କାହିଁକି ଘାଟାରେ ପଡ଼ିଲା ବିଜେଡ଼ି ?
ElectionResult
Rasmita Behera
ଭୁବନେଶ୍ୱର : ଓଡ଼ିଶାରେ ମୋଦିଙ୍କ ଲହର ୨୦୧୯ରୁ ଅଛି । ମୋଦିଙ୍କ ପାଇଁ ବିଜେପି ଭୋଟ୍ ଆଶାତୀତ ଭାବେ ବୃଦ୍ଧି ପାଇଥିଲା । କିନ୍ତୁ ତାହାର ପ୍ରଭାବ ଓଡ଼ିଶା ବିଧାନସଭା ନିର୍ବାଚନ ଉପରେ ପଡ଼ିନଥିଲା । କାହିଁକିନା ଓଡ଼ିଶାବାସୀ ଦୁଇ ପ୍ରକାର ଭୋଟ ଦେଉଥିଲେ । ନବୀନ ପଟ୍ଟନାୟକଙ୍କ ପାଇଁ ଶଙ୍ଖ ଚିହ୍ନକୁ ଓ ନରେନ୍ଦ୍ର ମୋଦିଙ୍କ ପାଇଁ ପଦ୍ମଫୁଲକୁ ଭୋଟ ଯାଉଥିଲା । ଗଲାଥର ଏଭଳି ଭୋଟ ଯିବାରୁ ବିଜେଡ଼ି ବିଧାନସଭାରେ ଏକପାଖିଆ ବିଜୟ ହାସଲ କରିଥିଲା । ଯେତେବେଳେକି ବିଜେପି ଲୋକସଭାରେ ଭଲ ସଫଳତା ପାଇଥିଲେବି ବିଧାନସଭାରେ ପ୍ରଦର୍ଶନ ସେତେଟା ଆଖିଦୃଶିଆ ନଥିଲା । ଗତ ୨୦୧୯ରେ ବିଜେପିର ଲୋକସଭା ଭୋଟକୁ ଅନୁଶୀଳନ କଲେ ପ୍ରାୟ ୫୪ଟି ବିଧାନସଭା ଆସନରେ ବିଜେଡ଼ିକୁ ବିଜେପି ପଛରେ ପକାଇ ଦେଇଥିଲା । ଅର୍ଥାତ ୨୦୧୯ରେ ଯଦି ଲୋକସଭା ଭୋଟ ଭଳି ବିଧାନସଭା ଭୋଟ ବି ପଦ୍ମଫୁଲ ପାଇଥା’ନ୍ତା ତେବେ ୫୪ ଆସନରେ ବିଜେପି ବାଜିମାତ୍ କରିଥା’ନ୍ତା । କିନ୍ତୁ ଏଥର ଆଉ ପୂର୍ବଭଳି ସ୍ପ୍ଳିଟ ଭୋଟିଂ ବା ଖଣ୍ଡେ ଭୋଟ ଶଙ୍ଖ, ଖଣ୍ଡେ ଭୋଟ ଫୁଲକୁ ଗଲାନାହିଁ । ଅର୍ଥାତ ଲୋକମାନେ ଯୋଡ଼ି ଶଙ୍ଖ ଓ ଯୋଡ଼ି ଫୁଲକୁ ହିଁ ଭୋଟ ଦେଇଥିଲେ । ଯାହାର ପ୍ରତିଫଳନ ଚବିଶ ନିର୍ବାଚନରେ ଦେଖିବାକୁ ମିଳିଛି । ମୋଦିଙ୍କ ହାୱା ଓ ସରକାରୀ ବିରୋଧୀ ହାୱାର ଭୋଟ ସବୁ ଯୋଡ଼ି ଫୁଲକୁ ଯାଇଛି । ଯାହାଫଳରେ ବିଜେପି ଏକପାଖିଆ ଭାବେ ଲୋକସଭା ନିର୍ବାଚନରେ ବାଜିମାତ କରିବା ସହ ବିଧାନସଭାରେ ବି ଦମଦାର ପ୍ରଦର୍ଶନ କରିବାରେ ସଫଳ ହୋଇଛି ।
