ପହଲଗାମ୍ ଆତଙ୍କୀ ଆକ୍ରମଣ ଘଟଣା : ମାଷ୍ଟର ମାଇଣ୍ଡ ହାସିମ୍ ମୁଷା

ାା ଏଜେନ୍ସି ।ା ଶ୍ରୀନଗର : ପହଲଗାମର ଆତଙ୍କବାଦୀମାନେ ପାକିସ୍ତାନରେ ଇଲାଇଟ୍ କମାଣ୍ଡୋ ପ୍ରଶିକ୍ଷଣ ନେଇଥିଲେ  । ହାସିମ୍ ମୁଷା ଥିଲା ଏମାନଙ୍କର ମାଷ୍ଟର ମାଇଣ୍ଡ  । ସେ ପାକିସ୍ତାନରେ ପାରା କମାଣ୍ଡୋ ଭାବେ ପ୍ରଶିକ୍ଷଣ ନେଇଥିଲା  । ପ୍ରାରମ୍ଭିକ ଅନୁସନ୍ଧାନରୁ ଏହି ତଥ୍ୟ ମିଳିଛି । 
ପୂର୍ବରୁ ମୁଷା ପାକ୍ ସେନାରେ କାମ କରୁଥିଲା  । କାଠୁଆ ଓ ଶାମ୍ବା ସେକ୍ଟର ଦେଇ ସେ ଭାରତକୁ ଚାଲି ଆସିଥିଲା  । ଏହା ପରେ ସେ ରାଜୈାରୀ ପୁଞ୍ଚର ଡେରା କି ଗଲି  ଅଞ୍ଚଳରେ ସକ୍ରିୟ ହୋଇଥିଲା  । ଲସ୍କର-ଇ-ତୋଏବା ସହଯୋଗରେ ସେ ଅନେକ ବାର ସୁରକ୍ଷା କର୍ମୀଙ୍କ ଉପରେ ଆକ୍ରମଣ କରିଥିଲା  । ପାକିସ୍ତାନରେ ସେ ପାରା-କମାଣ୍ଡୋ ଟ୍ରେନିଂ ନେଇଥିଲା  । ପାର୍ବତ୍ୟାଞ୍ଚଳରେ କିଭଳି ଲୁଚିହେବ ଓ ଗରିଲା ଆକ୍ରମଣର କୌଶଳ ଆଦି ଶିଖିଥିଲା  ।  ସୁଚିନ୍ତିତ ରଣନୀତି କରି ପହଲଗାମରେ ଆତଙ୍କବାଦୀମାନେ ଆକ୍ରମଣ କରିଥିଲେ  । ଉଭୟ ପ୍ରବେଶ ପଥ ଓ ପ୍ରସ୍ଥାନ ପଥରେ ସେମାନେ ଜଗି ରହିଥିଲେ  । ଯାହାଫଳରେ ପର୍ଯ୍ୟଟକମାନେ ଖସି ଯାଇପାରିବେ ନାହିଁ  । ପ୍ରବେଶ ପଥରୁ ୨ ଓ ପ୍ରସ୍ଥାନ ପଟରୁ ଜଣେ ଆତଙ୍କବାଦୀ ଆସିଥିଲେ  । ପ୍ରଥମେ ପ୍ରସ୍ଥାନ ପଥ ଆଡୁ ହିଁ ଗୁଳି ମାଡ଼ ହୋଇଥିଲା  । ପ୍ରତ୍ୟକ୍ଷଦର୍ଶୀ ଓ ଆକ୍ରମଣରୁ ବର୍ତ୍ତି ଯାଇଥିବା ପର୍ଯ୍ୟଟକଙ୍କ ବୟାନରୁ ଏହା ସ୍ପଷ୍ଟ ହୋଇଛି  ।
ଏନଆଇଏ ଏବେ ଆତଙ୍କବାଦୀ ଆକ୍ରମଣର ଛାନଭିନ୍ କରୁଛି  । ତଦନ୍ତରୁ ଅନେକ ବାସ୍ତବ କଥା ସାମ୍ନାକୁ ଆସିବାରେ ଲାଗିଛି  । ମିଳିଥିବା ସୂଚନା ଅନୁଯାୟୀ, ଦୁଇ ଜଣ ପ୍ରବେଶ ଗେଟ୍ରେ ଓ ଜଣେ ପ୍ରସ୍ଥାନ ଗେଟରେ ଆସିଥିବାବେଳେ ଚତୁର୍ଥ ଆତଙ୍କବାଦୀ ଜଣଙ୍କ ଜଙ୍ଗଲ ଭିତରେ ଲୁଚି ରହିଥିଲା  । ଯିଏକି ସେମାନଙ୍କୁ ସହଯୋଗ କରୁଥିଲା  ।  ତିନି ଆତଙ୍କବାଦୀ ପର୍ଯ୍ୟଟକଙ୍କ ଉପରେ ଗୁଳି ଚଳାଇଥିଲେ  । ସେମାନଙ୍କ ମଧ୍ୟରୁ ୨ ଜଣ ମିଲିଟାରୀ ପୋଷାକରେ ଥିବାବେଳେ ଅନ୍ୟ ଜଣଙ୍କ କାଶ୍ମୀରର ପାରମ୍ପରିକ ପୋଷାକ ପରିଧାନ କରିଥିଲେ  ।  ପ୍ରବେଶ ପଥରେ ଆତଙ୍କବାଦୀମାନେ ଠିଆହୋଇ ମହିଳାମାନଙ୍କୁ ଅଲଗା କରିଦେଇଥିଲେ  । କିନ୍ତୁ ଲୋକମାନେ ରାଜି ହୋଇନଥିଲେ  । ତା’ପରେ ସେମାନେ କହିଥିଲେ ହିନ୍ଦୁ ଓ ମୁସଲମାନ ଅଲଗା ହୋଇଯାଅ  । କିନ୍ତୁ ପର୍ଯ୍ୟଟକମାନେ ରାଜି ହୋଇନଥିଲେ  । ଗୁଳି ଚଳାଇବା ପୂର୍ବରୁ ସେମାନେ କଲମା ପଢ଼ିବାକୁ କହିଥିଲେ  । ପ୍ରଥମେ ସେମାନେ ନାଭି ଅଫିସର ବିନୟ ନାରୱଲଙ୍କୁ ଗୁଳି କରିଥିଲେ  । ଚା’ ଷ୍ଟଲ ଓ ଭେଲପୁରୀ ଷ୍ଟଲ ନିକଟରେ ବହୁ ଲୋକ ଠିଆ ହୋଇଥିବାରୁ ସେଠାରେ ଅଧିକ ଲୋକଙ୍କର ମୃତୁ୍ୟ ହୋଇଥିଲା  । ଆକ୍ରମଣ କରିବା ପରେ ଆତଙ୍କବାଦୀମାନେ କାନ୍ଥ ଡେଇଁ ପାର୍କର ବାମପଟ ଆଡ଼େ ପଳାଇଥିଲେ  । ପ୍ରତ୍ୟକ୍ଷଦର୍ଶୀମାନେ ଏଭଳି ବୟାନ ଦେଇଛନ୍ତି  । ସେହିପରି ଆତଙ୍କୀ ଆକ୍ରମଣ ସ୍ଥଳୀରେ ଏନଆଇଏ ଟିମର ୬ ଜଣ ଅଧିକାରୀ ତଦନ୍ତ କରିଛନ୍ତି  । ସେମାନଙ୍କ ମଧ୍ୟରେ ୨ ଜଣ ଫୋରେନସିକ୍ ବିଶେଷଜ୍ଞ ମଧ୍ୟ ରହିଛନ୍ତି  । ଅପରପକ୍ଷରେ ବାଇସରନ୍ ପାର୍କରେ ପ୍ରାୟ ୪୫ ଜଣ ଦୋକାନ କରିଥିବାବେଳେ ପୋନି ଚଳାଉଛନ୍ତି  । ସେମାନଙ୍କୁ ମଧ୍ୟ ଜେରା କରାଯିବ  । ସେହିପରି ଜିପ ଲାଇନ୍ ଅପରେଟରଙ୍କୁ ବି ଜେରା କରାଯାଇଛି  । ଆତଙ୍କବାଦୀମାନେ ମୋବାଇଲ୍ ପେଡ଼ ଆପ୍ଲିକେସନ୍ ଜରିଆରେ ପାକିସ୍ତାନରେ ଥିବା ଆତଙ୍କବାଦୀଙ୍କ ସହ କଥା ହେଉଥିବା ଅନୁମାନ କରାଯାଉଛି  । ଦକ୍ଷିଣ କାଶ୍ମୀରରେ ସୁରକ୍ଷା କର୍ମୀମାନେ ସର୍ଚ୍ଚ ଅପରେସନ୍ କରୁଛନ୍ତି  ।