ଜ୍ୟୋତି ପ୍ଲାନ କରିଥିଲେ ପାକିସ୍ତାନ ପରେ ବାଂଲାଦେଶ ଯିବାକୁ !

ନୂଆଦିଲ୍ଲୀ: ହରିୟାଣାର ହିସାର ନିବାସୀ ଜ୍ୟୋତି ମଲହୋତ୍ରା, ଯିଏ ‘ଟ୍ରାଭେଲ ଉଇଥ ଜୋ’ ନାମକ ଏକ ଲୋକପ୍ରିୟ ଯୁଟ୍ୟୁବ ଚ୍ୟାନେଲ ଚଳାନ୍ତି, ତାଙ୍କୁ ଗୁଇନ୍ଦା ସୂଚନା ଦେବା ଅଭିଯୋଗରେ ଗତ ୧୬ ମେରେ ଗିରଫ କରାଯାଇଛି। ପୋଲିସ ସୂଚନା ଅନୁଯାୟୀ, ଜ୍ୟୋତି ପାକିସ୍ତାନରୁ ଫେରିବା ପରେ ବାଂଲାଦେଶ ଯିବାର ଯୋଜନା କରୁଥିଲେ। ଜାତୀୟ ତଦନ୍ତ ସଂସ୍ଥା (ଏନଆଇଏ) ତାଙ୍କର ବାଂଲାଦେଶ ଭିସା ଆବେଦନ ଫର୍ମ ଜବତ କରିଛି, ଯାହା ତାଙ୍କ ଯୋଜନାକୁ ସୂଚାଇଛି। ଜ୍ୟୋତିଙ୍କ ଯୁଟ୍ୟୁବ ଚ୍ୟାନେଲ ‘ଟ୍ରାଭେଲ ଉଇଥ ଜୋ’ରେ ପ୍ରାୟ ୩.୭୭ ଲକ୍ଷ ସବସ୍କ୍ରାଇବର ଅଛନ୍ତି। ସେ ନିଜକୁ ଜଣେ ‘ନୋମାଡିକ ଲିଓ ଗାର୍ଲ’ ଓ ‘ହରିୟାଣୀ+ପଞ୍ଜାବୀ’ ଭାବେ ବର୍ଣ୍ଣନା କରନ୍ତି। ତାଙ୍କ ଭିଡିଓଗୁଡିକ ସେ ପାକିସ୍ତାନ, ଚୀନ, ଇଣ୍ଡୋନେସିଆ ଓ ଭାରତର ବିଭିନ୍ନ ସ୍ଥାନର ଭ୍ରମଣ ଅନୁଭବ ସେୟାର କରିଛନ୍ତି। କିନ୍ତୁ ତାଙ୍କର ପାକିସ୍ତାନ ଯାତ୍ରା ଓ ସେଠାକାର ଅଧିକାରୀଙ୍କ ସହ ସମ୍ପର୍କ ତଦନ୍ତକାରୀଙ୍କ ଦୃଷ୍ଟି ଆକର୍ଷଣ କରିଛି।

ସୂଚନା ଅନୁଯାୟୀ, ଜ୍ୟୋତି ୨୦୨୩ରେ ପାକିସ୍ତାନ ହାଇ କମିସନରେ ଭିସା ପାଇଁ ଯାଇଥିବା ସମୟରେ ଏହସାନ-ଉର-ରହିମ ଓରଫ ଡାନିଶ ନାମକ ଜଣେ ଅଧିକାରୀଙ୍କ ସହ ଯୋଗାଯୋଗ କରିଥିଲେ। ଏହା ପରେ ସେ ଦୁଇଥର ପାକିସ୍ତାନ ଯାଇଥିଲେ ଓ ସେଠାରେ ଅଲି ଆହୱାନ, ଶାକିର ଓ ରାଣା ଶାହବାଜ ନାମକ ବ୍ୟକ୍ତିଙ୍କୁ ଭେଟିଥିଲେ। ଏହି ସମୟରେ ସେ ପାକିସ୍ତାନୀ ଗୁଇନ୍ଦା ଅଧିକାରୀଙ୍କ ସହ ଯୋଗାଯୋଗ ରଖି ଗୁପ୍ତ ସୂଚନା ଆଦାନପ୍ରଦାନ କରୁଥିବା ଅଭିଯୋଗ ହୋଇଛି। ସେ ଶାକିରଙ୍କ ନମ୍ବରକୁ ‘ଜାଟ ରନ୍ଧାୱା’ ନାମରେ ସେଭ କରିଥିଲେ ଯାହା ସନ୍ଦେହ ଏ ପାଇଁ ଥିଲା। ଜ୍ୟୋତିଙ୍କ ଡାଏରୀରୁ ମିଳିଥିବା ସୂଚନା ଅନୁଯାୟୀ, ସେ ଲେଖିଛନ୍ତି, ପାକିସ୍ତାନରେ ୧୦ ଦିନର ଯାତ୍ରା ପରେ ମୁଁ ମୋ ଦେଶ ଭାରତକୁ ଫେରିଛି। ସୀମାର ଦୂରତା କେତେ ଦିନ ରହିବ ଜଣା ନାହିଁ, କିନ୍ତୁ ହୃଦୟର ଅଭିଯୋଗ ଦୂର ହେବା ଉଚିତ। ଆମେ ସମସ୍ତେ ଏକ ମାଟିର, ଏକ ପୃଥିବୀର। ଏହି ଲେଖା ତାଙ୍କର ପାକିସ୍ତାନ ପ୍ରତି ସକାରାତ୍ମକ ଦୃଷ୍ଟିକୋଣକୁ ସୂଚାଇଛି। ତାଙ୍କୁ ଅଫିସିଆଲ ସିକ୍ରେଟ୍ସ ଆକ୍ଟ ଓ ଭାରତୀୟ ନ୍ୟାୟ ସଂହିତାର ଧାରା ୧୫୨ ଅନୁଯାୟୀ ଅଭିଯୁକ୍ତ କରାଯାଇଛି। ତାଙ୍କର ମୋବାଇଲ ଓ ଲାପଟପରୁ ମିଳିଥିବା ସୂଚନା ତଦନ୍ତ ପାଇଁ ଫରେନସିକ ବିଶ୍ଳେଷଣକୁ ପଠାଯାଇଛି। ଏହା ସହିତ, ତାଙ୍କର ଆର୍ଥିକ ନେଣଦେଣ ଓ ଭ୍ରମଣ ଇତିହାସ ମଧ୍ୟ ଖୋଲତାଡ଼ କରାଯାଉଛି।

ଜ୍ୟୋତିଙ୍କ ବାପା ହରିଶ ମଲହୋତ୍ରା କହିଛନ୍ତି ଯେ ସେ ତାଙ୍କ ପାକିସ୍ତାନ ଯାତ୍ରା ବିଷୟରେ ଅଜଣା ଥିଲେ ଓ ଜ୍ୟୋତି ତାଙ୍କୁ କେବଳ ଦିଲ୍ଲୀ ଯାଉଥିବା କହୁଥିଲେ। ତେବେ ପୂର୍ବରୁ ସେ କହିଥିଲେ ଯେ ଜୋତି ଆବଶ୍ୟକ ଅନୁମତି ନେଇ ପାକିସ୍ତାନ ଯାଇଥିଲେ। ଏହି ମାମଲା ଭାରତ-ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଆହୁରି ଗୁରୁତ୍ୱପୂର୍ଣ୍ଣ ହୋଇପ ଗତ ଏପ୍ରିଲ ୨୨ରେ ଜାମ୍ମୁ ଓ କାଶ୍ମୀରର ପାହାଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ, ଯେଉଁଥିରେ ୨୬ ଜଣଙ୍କର ମୃତ୍ୟୁ ଘଟିଥିଲା, ତାହା ପରେ ଭାରତ ଅପରେସନ ସିନ୍ଦୁର ଆରମ୍ଭ କରି ପାକିସ୍ତାନରେ ଆତଙ୍କବାଦୀ ଶିବିର ଉପରେ ଆକ୍ରମଣ କରିଥିଲା। ଜ୍ୟୋତିଙ୍କ ପାହାଲଗାମ ଯାତ୍ରା ମଧ୍ୟ ଏହି ଆକ୍ରମଣ ସହ ଜଡିତ ଥାଇପାରେ ବୋଲି ତଦନ୍ତକାରୀ ସନ୍ଦେହ କରୁଛନ୍ତି।