ଯୁବତୀଙ୍କୁ ଆକ୍ରମଣ; ୨ ଅଭିଯୁକ୍ତ ଗିରଫ
Jitendra Sahu
ଭୁବନେଶ୍ୱର,୪ା୧୨ : ଘରେ ଭଡ଼ା ରହୁଥିବା ଜଣେ ଯୁବତୀଙ୍କୁ ଆକ୍ରମଣ କରି ଲହୁଲୁହାଣ କରିଥିବା ଅଭିଯୋଗରେ ଖାରବେଳନଗର ଥାନା ପୁଲିସ ଘର ମାଲିକଙ୍କ ଦୁଇ ପୁଅକୁ ବୁଧବାର ଗିରଫ କରି କୋର୍ଟ ଚାଲାଣ କରିଛି । ଗିରଫ ଦୁଇ ଅଭିଯୁକ୍ତ ହେଉଛନ୍ତି ସ୍ଥାନୀୟ ଥାନା ଅନ୍ତର୍ଗତ ୟୁନିଟ ୩ ପ୍ଲଟ ନଂ ୨୨ର ପ୍ରକାଶ ପ୍ରଧାନ (୨୨) ଓ ପ୍ରଦୁମ୍ନ ପ୍ରଧାନ (୪୨) ।
ସୂଚନା ଅନୁଯାୟୀ, ଅଭିଯୋଗକାରିଣୀ ଖାରବେଳନଗର ଥାନା ଅଧିନସ୍ଥ ପ୍ଲଟ ନଂ ୨୨ରେ ଥିବା ପ୍ରଫୁଲ୍ଲ ପ୍ରଧାନଙ୍କ ଘରେ ଗତ ୨ ବର୍ଷ ହେବ ଭଡ଼ାରେ ରହି ଆସୁଥିଲେ । ଉକ୍ତ ହଷ୍ଟେଲରେ ରହଣି ସମୟରେ ପ୍ରଫୁଲ୍ଲ ଓ ଅଭିଯୋଗକାରିଣୀଙ୍କ ମଧ୍ୟରେ କୌଣସି କଥାକୁ ନେଇ ଗଣ୍ଡଗୋଳ ହୋଇଥିଲା । ଏନେଇ ଉଭୟଙ୍କ ନାମରେ ଖାରବେଳନଗର ଥାନାରେ ମାମଲା ମଧ୍ୟ ରୁଜୁ ହୋଇଛି । ଏହି ପୂର୍ବ ଗଣ୍ଡଗୋଳକୁ ନେଇ ମଙ୍ଗଳବାର ପ୍ରଫୁଲ୍ଲଙ୍କ ଦୁଇ ପୁଅ ପ୍ରଦୁମ୍ନ ଓ ପ୍ରକାଶ ଅଭିଯୋଗକାରିଣୀଙ୍କୁ ଖରାପ ଭାଷାରେ ଗାଲିଗୁଲଜ କରିବା ସହ ମରଣାନ୍ତକ ଆକ୍ରମଣ କରିଥିଲା । ଏନେଇ ଖାରବେଳନଗର ଥାନାରେ ଅଭିଯୋଗ ହେବା ପରେ ପୁଲିସ ମାମଲା ରୁଜୁ କରି ଆଜି ଅଭିଯୁକ୍ତ ଦ୍ୱୟଙ୍କୁ ଗିରଫ କରିଛି ।
