ମମତାଙ୍କୁ ଧମକାଇଥିଲେ ବବି!
pranab prakash das
Ramachandi Prasad
ଭୁବନେଶ୍ୱର : ରାଜ୍ୟସଭା ସାଂସଦ ପଦରୁ ଇସ୍ତଫା ଦେଇ ବିଜେପିରେ ମିଶିଥିବା ମମତା ମହନ୍ତ ଆଜି ବିସ୍ଫୋରକ ମନ୍ତବ୍ୟ ଦେଇଛନ୍ତି । ଦଳ କିଭଳି ତାଙ୍କୁ ଅଣଦେଖା କରୁଥିଲା ତାହା ବଖାଣିବା ସହ ପ୍ରଣବ ପ୍ରକାଶ ଦାସଙ୍କ ନାମରେ ସାଂଘାତିକ ଅଭିଯୋଗ ମଧ୍ୟ ଆଣିଛନ୍ତି । ବବି ତାଙ୍କୁ ଧମକାଇଥିଲେ ବୋଲି ସେ ପରୋକ୍ଷରେ ଅଙ୍ଗୁଳି ନିର୍ଦ୍ଦେଶ କରିଛନ୍ତି ।
ମମତା କହିଛନ୍ତିଯେ, ତାଙ୍କୁ ଦଳରେ ଅଣଦେଖା କରାଯାଉଥିଲା । ପଞ୍ଚାୟତ ନିର୍ବାଚନ ପର୍ଯ୍ୟନ୍ତ ସବୁ କିଛି ଠିକ୍ ଥିଲା । କିନ୍ତୁ ପଞ୍ଚାୟତ ନିର୍ବାଚନରେ ଦଳ ଆଉ ତାଙ୍କୁ ଲୋଡ଼ିନଥିଲା । ତାଙ୍କ ଘର ପାଖରେ ଲକ୍ଷ୍ମୀ ବସ୍ ଉଦଘାଟନ ହୋଇଥିଲେବି ତାଙ୍କୁ ଡକାଯାଇନଥିଲା । ଦଳୀୟ କାର୍ଯ୍ୟକ୍ରମମାନଙ୍କରେ ବି ସାମିଲ୍ କରାଯାଉନଥିଲା । ଏନେଇ ସେ ଦଳର ପ୍ରମୁଖ ନେତାଙ୍କୁ ଅବଗତ କରିଥିଲେବି କିଛି ସୁଫଳ ମିଳିନଥିଲା । ବରଂ ପ୍ରଣବ ପ୍ରକାଶ ଦାସ ତାଙ୍କ କଥା ବୁଝାଯିବ ବୋଲି କହିଥିଲେ । ୪ ପରେ ତାଙ୍କ କଥା ହିସାବ କରାଯିବ । ଏମିତିକି ରାଜ୍ୟସଭାରୁ କଢାଯିବ ବୋଲି କହିଥିଲେ । ଯେଉଁଠାରେ ସମ୍ମାନ ନାହିଁ କି ସୁଯୋଗ ନାହିଁ, ସେଠାରେ ରହିବାକୁ ଚାହିଁଲିନାହିଁ । ବାରମ୍ବାର ତାଙ୍କୁ ଦୁର୍ବ୍ୟବହାର କରିବାରୁ ସେ ବାଧ୍ୟହୋଇ ନିଜ ପଦରୁ ଇସ୍ତଫା ଦେବା ସହ ଦଳ ଛାଡ଼ିଥିଲେ ବୋଲି ମମତା କହିଛନ୍ତି ।
ସୂଚନାଯୋଗ୍ୟଯେ, ନିକଟରେ ବିଜେଡ଼ି ସଭାପତି ନବୀନ ପଟ୍ଟନାୟକ ଦଳର ସମନ୍ୱୟ କମିଟି ଗଢ଼ିଥିଲେ । କିନ୍ତୁ ସେହି କମିଟିରେ ଆଶ୍ଚର୍ଯ୍ୟଜନକ ଭାବେ ପ୍ରଣବ ପ୍ରକାଶ ଦାସଙ୍କୁ ସାମିଲ୍ କରାଯାଇନାହିଁ । ଯାହାକୁ ନେଇ ଏବେ ବିଜେଡ଼ି ଅଳିନ୍ଦରେ ଜୋରଦାର ଚର୍ଚ୍ଚା ହେଉଛି ।
