ପୁଣି କୃଷକଙ୍କ ଦିଲ୍ଲୀ ଚଲୋ ଡାକରା, ସୀମାରେ କଡା ସୁରକ୍ଷା

ପୁଣି ରାସ୍ତାକୁ ଓହ୍ଲାଇଲେ କୃଷକ। ଦେଲେ ଦିଲ୍ଲୀ ଚଲୋ ଡାକରା। ହଜାର ହଜାର ସଂଖ୍ୟାରେ କୃଷକ ନିଜ ଦାବି ନେଇ ଆଜି ଦିଲ୍ଲୀ ଅଭିମୁଖେ ଯାତ୍ରା କରିଛନ୍ତି। ନଭେମ୍ବର ୨୭ରେ, କୃଷକମାନେ ଗ୍ରେଟର ନୋଏଡା ପ୍ରାଧିକରଣରେ ବିକ୍ଷୋଭ ପ୍ରଦର୍ଶନ କରିଥିଲେ ଏବଂ ପରେ ନଭେମ୍ବର ୨୮ରୁ ଡିସେମ୍ବର ୧ପର୍ଯ୍ୟନ୍ତ ସେମାନେ ଯମୁନା ପ୍ରାଧିକରଣରେ ବିକ୍ଷୋଭ ପ୍ରଦର୍ଶନ କରିଥିଲେ।

ଆଜି ତୃତୀୟ ତଥା ଶେଷ ପର୍ଯ୍ୟାୟ। ସଂସଦ ଅଧିବେଶନ ଚାଲିଥିବା ବେଳେ ଆଜି କୃଷକମାନେ ଦିଲ୍ଲୀ ଅଭିମୁଖେ ଯାତ୍ରା କରିଛନ୍ତି। ବିରୋଧୀ କୃଷକମାନେ ପ୍ରଥମେ ମଧ୍ୟାହ୍ନ ୧୨ଟାରୁ ମହାମାୟା ଫ୍ଲାଏଓଭର ନିକଟରେ ଏକାଠି ହେବେ ଏହାପରେ ଟ୍ରାକ୍ଟରରେ ଦିଲ୍ଲୀ ଅଭିମୁଖେ ଯାତ୍ରା କରିବେ। ଚାଷୀଙ୍କୁ ଅଟକାଇବା ପାଇଁ ଦିଲ୍ଲୀ ସୀମାରେ ପୁଲିସ କଡା ସୁରକ୍ଷା ବ୍ୟବସ୍ଥା କରିଛି। ବ୍ୟାପକ ବ୍ୟାରିକେଡ୍‌ ଲଗାଯାଇଛି। ଦିଲ୍ଲୀ ପୁଲିସ ଏବଂ ଗୌତମ ବୁଦ୍ଧ ନାଗର ପୁଲିସ ଯାଞ୍ଚ କରୁଛନ୍ତି। ଚାଷୀଙ୍କୁ ଦିଲ୍ଲୀରେ ପ୍ରବେଶ କରିବା ପାଇଁ ଅଟକାଯାଇଛି। ଏଥିପାଇଁ ଦିଲ୍ଲୀରୁ ନୋଏଡା ଯିବା ଆସିବା କରୁଥିବା ଯାତ୍ରୀଙ୍କ ପାଇଁ ଅନେକ ରୁଟ୍‌ ଡାଇଭର୍ଟ କରାଯାଇଛି।  ଏଥର କୃଷକମାନେ ସେମାନଙ୍କ ଦାବି ପାଇଁ ଆର୍‌-ପାର୍‌ ସ୍ଥିତିରେ ଅଛନ୍ତି। ଗୌତମ ବୁଦ୍ଧ ନାଗର, ବୁଲନ୍ଦଶାହର, ଆଲିଗଡ, ଆଗ୍ରା ସମେତ ୨୦ଟି ଜିଲ୍ଲାର କୃଷକ ଏହି ଆନ୍ଦୋଳନରେ ଯୋଗ ଦେଉଛନ୍ତି। କୃଷକମାନେ ମୁଖ୍ୟତଃ ପାଞ୍ଚଟି ଦାବି ରଖିଛନ୍ତି। ୧୦% ପ୍ଲଟ୍ ଏବଂ ୬୪.୭% ବର୍ଦ୍ଧିତ କ୍ଷତିପୂରଣ ପୁରୁଣା ଜମି ଅଧିଗ୍ରହଣ ଆଇନ ଅନୁଯାୟୀ ପ୍ରଭାବିତ ଚାଷୀଙ୍କୁ ଦିଆଯିବା ଉଚିତ୍।

୧ ଜାନୁଆରୀ ୨୦୧୪ ପରେ ଅଧିଗ୍ରହଣ ହୋଇଥିବା ଜମି ଉପରେ ବଜାର ଦର କ୍ଷତିପୂରଣ ଏବଂ ୨୦% ପ୍ଲଟ୍ ଦିଆଯିବା ଉଚିତ୍। ଭୂମିହୀନ ଚାଷୀଙ୍କ ପିଲାମାନଙ୍କୁ ରୋଜଗାର ଏବଂ ପୁନର୍ବାସର ସୁବିଧା ଦିଆଯିବା ଉଚିତ୍। ହାଇ ପାଓ୍ୱାର କମିଟି ଦ୍ୱାରା ପାସ୍ ହୋଇଥିବା ପ୍ରସଙ୍ଗଗୁଡିକ ଉପରେ ସରକାରୀ ନିର୍ଦ୍ଦେଶ ଜାରି କରାଯିବା ଉଚିତ୍। ଗତକାଲି କୃଷକ ଏବଂ କର୍ତ୍ତୃପକ୍ଷଙ୍କ ମଧ୍ୟରେ ୩ ଘଣ୍ଟା ଧରି ବୈଠକ ଚାଲିଥିଲା, କିନ୍ତୁ ଏହି ବୈଠକରୁ କୌଣସି ସକରାତ୍ମକ ଫଳାଫଳ ହାସଲ ହୋଇପାରି ନାହିଁ। ଏହା ପରେ କୃଷକମାନେ ସେମାନଙ୍କର ଦାବି ପୂରଣ ପାଇଁ ଆଜି ଦିଲ୍ଲୀ ଯିବାକୁ ନିଷ୍ପତ୍ତି ନେଇଛନ୍ତି। ଏହାକୁ ଦୃଷ୍ଟିରେ ଦିଲ୍ଲୀ ନୋଏଡା ସୀମାରେ କଡା ସୁରକ୍ଷା ବ୍ୟବସ୍ଥା କରାଯାଇଛି।