିଶ୍ୱକପ୍‌ ୨୦୨୫  ଜିତିଥିବା ଭାରତୀୟ ମହିଳା କ୍ରିକେଟ ଦଳର ସଦସ୍ୟମାନେ ଆଜି ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଛନ୍ତି । ରାଷ୍ଟ୍ରପତି ଭାରତୀୟ ମହିଳା କ୍ରିକେଟ ଦଳର ପ୍ରତ୍ୟେକ ସଦସ୍ୟଙ୍କୁ ଅଭିନନ୍ଦନ ଜଣାଇ କହିଛନ୍ତି ଯେ, ସେମାନେ କ୍ରିକେଟ ବିଶ୍ୱକପ୍‌ ଜିତି ଇତିହାସ ସୃଷ୍ଟି କରିଛନ୍ତି । ଦେଶର ପ୍ରତ୍ୟେକ କୋଣ ଅନୁକୋଣ ଏବଂ ବିଦେଶରେ ଲକ୍ଷ ଲକ୍ଷ ଭାରତୀୟମାନେ ଏହି ବିଜୟକୁ ପାଳନ କରୁଛନ୍ତି ।

    ରାଷ୍ଟ୍ରପତି କହିଛନ୍ତି ଯେ, ଏହି ଦଳ ଭାରତକୁ ପ୍ରତିଫଳିତ କରେ । ସେମାନେ ବିଭିନ୍ନ ଅଞ୍ଚଳ, ଭିନ୍ନ ସାମାଜିକ ପୃଷ୍ଠଭୂମି, ଭିନ୍ନ ପରିସ୍ଥିତିକୁ ପ୍ରତିନିଧିତ୍ୱ କରନ୍ତି । କିନ୍ତୁ ସେମାନେ ଗୋଟିଏ ଦଳ ଭାରତ । ଏହା ଭାରତକୁ ପ୍ରଦର୍ଶନ କରେ ।ରାଷ୍ଟ୍ରପତି କହିଛନ୍ତି ଯେ, ସାତ ଥର ବିଶ୍ୱ ଚାମ୍ପିଅନ ଅଷ୍ର୍ଟ୍ରେଲିଆ ଦଳକୁ ପରାସ୍ତ କରି ଦଳ ସମସ୍ତ ଭାରତୀୟଙ୍କ କ୍ଷମତା ଉପରେ ବିଶ୍ୱାସକୁ ମଜଭୁତ କରିଛି । ଏକ କଠିନ ମ୍ୟାଚ୍‌ରେ ଏକ ଶକ୍ତିଶାଳୀ ଦଳ ବିପକ୍ଷରେ ବଡ଼ ବ୍ୟବଧାନରେ ଫାଇନାଲ ମ୍ୟାଚ୍‌ ଜିତିବା ଟିମ୍‌ ଇଣ୍ଡିଆର ଉତ୍କର୍ଷତାର ଏକ ସ୍ମରଣୀୟ ଉଦାହରଣ । ରାଷ୍ଟ୍ରପତି କହିଛନ୍ତି ଯେ ସେମାନେ ଆଦର୍ଶ ପାଲଟିଛନ୍ତି । ଯୁବପିଢ଼ି ବିଶେଷକରି ଝିଅମାନେ, ଜୀବନରେ ଆଗକୁ ବଢ଼ିବା ପାଇଁ ପ୍ରେରଣା ପାଇବେ । ସେ ବିଶ୍ୱାସ ପ୍ରକଟ କରିଥିଲେ ଯେ, ସେମାନେ ଯେଉଁ ଆତ୍ମବିଶ୍ୱାସର ସହିତ ଇତିହାସ ଲେଖିଛନ୍ତି, ସେହି ଆତ୍ମବିଶ୍ୱାସ ସହିତ ସେମାନେ ଭବିଷ୍ୟତରେ ମଧ୍ୟ ଭାରତୀୟ କ୍ରିକେଟକୁ ଶୀର୍ଷରେ ରଖିବେ । ରାଷ୍ଟ୍ରପତି କହିଛନ୍ତି ଯେ, ଦଳର ସଦସ୍ୟମାନେ ଆଶା ଏବଂ ନିରାଶାର ଉତ୍ଥାନ-ପତନ ଅନୁଭବ କରିଥିବେ । କେତେକ ସମୟରେ ସେମାନଙ୍କର ନିଦ ମଧ୍ୟ ହଜିଯାଇଥିବ । କିନ୍ତୁ ସେମାନେ ସମସ୍ତ ଆହ୍ୱାନକୁ ପରାସ୍ତ କରିଥିଲେ । ସେ ଉଲ୍ଲେଖ କରିଥିଲେ ଯେ, ନ୍ୟୁଜିଲ୍ୟାଣ୍ଡ ବିପକ୍ଷରେ ବିଜୟ ପରେ ଲୋକମାନେ ଦୃଢ଼ ଭାବରେ ବିଶ୍ୱାସ କରିଥିଲେ ଯେ ମ୍ୟାଚ୍‌ରେ ଉତ୍ଥାନ-ପତନ ସତ୍ତେ୍ୱ, ଆମର ଝିଅମାନେ ବିଜୟୀ ହେବେ । ସେ ସମସ୍ତଙ୍କର ପ୍ରଶଂସା କରିଥିଲେ - ମୁଖ୍ୟ ପ୍ରଶିକ୍ଷକ, ବୋଲିଂ ପ୍ରଶିକ୍ଷକ, ଫିଲ୍‌ଡିଂ ପ୍ରଶିକ୍ଷକ ଏବଂ ସହାୟକ କର୍ମଚାରୀ । ସେ କାମନା କରିଥିଲେ ଯେ, ସେମାନେ ଏହିପରି ଭବିଷ୍ୟତରେ ସେମାନଙ୍କ ପ୍ରଦର୍ଶନ ସହିତ ଟିମ୍‌ ଇଣ୍ଡିଆ ପାଇଁ ସଫଳତାର ନୂତନ ରେକର୍ଡ ସୃଷ୍ଟି କରିବେ ।