ବାରଣାସୀରୁ ଗଡ଼ିଲା ୪ ନୂଆ ବନ୍ଦେ ଭାରତ

    ଦ୍ରୁତ ବିକାଶ ପଥରେ ବଢୁଛି ଦେଶ: ମୋଦି  

ବାରଣାସୀ : ଭାରତର ଆଧୁନିକ ରେଳ ଭିତ୍ତିଭୂମିକୁ ବିସ୍ତାର କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ ପ୍ରଧାନମନ୍ତ୍ରୀ  ନରେନ୍ଦ୍ର ମୋଦୀ ଆଜି ଉତ୍ତର ପ୍ରଦେଶର ବାରଣାସୀରୁ ଚାରୋଟି ନୂତନ ବନ୍ଦେ ଭାରତ ଏକ୍ସପ୍ରେସ ଟ୍ରେନକୁ ପତାକା ଦେଖାଇ ଶୁଭାରମ୍ଭ କରିଛନ୍ତି । ଏହି ଅବସରରେ ଉପସ୍ଥିତ ଜନତାଙ୍କୁ ସମ୍ବୋଧିତ କରି ମୋସି ସମସ୍ତ ସମ୍ମାନନୀୟ ବ୍ୟକ୍ତିଙ୍କୁ ସ୍ୱାଗତ କରିଥିଲେ ଏବଂ ବାବା ବିଶ୍ୱନାଥଙ୍କ ପବିତ୍ର ନଗରୀ ବାରଣାସୀର ସମସ୍ତ ପରିବାରକୁ ତାଙ୍କର ଶୁଭେଚ୍ଛା ଜଣାଇଥିଲେ । ସେ ଦେବ ଦୀପାବଳି ଉତ୍ସବ ବିଷୟରେ ମତାମତ ଦେଇଥିଲେ । ବିକାଶର ଏହି ପର୍ବ ପାଇଁ ସମସ୍ତଙ୍କୁ ଶୁଭକାମନା ଜଣାଇଥିଲେ ।

       ବିଶ୍ୱର ବିକଶିତ ରାଷ୍ଟ୍ରଗୁଡ଼ିକରେ, ଆର୍ଥିକ ଅଭିବୃଦ୍ଧିର ଏକ ପ୍ରମୁଖ ବାହକ ହେଉଛି ଦୃଢ଼ ଭିତ୍ତିଭୂମି । ପ୍ରତ୍ୟେକ ଦେଶରେ ଯେଉଁମାନେ ଉଲ୍ଲେଖନୀୟ ପ୍ରଗତି ଏବଂ ବିକାଶ ହାସଲ କରିଛନ୍ତି, ଭିତ୍ତିଭୂମି ଉନ୍ନତି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ସେ କହିଥିଲେ ଯେ ଭାରତ ମଧ୍ୟ ଏହି ପଥରେ ଦ୍ରୁତ ଗତିରେ ଆଗକୁ ବଢ଼ୁଛି । ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ଦେଶର ବିଭିନ୍ନ ଅଞ୍ଚଳରେ ନୂତନ ବନ୍ଦେ ଭାରତ ଟ୍ରେନ ଆରମ୍ଭ କରିବା ଘୋଷଣା କରିଥିଲେ । ବନାରସ-ଖଜୁରାହୋ ବନ୍ଦେ ଭାରତ ବ୍ୟତୀତ ସେ ଫିରୋଜପୁର-ଦିଲ୍ଲୀ ବନ୍ଦେ ଭାରତ, ଲକ୍ଷେ୍ନ-ସହାରନପୁର ବନ୍ଦେ ଭାରତ ଏବଂ ଏର୍ଣ୍ଣାକୁଲମ-ବେଙ୍ଗାଲୁରୁ ବନ୍ଦେ ଭାରତକୁ ପତାକା ଦେଖାଇ ଶୁଭାରମ୍ଭ କରିଥିଲେ । ଏହି ଚାରୋଟି ନୂତନ ଟ୍ରେନ ସହିତ ଦେଶରେ ମୋଟ କାର୍ଯ୍ୟକ୍ଷମ ବନ୍ଦେ ଭାରତ ଟ୍ରେନ ସଂଖ୍ୟା ଏବେ ୧୬୦ ଅତିକ୍ରମ କରିଛି । ବନ୍ଦେ ଭାରତ, ନମୋ ଭାରତ ଏବଂ ଅମୃତ ଭାରତ ଭଳି ଟ୍ରେନଗୁଡ଼ିକ ଭାରତୀୟ ରେଳବାଇର ପରବର୍ତ୍ତୀ ପିଢ଼ି ପାଇଁ ମୂଳଦୁଆ ସ୍ଥାପନ କରୁଛି ବୋଲି ସେ କହିଥିଲେ । ସେ ପ୍ରୟାଗରାଜ, ଅଯୋଧ୍ୟା, ହରିଦ୍ୱାର, ଚିତ୍ରକୂଟ ଏବଂ କୁରୁକ୍ଷେତ୍ରକୁ ଦେଶର ଐତିହ୍ୟର ଆଧ୍ୟାତ୍ମିକ କେନ୍ଦ୍ର ଭାବରେ ଉଲ୍ଲେଖ କରିଥିଲେ । ଏହି ପବିତ୍ର ସ୍ଥଳଗୁଡ଼ିକ ବର୍ତ୍ତମାନ ବନ୍ଦେ ଭାରତ ନେଟୱାର୍କ ମାଧ୍ୟମରେ ସଂଯୁକ୍ତ ହେଉଛି; ଏହା ଭାରତର ସଂସ୍କୃତି, ବିଶ୍ୱାସ ଏବଂ ବିକାଶ ଯାତ୍ରାର ଏକ ସମନ୍ୱୟକୁ ଚିହ୍ନିତ କରେ ।

     ବାରଣାସୀରେ ସ୍ୱାସ୍ଥ୍ୟସେବା ଉନ୍ନତ କରିବା ପାଇଁ ସରକାର ନିରନ୍ତର କାର୍ଯ୍ୟ କରୁଛି ବୋଲି କହିଥିଲେ । ସେ ବନ୍ଦେ ଭାରତ ଟ୍ରେନର ଶୁଭାରମ୍ଭ ସମୟରେ ଛାତ୍ରଛାତ୍ରୀମାନଙ୍କ ମଧ୍ୟରେ ପ୍ରତିଯୋଗିତା ଆୟୋଜନ କରିବା ପାଇଁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ପ୍ରଶଂସା କରିଥିଲେ । ଏହି କାର୍ଯ୍ୟକ୍ରମରେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ  ଯୋଗୀ ଆଦିତ୍ୟନାଥ, କେନ୍ଦ୍ରମନ୍ତ୍ରୀଅଶ୍ୱିନୀ ବୈଷ୍ଣବ ପ୍ରମୁଖ ଉପସ୍ଥିତ ଥିଲେ । କେରଳର ରାଜ୍ୟପାଳ ରାଜେନ୍ଦ୍ର ଆର୍ଲେକର, କେନ୍ଦ୍ର ମନ୍ତ୍ରୀ  ସୁରେଶ ଗୋପୀ, ଜର୍ଜ କୁରିଆନ୍‌, ରଭନୀତ ସିଂହ ବିଟ୍ଟୁ ଏବଂ ଅନ୍ୟାନ୍ୟ ସମ୍ମାନିତ ବ୍ୟକ୍ତିମାନେ ଭିଡିଓ କନଫରେନ୍ସିଂ ମାଧ୍ୟମରେ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ ।