ବିମାନ ଭିତରେ ହାଇଭୋଲ୍ଟେଜ୍ ଡ୍ରାମା : ଘରେ ନକହି ବନ୍ଧୁମାନଙ୍କ ସହ ଥାଇଲାଣ୍ଡ୍ ଯାଉଥିଲେ ପୂର୍ବତନ ମନ୍ତ୍ରୀଙ୍କ ପୁଅ
Rasmita Behera
ପୂର୍ବତନ ମନ୍ତ୍ରୀଙ୍କ ପୁଅ ପାଇଁ ମଝି ଆକାଶରେ ବିମାନ ଭିତରେ ହାଇଭୋଲ୍ଟେଜ୍ ଡ୍ରାମା ଦେଖିବାକୁ ମିଳିଛି। ପୂର୍ବତନ ମହାରାଷ୍ଟ୍ର ମନ୍ତ୍ରୀ ତଥା ଶିବସେନା ନେତା ତାନାଜୀ ସାୱନ୍ତଙ୍କ ପୁଅ ଏବଂ ପୁଅର ଦୁଇ ବନ୍ଧୁ ବ୍ୟାଙ୍କ୍କକ୍ ଯାଉଥିବା ବିମାନଟି ଅଚାନକ ପୁଣେ ଫେରିବା ଘଟଣା ସଭିଙ୍କୁ ଚକିତ କରିଛି। ତେବେ କୌଣସି ମେଡିକାଲ୍ ଏମର୍ଜେନ୍ସି କି ଅନ୍ୟ କୌଣସି କାରଣରୁ ନୁହେଁ, ବରଂ ପୂର୍ବତନ ମନ୍ତ୍ରୀଙ୍କ ଆଦେଶରେ ବିମାନଟି ପୁଣେ ଫେରିଥିଲା।
ଜାଣିବାକୁ ମିଳିଛି ଯେ ତାନାଜୀ ସାୱନ୍ତଙ୍କ ପୁଅ ଏବଂ ପୁଅର ଦୁଇ ବନ୍ଧୁ ଘରେ ନଜଣାଇ ବ୍ୟାଙ୍କ୍କକ୍ ଯାଉଥିଲେ। ହେଲେ ପାଇଲଟ୍ଙ୍କୁ କହି ବିମାନକୁ ଫେରାଇ ଆଣିଲେ ମହାରାଷ୍ଟ୍ରର ପୂର୍ବ ମନ୍ତ୍ରୀ। ପାଇଲଟ୍ ପ୍ରଥମେ ବିମାନ ଫେରାଇବା ସଂପର୍କରେ କଲ୍ ପାଇବା ପରେ ଏହାକୁ ଏକ ‘ହୋକ୍ସ୍ କଲ୍’ ବୋଲି ଭାବିଥିଲେ। ମାତ୍ର ପରବର୍ତ୍ତୀ ସମୟରେ ତଦନ୍ତ ସରିବାକୁ ବିମାନଟି ପୁଣେକୁ ଫେରିଥିଲା ବୋଲି ବୁଧବାର ଦିନ ଜଣେ ଏୟାରଲାଇନ୍ସ କାର୍ଯ୍ୟନିର୍ବାହୀ କହିଛନ୍ତି। ରିଷିରାଜ ସାୱନ୍ତ (୩୨) ଓ ତାଙ୍କର ଦୁଇ ବନ୍ଧୁ ଏକ ଘରୋଇ ସଂସ୍ଥା ଦ୍ୱାରା ପରିଚାଳିତ ଚାର୍ଟର୍ଡ ବିମାନ ଯୋଗେ ସୋମବାର ରାତି ୮ଟାରୁ ୮.୩୦ ମଧ୍ୟରେ ପୁନେ ବିମାନବନ୍ଦରକୁ ଫେରି ଆସିଥିଲେ, ଯାହାକି ଥାଇଲାଣ୍ଡ୍ର ରାଜଧାନୀକୁ ଉଡ଼ାଣ ଭରିଥିଲା।
ବିମାନ ପରିଚାଳନା କରୁଥିବା କମ୍ପାନୀର କାର୍ଯ୍ୟନିର୍ବାହୀ ଅଧିକାରୀ ଜୋର ଦେଇ କହିଛନ୍ତି ଯେ ବିମାନକୁ ପୁନେକୁ ଫେରାଇ ଆଣିବାର ନିଷ୍ପତ୍ତି କେବଳ ଉପଯୁକ୍ତ ଯାଞ୍ଚ ପରେ ନିଆଯାଇଥିଲା।ଏକ ନାଟକୀୟ ମୋଡ଼ରେ ରିଷିରାଜ ସାୱନ୍ତ ଏବଂ ତାଙ୍କ ଦୁଇ ବନ୍ଧୁ ଯାତ୍ରା କରୁଥିବା ବେଳେ ତାନାଜୀ ସାୱନ୍ତଙ୍କ ହସ୍ତକ୍ଷେପ ପରେ ପୁଲିସ୍ ଏକ ଅପହରଣ ମାମଲା ରୁଜୁ କରି ତଦନ୍ତ କରିଥିଲା ଓ ବିମାନଟିକୁ ପୁଣେ ଫେରାଇ ଅଣା ଯାଇଥିଲା। ତେବେ ମଜାଦାର୍ କଥା ହେଉଛି ପୂର୍ବତନ ମନ୍ତ୍ରୀଙ୍କ ପୁଅ ଓ ତାଙ୍କ ବନ୍ଧୁମାନେ ପୁଣେରେ ପହଞ୍ଚିବା ପର୍ଯ୍ୟନ୍ତ ବି ଜାଣିନଥିଲେ ଯେ ସେମାନେ କେଉଁଆଡ଼େ ଯାଉଛନ୍ତି। ବିମାନର ଡୋର୍କୁ ବନ୍ଦ୍ କରି ଦିଆଯାଇଥିଲା। ସେମାନେ ପୁଣେରେ ପହଞ୍ଚିବା ପରେ ପାଇଲଟ୍ଙ୍କ ସହ ଯୁକ୍ତିତର୍କ କରିଥିଲେ।
