ଅହମ୍ମଦାବାଦରେ ୨୦୩୦ ରାଜ୍ୟଗୋଷ୍ଠୀ କ୍ରୀଡ଼ା

ମୋଦିଙ୍କ ପାଇଁ ସମ୍ଭବ ହେଲା : ଶାହ

ନୂଆଦିଲ୍ଲୀ : ଭାରତ ପାଇଁ ଖୁସି ଖବର । ଗୁଜରାଟର ଅହମ୍ମଦାବାଦରେ ଆୟୋଜିତ ହେବ ୨୦୩୦ ରାଜ୍ୟଗୋଷ୍ଠୀ କ୍ରୀଡ଼ା । ଏନେଇ ଆଜି କମନୱେଲଥ ସ୍ପୋର୍ଟ୍ସ ବୋର୍ଡ ପକ୍ଷରୁ ସୂଚନା ଦିଆଯାଇଛି । ନଭେମ୍ବର ୨୬ ତାରିଖରେ ଗ୍ଲାସଗୋରେ ଅନୁଷ୍ଠିତ ସାଧାରଣ ସଭାରେ ରାଜ୍ୟଗୋଷ୍ଠୀ କ୍ରୀଡାର କାର୍ଯ୍ୟନିର୍ବାହୀ ବୋର୍ଡ ଦ୍ୱାରା ଏନେଇ ଚୂଡ଼ାନ୍ତ ନିଷ୍ପତ୍ତି ନିଆଯିବ । ରାଜ୍ୟଗୋଷ୍ଠୀ କ୍ରୀଡା ସଂଘ ଭାରତର ସଭାପତି ଡକ୍ଟର ପି ଟି ଉଷା କହିଛନ୍ତି ଯେ ଅମଦାବାଦରେ ଶତବାର୍ଷିକୀ ରାଜ୍ୟଗୋଷ୍ଠୀ କ୍ରୀଡା ଆୟୋଜନ କରିବା ଭାରତ ପାଇଁ ଏକ ଅସାଧାରଣ ସମ୍ମାନ ହେବ ।ଏହି କ୍ରୀଡା କେବଳ ଭାରତର ବିଶ୍ୱସ୍ତରୀୟ କ୍ରୀଡା ଓ ଇଭେଣ୍ଟ କ୍ଷମତା ପ୍ରଦର୍ଶନ କରିବ ନାହିଁ, ବରଂ ବିକଶିତ ଭାରତ ୨୦୪୭ ଆଡକୁ ଆମର ଜାତୀୟ ଯାତ୍ରାରେ ଏକ ଅର୍ଥପୂର୍ଣ୍ଣ ଭୂମିକା ଗ୍ରହଣ କରିବ । ଆମେ ୨୦୩୦ କ୍ରୀଡାକୁ ଆମର ଯୁବପିଢ଼ିଙ୍କୁ ପ୍ରେରଣା ଦେବା, ଅନ୍ତର୍ଜାତୀୟ ସହଭାଗିତାକୁ ସୁଦୃଢ଼ କରିବା ଓ ରାଜ୍ୟଗୋଷ୍ଠୀରେ ଏକ ସହଭାଗୀ ଭବିଷ୍ୟତ ପାଇଁ ଯୋଗଦାନ ଦେବା ପାଇଁ ଏକ ଶକ୍ତିଶାଳୀ ସୁଯୋଗ ଭାବରେ ଦେଖୁଛୁ ବୋଲି ସେ କହିଛନ୍ତି । ଏକ ପ୍ରେସ୍‌ ରିଲିଜ୍‌ ଅନୁଯାୟୀ, କମନୱେଲ୍‌ଥ ସ୍ପୋର୍ଟ୍ସ ବୋର୍ଡ ନିଶ୍ଚିତ କରିଛି ଯେ ଏହା ୨୦୩୦ କମନୱେଲ୍‌ଥ ଗେମ୍ସ ପାଇଁ ପ୍ରସ୍ତାବିତ ଆୟୋଜକ ସହର ଭାବରେ ଅହମ୍ମଦାବାଦକୁ ସୁପାରିଶ କରିବ । 

ଭାରତ  ପ୍ରଥମେ ୨୦୧୦ ରେ ଦିଲ୍ଲୀରେ ଗେମ୍ସ ଆୟୋଜନ କରିଥିଲା, ଏପରି ଏକ ଇଭେଣ୍ଟ ଆୟୋଜନ କରିବାକୁ ପ୍ରତିଶ୍ରୁତି ଦେଇଥିଲା ଯାହା କମନୱେଲ୍‌ଥର ବିବିଧତା ଓ ପରିସରକୁ ପ୍ରତିଫଳିତ କରେ ।କେନ୍ଦ୍ର ମନ୍ତ୍ରୀ ଅମିତ ଶାହ ସୁପାରିଶକୁ ଭାରତ ପାଇଁ ଅପାର ଆନନ୍ଦ ଓ ଗର୍ବର ମୁହୂର୍ତ୍ତ ବୋଲି କହିଛନ୍ତି । ଏକ୍ସରେ ଏକ ପୋଷ୍ଟରେ ଶାହ କହିଛନ୍ତି, ଭାରତ ପାଇଁ ଏକ ଅତ୍ୟନ୍ତ ଆନନ୍ଦ ଏବଂ ଗର୍ବର ଦିନ । ଅହମ୍ମଦାବାଦରେ ୨୦୩୦ରେ କମନୱେଲଥ ଗେମ୍ସ ଆୟୋଜନ କରିବା ପାଇଁ ଭାରତର ବିଡ୍‌କୁ କମନୱେଲଥ ଆସୋସିଏସନ ଅନୁମୋଦନ କରିଥିବାରୁ ଭାରତର ପ୍ରତ୍ୟେକ ନାଗରିକଙ୍କୁ ହାର୍ଦ୍ଦିକ ଅଭିନନ୍ଦନ । ସେ ଆହୁରି ମଧ୍ୟ କହିଛନ୍ତି, ଭାରତକୁ ବିଶ୍ୱ କ୍ରୀଡା ମାନଚିତ୍ରରେ ସ୍ଥାନିତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୀଙ୍କର ନିରନ୍ତର ଉଦ୍ୟମର ଏହା ଏକ ମହତ୍‌ପୂର୍ଣ୍ଣ ସମର୍ଥନ । ବିଶ୍ୱ ସ୍ତରୀୟ ଭିତ୍ତିଭୂମି ବୃଦ୍ଧି ତଥା ଦେଶବ୍ୟାପୀ କ୍ରୀଡ଼ା ପ୍ରତିଭା ସୃଷ୍ଟି କରିବାରେ ମୋଦି ଜୀ ଭାରତକୁ ଏକ କ୍ରୀଡ଼ା ଗନ୍ତବ୍ୟସ୍ଥଳର ଚମତ୍କାର କରିପାରିଛନ୍ତି ।