୩୧ ଯାଏ ବଢ଼ିଲା ଇ-କେୱାଇସି ଅବଧି
Rasmita Behera
ଭୁବନେଶ୍ୱର: ରାସନ କାର୍ଡ ହିତାଧିକାରୀଙ୍କ ଇ-କେୱାଇସି ଅପଡେଟ୍ କରିବାର ଅବଧି ଜାନୁଆରୀ ୩୧ ଯାଏ ବଢ଼ିଲା । ଏ ନେଇ ବିଭିନ୍ନ ଜିଲ୍ଲାର ଯୋଗାଣ ଅଧିକାରୀଙ୍କୁ ଚିଠି ଲେଖିଛନ୍ତି ଯୋଗାଣ ବିଭାଗର ଅତିରିକ୍ତ ସଚିବ । ଏ ପର୍ୟ୍ୟନ୍ତ ପ୍ରାୟ ୫୦ ଲକ୍ଷ ରାସନ କାର୍ଡ ହିତାଧିକାରୀ ଇ-କେୱାଇସି ଅପଡେଟ୍ କରିନାହାନ୍ତି । ତେଣୁ ଏମାନେ ମାଗଣା ଚାଉଳରୁ ବଞ୍ଚିତ ହେବେ । ଗଣମାଧ୍ୟମରେ ଏଭଳି ଖବର ପ୍ରକାଶ ପରେ ଯୋଗାଣ ବିଭାଗ ପକ୍ଷରୁ ଏକ ଉଚ୍ଚସ୍ତରୀୟ ବୈଠକ ଡାକି ସମୀକ୍ଷା କରାଯାଇଛି। ସମୀକ୍ଷା ପରେ ଇ-କେୱାଇସି ଅବଧି ବୃଦ୍ଧି ପାଇଁ ନିଷ୍ପତ୍ତି ହୋଇଛି। ଅବଧି ବୃଦ୍ଧି ସମ୍ପର୍କରେ ପଞ୍ଚାୟତ ସ୍ତରରେ ବ୍ୟାପକ ପ୍ରଚାର, ପ୍ରସାର କରିବାକୁ ନିର୍ଦ୍ଦେଶ ଦିଆଯାଇଛି ।
ଅପରପକ୍ଷେ, ଇ-କେୱାଇସି ଅପଡେଟ୍ କରିବାରେ ଇଣ୍ଟରନେଟ୍ ନେଟୱାର୍କ ସମସ୍ୟା ହେଉଛି । ହେଲେ ବିଭାଗ ପକ୍ଷରୁ ଜଣେ ବି ଯୋଗ୍ୟ ହିତାଧିକାରୀ ଯେମିତି ମାଗଣା ଚାଉଳ ପାଇବାରୁ ବଞ୍ଚିତ ନହୁଅନ୍ତି, ସେଥିପାଇଁ ସବୁପ୍ରକାର ପ୍ରୟାସ ଚଳାଇବାକୁ କୁହାଯାଇଛି । କୌଣସି ହିତାଧିକାରୀ ରାସନ ପାଇଁ ଯାଇନପାରିଲେ, ନୋମିନିଙ୍କୁ ପଠାଇ ପାରିବେ ବୋଲି ବିଭାଗୀୟ ଚିଠିରେ କୁହାଯାଇଛି । ନୋମିନି ରାସନ ସଂଗ୍ରହ କରିବାକୁ ଗଲେ ପ୍ରକୃତ ହିତାଧିକାରୀଙ୍କ ମୋବାଇଲକୁ ଏକ ଓଟିପି ଯିବ । ସେହି ଓଟିପି ଦେଇ ନୋମିନି ଜଣକ ପ୍ରକୃତ ହିତାଧିକାରୀଙ୍କ ପାଇଁ ରାସନ ଉଠାଇ ପାରିବେ ବୋଲି କୁହାଯାଇଛି ।
