ନଦୀରୁ କମିଲାଣି, ଗାଁ ଏବେବି ଜଳବନ୍ଦୀ

 ଭୁବନେଶ୍ୱର : ନଦୀରେ ଜଳସ୍ତର ହ୍ରାସ ପାଇଛି  । ବିପଦ ସଂକେତ ତଳକୁ ବି ଖସିଗଲାଣି  । ହେଲେ ଗାଁରୁ କିନ୍ତୁ ପାଣି ଛାଡୁନି । ଫଳରେ ବାଲେଶ୍ୱର ଓ ମୟୂରଭଞ୍ଜର କେତେକ ଗାଁ ଏବେବି ଜଳବନ୍ଦୀ ଅବସ୍ଥାରେ ରହିଛନ୍ତି  । ସେପଟେ ବିଡ଼ିଓ ଓ ତହସିଲଦାରଙ୍କ ଭଳି ଅଫିସରମାନେ ଛୁଟିରେ ରହିଥିବାରୁ ଲୋକମାନେ ଏବେ ଦହଗଞ୍ଜ ହେଉଛନ୍ତି  । ସେହିପରି ପର୍ଯ୍ୟାପ୍ତ ପରିମାଣର ରିଲିଫ ମିଳିନଥିବାରୁ ଜନ ଅସନ୍ତୋଷ ବି ପ୍ରକାଶ ପାଇଛି  ।
ମିଳିଥିବା ସୂଚନାନୁସାରେ, ବାଲେଶ୍ୱରର ଭୋଗରାଇ, ଜଳେଶ୍ୱର, ବସ୍ତା ଓ ବାଲିଆପାଳ ବ୍ଳକର ଶହ ଶହ ଗାଁରେ ଲୋକଙ୍କ ଦୁର୍ଦ୍ଦଶା ବଢ଼ିଯାଇଛି  । ଗାଁ ମଝିରେ ବି ଆଣ୍ଠୁଏ ପାଣି  । ଘର ଭିତରେ ବି ପାଣି ପଶିଯାଇଛି  । ଅନେକ ସ୍ଥାନରେ ରାସ୍ତା ଘାଟ ବି ଭାଙ୍ଗିଯାଇଛି  । ବିଶେଷକରି ପିଇବା ପାଣି ମୁନେ୍ଦ ଠିକରେ ମିଳିପାରୁନାହିଁ  । ମହିଳାମାନେ ଅଣ୍ଟାଏ ପାଣିରେ ଅନ୍ୟସ୍ଥାନରୁ ପିଇବା ପାଣି ଆଣିବାକୁ ବାଧ୍ୟ ହେଉଛନ୍ତି  । ରାସ୍ତାରେ ଘାଇ ସୃଷ୍ଟି ହୋଇଥିବାରୁ କେତେକ ସ୍ଥାନରେ ଯୋଗାଯୋଗ ବିଚ୍ଛିନ୍ନ ହୋଇଯାଇଛି  ।
ଏନେଇ ଭୋଗରାଇ ବିଧାୟକ ଗୌତମବୁଦ୍ଧ ଦାସ କହିଛନ୍ତିଯେ, ଗାଁରେ ଏବେ ପାଣି ଛାଡ଼ିନାହିଁ  । ନଦୀରେ କିନ୍ତୁ ଜଳସ୍ତର କମିଥିବାରୁ ଟିକେ ଆଶ୍ୱସ୍ତି ମିଳିଛି  । ଅନେକ ଗାଁ ଏବେ ଜଳବନ୍ଦୀ ଅବସ୍ଥାରେ ରହିଛି  । ପ୍ରଶାସନ ପକ୍ଷରୁ ଯେଉଁ ରିଲିଫ ଦିଆଯାଉଛି ତାହା ସମୁଦ୍ରକୁ ଶଙ୍ଖେ ଭଳି  । ଶୁଖିଲା ଖାଦ୍ୟ, ଗୋଖାଦ୍ୟର ତୁରନ୍ତ ବ୍ୟବସ୍ଥା କରିବାକୁ ସେ ଦାବି କରିଛନ୍ତି  । ଓଡ଼ିଶାରେ ଏବେ ଦକ୍ଷିଣ ପଶ୍ଚିମ ମୌସୁମୀ ବାୟୁ ସକ୍ରିୟ ରହିଛି  । ଫଳରେ ଆସନ୍ତା ୫ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେବାର ସମ୍ଭାବନା ଅଛି  । ଆଜି ସମ୍ବଲପୁର, ସୁନ୍ଦରଗଡ଼, କୋରାପୁଟ, ମାଲକାନଗିରି, କଳାହାଣ୍ଡି, ମୟୂରଭଞ୍ଜ, କେନ୍ଦୁଝର ଓ ନବରଙ୍ଗପୁରରେ ହାଲକାରୁ ମଧ୍ୟମ ଧରଣର ବର୍ଷା ହୋଇଛି  । ପାଣିପାଗ ବିଭାଗର ଆକଳନ ଅନୁଯାୟୀ, ଆସନ୍ତାକାଲି ମୟୂରଭଞ୍ଜ, କେନ୍ଦୁଝର ଓ ସୁନ୍ଦରଗଡ଼ ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବା ସହ ୩୦ରୁ ୪୦ କିମି ବେଗରେ ଝଟକା ପବନ ବହିବ  । ସେଥିପାଇଁ ଉକ୍ତ ୩ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି  । ଅପରପକ୍ଷରେ ଦେବଗଡ଼, ସମ୍ବଲପୁର, ଅନୁଗୁଳ, ଢେଙ୍କାନାଳ, ବରଗଡ଼ରେ ପ୍ରବଳ ବର୍ଷାର ସମ୍ଭାବନା ଥିବାରୁ ୟେଲୋ ୱାର୍ଣ୍ଣିଂ ଜାରିହୋଇଛି  ।