ପୁଣି ବିବାଦରେ ଜୟନାରାୟଣ
Rasmita Behera
ବିଜେପି ବିଧାୟକ ଜୟନାରାୟଣ ମିଶ୍ର ପୁଣି ବିବାଦରେ । ଥାନା ଅଧିକାରୀଙ୍କୁ ଗାଳିଗୁଲଜ କରିଥିବା ଅଭିଯୋଗରେ ତାଙ୍କ ନାଁରେ ମାମଲା ରୁଜୁ ହୋଇଛି । ଥାନା ଅଧିକାରୀଙ୍କୁ ଅସଭ୍ୟ ଭାଷାରେ ଗାଳି ଦେଇଥିବା ନେଇ ଥାନା ଅଧିକାରୀ କହିଛନ୍ତି । ପୁଣି ଧମକାଇଲେ ସମ୍ବଲପୁର ବିଧାୟକ ଜୟନାରାୟଣ ମିଶ୍ର । ସମ୍ବଲପୁର ଟାଉନ ଥାନା ଅଧିକାରୀଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିଥିବା ଅଭିଯୋଗ ହୋଇଛି । ଏପରିକି ଥାନା ପୋଡ଼ିଦେବା ଓ ସମସ୍ତଙ୍କୁ ମାରିବାକୁ ଧମକ ଦେଇଥିବା ନେଇ ଟାଉନ ଥାନା ଆଇଆଇସି ସୁବ୍ରତ କୁମାର ମେହେର ପ୍ଲେନ୍ ପେପର୍ ଏଫ୍ଆଇଆର୍ ଦେଇଛନ୍ତି ।
ହନୁମାନ ଜୟନ୍ତୀ ପୂର୍ବରୁ ବୁଧବାର ସନ୍ଧ୍ୟାରେ ବିନା ଅନୁମତିରେ ଗୋଲ ବଜାର ଛକରେ ଝଣ୍ଡା ଶୋଭାଯାତ୍ରାରେ କିଛି ଯୁବକ ଖଣ୍ଡା ପ୍ରଦର୍ଶନ କରିଥିଲେ । ଏହାର ଭିଡିଓ ରେକର୍ଡିଂ କରିବା ସହ ସ୍ଥାନୀୟ ଲୋକେ ଏନେଇ ପ୍ରଶ୍ନ ଉଠାଇଥିଲେ । ତେବେ ଘଟଣାର ଭିଡିଓ ଭାଇରାଲ ହେବା ପରେ ଭିଡିଓ ପ୍ରମାଣ ଆଧାରରେ ପୋଲିସ ଖଣ୍ଡା ଜବତ କରିବା ସହ ୮ଜଣଙ୍କ ନାଁରେ ମାମଲା ରୁଜୁ କରିଥିଲା । ଏହି ଘଟଣାକୁ ନେଇ ପୋଲିସକୁ ଜୟନାରାୟଣ ମିଶ୍ର ଧମକ ଦେଇଥିବା ଅଭିଯୋଗ ହୋଇଛି । ପୂର୍ବରୁ ମଧ୍ୟ ଜୟନାରାୟଣ ମିଶ୍ର ଅଇଁଠାପାଲି ମହିଳା ଥାନା ଅଧିକାରୀଙ୍କୁ ଧକ୍କା ମାରିଥିବାର ଦେଖିବାକୁ ମିଳିଥିଲା । ବାରମ୍ବାର ଜୟନାରାୟଣ ଭୁଲ ଦୋହରାଉଥିବାର ଦେଖିବାକୁ ମିଳୁଛି । ନିକଟରେ ରାଜ୍ୟ ସଙ୍ଗୀତକୁ ଅସମ୍ମାନ କରିଥିବାର ଭିଡିଓ ମଧ୍ୟ ଭାଇରାଲ ହୋଇଥିଲା । ବନ୍ଦେ ଉତ୍କଳ ଜନନୀ ଗାନ ବେଳେ ସମସ୍ତେ ଛିଡ଼ା ହୋଇଥିବା ବେଳେ ସେ କିନ୍ତୁ ବସି ରହିଥିଲେ । ସମାନ ଭୁଲ ତାଙ୍କ ଝିଅ ମଧ୍ୟ କରିଥିବାର ଦେଖିବାକୁ ମିଳିଥିଲା ।
