ଭୋଟ୍‌ ବଢ଼ାଇବ କି ଭକ୍ତଙ୍କ ରଣନୀତି ?

ଭୁବନେଶ୍ୱର : କଂଗ୍ରେସିଆଙ୍କ ମନରେ ଫୁଲ୍‌ ଯୋଶ୍‌ ଭରି ଦେଇଛନ୍ତି ପିସିସି ସଭାପତି ଭକ୍ତ ଚରଣ ଦାସ  । ଦାୟିତ୍ୱ ନେବା ମାତ୍ରେ ସେ ଆକ୍ରମଣାତ୍ମକ ଆଭିମୁଖ୍ୟ ପୋଷଣ କରିଛନ୍ତି  । ବ୍ଳକରୁ ନେଇ ବିଧାନସଭା ପର୍ଯ୍ୟନ୍ତ କଂଗ୍ରେସ ଚଳଚଞ୍ଚଳ ହୋଇଯାଇଛି  । ଗଣମାଧ୍ୟମର ଶିରୋନାମାରେ ଏବେ କଂଗ୍ରେସ ହିଁ ରହିଛି  । ଗୋଟିଏ ପଟେ ମୁଖ୍ୟ ବିରୋଧୀ ଦଳ ବିଜେଡ଼ି ଦୋଛକିରେ ଥିବାରୁ ଏହାର ଫାଇଦା ନେଇଛି କଂଗ୍ରେସ  । କମ୍‌ ସଂଖ୍ୟା ସତ୍ତେ୍ୱ ବିଧାନସଭାରେ ବି ଦଳ ଭଲ ସ୍କୋର କରିଛି କହିଲେ ଅତ୍ୟୁକ୍ତି ହେବନି  । ସେପଟେ ନିଆରା ଢଙ୍ଗରେ କଂଗ୍ରେସର ଯୁବ ଓ ଛାତ୍ର ୟୁନିଟ୍‌ ମଧ୍ୟ ପ୍ରତିବାଦ, ବିକ୍ଷୋଭ ଆରମ୍ଭ କରିଦେଇଛି  । ତଥାପିବି କଂଗ୍ରେସର ଭୋଟ୍‌ ବଢ଼ିବ କି ନାହିଁ ସେନେଇ ସଂଶୟ ସୃଷ୍ଟି ହୋଇଛି  ।
୨୦୦୦ରୁ କ୍ଷମତାର ସ୍ୱାଦ ଚାଖି ପାରିନାହିଁ କଂଗ୍ରେସ  । ଦଳର ସ୍ଥିତି ପ୍ରତି ନିର୍ବାଚନରେ ତଳକୁ ତଳ ଚାଲିଛି  । କଂଗ୍ରେସର ସଂଗଠନ ବି ଘୁଣ ଖାଇଯାଇଛି  । ଗତ ନିର୍ବାଚନରେ କଂଗ୍ରେସ ପୂର୍ବାପେକ୍ଷା ଭଲ ଆସନ ପାଇଥିଲେବି ଭୋଟ୍‌ ହାର କିନ୍ତୁ ନୈରାଶ୍ୟଜନକ ରହିଛି  । ଦଳର ଭୋଟ୍‌ ହାର ଏବେ ୧୩.୨୬% ଥିବାବେଳେ ଭୋଟ୍‌ ୩୪ ଲକ୍ଷରୁ କମ୍‌ ଅଛି  । ଶାସକ ବିଜେପି ଓ ବିଜେଡ଼ିର ଭୋଟ୍‌ ହାର ୪୦% ଥିବାବେଳେ ତୃତୀୟ ଦଳ ଭାବେ ବହୁ ପଛକୁ ଠେଲି ହୋଇଯାଇଛି କଂଗ୍ରେସ  । ଗତ ନିର୍ବାଚନରେ ଦଳ ଶତାଧିକ ଆସନରେ ଅମାନତ ବି ହରାଇଥିଲା  । ଏଭଳି ସ୍ଥିତିରେ ଭକ୍ତ ଦାସଙ୍କ ଉପରେ ଭରସା କରିଛନ୍ତି ରାହୁଲ ଗାନ୍ଧୀ  ।
ଗତ ଫେବୃଆରୀ ୧୧ରେ ଭକ୍ତଙ୍କୁ ପିସିସି ସଭାପତି ଭାବେ ନିଯୁକ୍ତି ମିଳିଥିଲା  । ଏହାର ସାତ ଦିନ ପରେ ଦିଲ୍ଲୀରୁ ଭକ୍ତ ଓଡ଼ିଶା ଫେରିଥିଲେ  ।  ଭଙ୍ଗା ହାତରେ ସେ ତିନି ଦିନ ଧରି ସଂକଳ୍ପ ଯାତ୍ରାରେ ବାହାରିଥିଲେ  । ଖାଲି ସେତିକିନୁହେଁ ସବୁ ନେତାଙ୍କ ଉପରୁ ସେ ବହିଷ୍କାର ଓ ନିଲମ୍ବନ ଆଦେଶ ବି ଉଠାଇ ଦେଇଥିଲେ  । 
ଭକ୍ତ ଇତିମଧ୍ୟରେ ବରିଷ୍ଠ ନେତାମାନଙ୍କୁ ନେଇ ବେଶ୍‌ କେଇ ଦଫା ଆଲୋଚନା କରିସାରିଛନ୍ତି  । କିନ୍ତୁ ଦେଢ଼ ମାସ ପରେ ବି ସେ ନିଜର ନୂଆ ଟିମ୍‌ ଗଢ଼ି ପାରିନାହାନ୍ତି  ।  ପିସିସି ସଭାପତିମାନେ ନୂଆ ଟିମ୍‌ ଗଢ଼ିବା ପରେ ହିଁ ଦଳରେ ଗୋଷ୍ଠୀକନ୍ଦଳ ଜୋର ହୋଇଥାଏ  । ତେବେ ଭକ୍ତଙ୍କ କାର୍ଯ୍ୟକାଳ ପ୍ରାୟ ଦେଢ଼ ମାସ ହୋଇଥିଲେବି କୌଣସି ଆଗଧାଡ଼ିର ନେତା ତାଙ୍କ ଉପରେ ନକରାତ୍ମକ ଟିପ୍ପଣୀ ଦେଇନାହାନ୍ତି  । ପ୍ରତିଦିନ ସେ ବିଧାୟକ ଦଳ ସହ ଆଲୋଚନା କରୁଛନ୍ତି  । ଗତ ମାର୍ଚ୍ଚ ୭ରୁ କଂଗ୍ରେସ ନାରୀ ସୁରକ୍ଷା ପ୍ରସଙ୍ଗକୁ କାନ୍ଧେଇ ବିଧାନସଭାରେ ହଟ୍ଟଗୋଳ କରୁଛି  । ଯେଉଁଥିପାଇଁ ପ୍ରଥମେ ତାରା ବାହିନୀପତି ୭ ଦିନ ପାଇଁ ନିଲମ୍ବିତ ହୋଇଥିବାବେଳେ ଏବେ ଆଉ ୧୨ ବିଧାୟକଙ୍କୁ ନିଲମ୍ବନ କରାଯାଇଛି  । ରାଜନୀତିକ ଦୃଷ୍ଟିକୋଣରୁ ଏହା କଂଗ୍ରେସକୁ ମାଇଲେଜ୍‌ ଦେଇଛି ବୋଲି କୁହାଯାଇପାରିବ  । ଆଗାମୀ ୨୭ରେ ଭକ୍ତ ବିଧାନସଭା ଘେରାଉର ଡାକରା ଦେଇଛନ୍ତି  । ସେପଟେ ଯୁବ ଓ ଛାତ୍ର କଂଗ୍ରେସ ମଧ୍ୟ ବିଭିନ୍ନ ପ୍ରସଙ୍ଗରେ ଅଭିନବ ବିକ୍ଷୋଭ ଓ ପ୍ରତିବାଦ କରୁଥିବା ଦେଖିବାକୁ ମିଳୁଛି  ।
ଗାଏମୋଟ୍‌ କହିଲେ ଭକ୍ତଙ୍କ କଂଗ୍ରେସ ସିନେମାର ଟିଜର ଭଲ ହୋଇଛି  । ତେବେ ଅନେକ ସମୟରେ ଟିଜର ଓ ଟ୍ରେଲରର କ୍ରେଜ୍‌ ଥିଲେବି ସିନେମା କିନ୍ତୁ ବକ୍ସ ଅଫିସରେ ପିଟି ହୋଇଯିବାର ନଜିର ରହିଛି  । ଭକ୍ତଙ୍କ ଏଭଳି ଆକ୍ରମଣାତ୍ମକ ରଣନୀତି ଏବେ ରାଜଧାନୀ ଓ ଗଣମାଧ୍ୟମରେ ହିଁ ସୀମିତ ରହିଛି  । ଏହାଦ୍ୱାରା ଭୋଟ୍‌ କେତେ ବଢ଼ିବ ତାହା ଉପରେ ହିଁ କଂଗ୍ରେସର ଭବିଷ୍ୟତ ନିର୍ଭର କରେ  ।