ବିଜେଡ଼ିକୁ ଏବେ ଅରୁଣ ଭରସା
Arun kumar Sahu, Biju Janata Dal
Ramachandi Prasad
ଦିନେ ଅରୁଣ ସାହୁଙ୍କ ସାଙ୍ଗଠନିକ ଦକ୍ଷତା ଓ ଲୋକପ୍ରିୟତା ଅନ୍ୟ ଦଳର ନେତାଙ୍କୁ ବିଚଳିତ କରିଦେଉଥିଲା । ଧର୍ମେନ୍ଦ୍ର ପ୍ରଧାନ ଓ ଲୁଲୁ ମହାପାତ୍ରଙ୍କ ଭଳି ନେତାମାନେ ମଧ୍ୟ ଅରୁଣଙ୍କୁ ବାହାବା ଦେଉଥିଲେ । ବିଜୁ ଜନତା ଦଳରେ ବି ଗୋଟିଏ ସମୟରେ ତାଙ୍କର ଢେର କାଟତି ଥିଲା । ଛାତ୍ର ଜନତା ଦଳର ସଭାପତି ଭାବେ ସାରା ରାଜ୍ୟରେ ତାଙ୍କର ପରିଚୟ ବି ଥିଲା । ପ୍ୟାରୀମୋହନ ମହାପାତ୍ରଙ୍କ ଅମଳରେ ଅରୁଣ ସାହୁ, ଅତନୁ ସବ୍ୟସାଚୀ ନାୟକ ଓ ସଂଜୟ ଦାସବର୍ମା ବେଶ୍ ଦବଦବା ଜାହିର କରୁଥିଲେ । ଛାତ୍ର ଓ ଯୁବ ସଂଗଠନ ସେମାନଙ୍କ ହାତରେ ହିଁ ରହିଥିଲା । ପ୍ୟାରୀଙ୍କ ପରେ ବିଜେଡ଼ିରେ କଳ୍ପତରୁ ଦାସ ପାୱାରଫୁଲ୍ ହୋଇଯାଇଥିଲେ । ସେତେବେଳେ ବି ଅରୁଣଙ୍କୁ ଗୁରୁତ୍ୱ ମିଳୁଥିଲା । କିନ୍ତୁ ପରେପରେ ବିଜେଡ଼ିରେ ହଠାତ୍ ବବି ଦାସଙ୍କର ଶକ୍ତି ବଢ଼ିଥିଲା । ଦଳର ସାଂଗଠନିକ ସମ୍ପାଦକ ହେବାପରେ ଅତନୁ, ସଂଜୟ ଓ ଅରୁଣ ନିଷ୍ପ୍ରଭ ହୋଇଯାଇଥିଲେ । ଗାଏମୋଟ କହିଲେ ବବି ଆସିବା ପରେ ସଂଜୟ, ଅତନୁ ଓ ଅରୁଣଙ୍କର ଆଉ ଦଳରେ କାଟତି ରହିଲାନି । କିନ୍ତୁ ଚବିଶ ପରେ ବିଜେଡ଼ି ରାଜନୀତିର ଦୃଶ୍ୟପଟ୍ଟ ବଦଳିଯାଇଛି । ବବି ଦାସ, ଅତନୁ ସବ୍ୟସାଚୀ ଓ ସଂଜୟ ଦାସବର୍ମା ନିର୍ବାଚନରେ ପରାସ୍ତ ହୋଇଛନ୍ତି । ଏବେ ବିଧାନସଭାରେ ବିଜେଡ଼ିର ତରୁଣ ତୁର୍କଙ୍କ ମଧ୍ୟରେ କେବଳ ଅରୁଣ ହିଁ ଅଛନ୍ତି । ଗତ ବିଧାନସଭା ଅଧିବେଶନରେ ଅରୁଣ ହିଁ ସବୁ କ୍ଷେତ୍ରରେ ଆଗୁଆ ରହିଥିଲେ । ଦଳ ତାଙ୍କୁ ହିଁ ଆଗକୁ ଛାଡ଼ିଥିଲା । ଶୂନ୍ୟକାଳରେ ଅରୁଣ ହିଁ ପ୍ରଥମେ ପ୍ରସଙ୍ଗ ଉଠାଇ ସରକାରଙ୍କୁ ଘେରୁଥିଲେ । ବଜେଟ ଆଲୋଚନା ବେଳେ ଅରୁଣଙ୍କ ହିଁ ପ୍ରଥମେ ସୁଯୋଗ ମିଳୁଥିଲା । ଅର୍ଥାତ୍ ଏବେ ଅରୁଣଙ୍କର ଦବଦବା ବିଜେଡ଼ିରେ ଢେର ବଢ଼ିଯାଇଛି । ଆଗାମୀ ଦିନରେ ନବୀନ ତାଙ୍କର ନୂଆ ଟିମ୍ ଗଢ଼ିବାକୁ ଯାଉଛନ୍ତି । ବବି ଦାସଙ୍କ ଉପରେ ଆଉ ନବୀନଙ୍କର ଆଗଭଳି ଆସ୍ଥା ନାହିଁ । ତେଣୁ ଅରୁଣଙ୍କୁ ବଡ଼ ଦାୟିତ୍ୱ ମିଳିବ ବୋଲି ଜାଣିବାକୁ ମିଳିଛି ।
