୨୫% ଶୁଳ୍କ ହଟାଇବ ଆମେରିକା! ପାରସ୍ପରିକ ଶୁଳ୍କ ୧୦-୧୫% ହ୍ରାସ ହେବ

ନୂଆଦିଲ୍ଲୀ: ଭାରତ ରୁଷରୁ ତେଲ କିଣିବା ନେଇ ଦଣ୍ଡସ୍ୱରୂପ ଯେଉଁ ଅତିରିକ୍ତ ୨୫% ଶୁଳ୍କ ଆମେରିକା ଭାରତ ଉପରେ ଲଗାଇଛି, ତାକୁ ପ୍ରତ୍ୟାହାର କରିପାରେ ବୋଲି ଭାରତର ମୁଖ୍ୟ ଅର୍ଥନୈତିକ ପରାମର୍ଶଦାତା ଭି. ଅନନ୍ତ ନାଗେଶ୍ୱରନ ଗୁରୁବାର ଦିନ କହିଛନ୍ତି । ସେ ଆଶା କରୁଛନ୍ତି ଯେ ଆମେରିକା ଭାରତୀୟ ସାମଗ୍ରୀ ଉପରେ ଲାଗୁ କରିଥିବା ଦଣ୍ଡ ଶୁଳ୍କକୁ ଖୁବ୍ ଶୀଘ୍ର ପ୍ରତ୍ୟାହାର କରିବ । ଆଗାମୀ ସପ୍ତାହଗୁଡ଼ିକରେ ପାରସ୍ପରିକ ଶୁଳ୍କକୁ ସହଜ କରିବ, ଯାହା ଉଚ୍ଚÿ ଶୁଳ୍କ ଦ୍ୱାରା ପ୍ରଭାବିତ ରପ୍ତାନିକାରୀଙ୍କ ପାଇଁ ଆଶ୍ୱସ୍ତିର ଆଶା ପ୍ରଦାନ କରିବ ।
ନୂଆଦିଲ୍ଲୀରେ ଏକ କାର୍ଯ୍ୟକ୍ରମରେ ଭାଷଣ ଦେଇ ନାଗେଶ୍ୱରନ କହିଛନ୍ତି ଯେ ଅଗଷ୍ଟରେ ୱାଶିଂଟନ ଦ୍ୱାରା ଲାଗୁ ହୋଇଥିବା ୨୫% ଦଣ୍ଡ ଶୁଳ୍କକୁ ନଭେମ୍ବର ଶେଷ ସୁଦ୍ଧା ପ୍ରତ୍ୟାହାର କରାଯାଇପାରେ । ମୁଁ ବିଶ୍ୱାସ କରୁଛି ଯେ ଦଣ୍ଡ ଶୁଳ୍କ ନଭେମ୍ବର ୩୦ ପରେ ରହିବ ନାହିଁ । ଏହା କୌଣସି ଠୋସ୍ ସୂଚକ କିମ୍ବା ପ୍ରମାଣ ଉପରେ ଆଧାରିତ ଏକ ବିବୃତ୍ତି ନୁହେଁ, କିନ୍ତୁ ଏହା ମୋର ଆଶା ଯେ, ସାମ୍ପ୍ରତିକ ଘଟଣାବଳୀକୁ ଦୃଷ୍ଟିରେ ରଖି ମୁଁ ବିଶ୍ୱାସ କରେ ଦଣ୍ଡ ଶୁଳ୍କ ଉପରେ ଆଗାମୀ କିଛି ମାସ ମଧ୍ୟରେ ଏକ ସମାଧାନ ହେବ ଓ  ଆଶା  କରୁଛି ପାରସ୍ପରିକ ଶୁଳ୍କ ମଧ୍ୟ ହ୍ରାସ ପାଇବ ବୋଲି ସେ କହିଛନ୍ତି । ସିଇଏ ସୂଚାଇ ଦେଇଛନ୍ତି ଯେ ପାରସ୍ପରିକ ଶୁଳ୍କ ବର୍ତ୍ତମାନ ୨୫% ରହିଛି, ଯାହା ୧୦-୧୫% ବ୍ୟାଣ୍ଡକୁ ହ୍ରାସ କରାଯାଇପାରେ । ସେ ଆହୁରି କହିଛନ୍ତି ଯେ ସାମଗ୍ରିକ ଶୁଳ୍କ ବିବାଦର ସମାଧାନ ଆଗାମୀ ୮-୧୦ ସପ୍ତାହ ମଧ୍ୟରେ ହୋଇପାରେ ।  ଯଦିଓ ସେ ଜୋର ଦେଇଛନ୍ତି ଯେ ଏହା ତାଙ୍କର ବ୍ୟକ୍ତିଗତ ମୂଲ୍ୟାଙ୍କନ ଓ ଆନୁଷ୍ଠାନିକ ପ୍ରତିଶ୍ରୁତି ଉପରେ ଆଧାରିତ ନୁହେଁ । ଭାରତର ମୁଖ୍ୟ ବାଣିଜ୍ୟ ଆଲୋଚନାକାରୀ, ବାଣିଜ୍ୟ ମନ୍ତ୍ରଣାଳୟର ସ୍ୱତନ୍ତ୍ର ସଚିବ ରାଜେଶ ଅଗ୍ରୱାଲ ନୂଆଦିଲ୍ଲୀରେ ଦକ୍ଷିଣ ଓ ମଧ୍ୟ ଏସିଆ ପାଇଁ ଆମେରିକୀୟ ବାଣିଜ୍ୟ ପ୍ରତିନିଧି ବ୍ରେଣ୍ଡନ ଲିଞ୍ଚଙ୍କ ସହ ସାକ୍ଷାତ କରିବାର କିଛି ଦିନ ପରେ ଏହି ମନ୍ତବ୍ୟ ଆସିଛି । ଗତ ମାସରେ ଟ୍ରମ୍ପ ପ୍ରଶାସନ ଭାରତୀୟ ରପ୍ତାନୀ ଉପରେ ଅଧିକ ଶୁଳ୍କ ଘୋଷଣା କରିବା ପରେ ଏହା ପ୍ରଥମ ମୁହାଁମୁହିଁ ବୈଠକ ଥିଲା । ଯାହା ରୁଷ ସହିତ ଭାରତର ନିରନ୍ତର ଶକ୍ତି ବାଣିଜ୍ୟକୁ ଉଲ୍ଲେଖ କରି କୁହାଯାଇଛି ।
ଦ୍ୱି-ସ୍ତରୀୟ ଶୁଳ୍କ ବ୍ୟବସ୍ଥା କିଛି ଭାରତୀୟ ଉତ୍ପାଦକୁ ୫୦% ପର୍ଯ୍ୟନ୍ତ ଶୁଳ୍କ ଦେବାକୁ ବାଧ୍ୟ କରିଛି, ଯାହା ଶ୍ରମ-ସଘନ କ୍ଷେତ୍ର ଯେପରିକି ବୟନଶିଳ୍ପ, ଇଞ୍ଜିନିୟରିଂ ସାମଗ୍ରୀ ଓ କିଛି ଖାଦ୍ୟ ଉତ୍ପାଦରେ ରପ୍ତାନିକାରୀଙ୍କ ପାଇଁ ମାର୍ଜିନକୁ ସଙ୍କୁଚିତ କରିଛି । ବିଶ୍ଳେଷକମାନେ କୁହନ୍ତି ଯେ ଏକ ରୋଲବ୍ୟାକ୍, ଏପରିକି ଆଂଶିକ, ମୂଲ୍ୟ ଚାପକୁ କମ କରିପାରିବ ଏବଂ ଦ୍ୱିପାକ୍ଷିକ ବାଣିଜ୍ୟରେ ପୂର୍ବାନୁମାନକୁ ପୁନଃସ୍ଥାପିତ କରିପାରିବ ।...