ଜେଲରେ ଚାଲୁଛି ଅବାଧ ନିଶା କାରବାର

କେନ୍ଦୁଝର: କେନ୍ଦୁଝର ଜିଲ୍ଲା କାରାଗାରରେ ଅବାଧ ନିଶା କାରବାର ଚାଲିଛି । ବାହାରୁ ଗଞ୍ଜେଇ, ମଦ, ଭାଙ୍ଗ, ବିଡି, ଖଇନି, ଗୁଟ୍ଖା ଓ ଅନ୍ୟାନ୍ୟ ନିଶାଦ୍ରବ୍ୟ ଜେଲ ଭିତରକୁ ଚାଲାଣ ହେଉଛି । ଜେଲରେ ବହୁ କଏଦୀ ନିଶାଦ୍ରବ୍ୟ ଖାଇ ବିଶୃଙ୍ଖଳା ସୃଷ୍ଟି କରୁଛନ୍ତି । ଜେଲରେ କଟକଣା ନଥିବାରୁ ନିଶାଦ୍ରବ୍ୟ ନିୟମିତ ଚାଲାଣ ହେଉଛି । ଜେଲ ଭିତରକୁ କିଏ ଏବଂ କିପରି ମାଦକ ଦ୍ରବ୍ୟ ନେଇଛି ତାହା ଯାଂଚ ପରେ ଜଣାଡିବ । ଜେଲ ଭିତରକୁ ଯାଉଥିବା କର୍ମଚାରୀମାନଙ୍କୁ ପ୍ରବେଶ ଏବଂ ପ୍ରସ୍ଥାନ ସମୟରେ କଡାକଡି ଯାଂଚ କରାଯାଉନାହିଁ । ଜେଲ ଅନ୍ତେବାସୀଙ୍କ ପାଇଁ ବାହାରୁ ଆସୁଥିବା ଖାଦ୍ୟ ପୁଡିଆ ଏବଂ ଟିଫିନ ଡବାକୁ ସିସିଟିଭି ସାମ୍ନାରେ ଦେଖାଇବାର ନିୟମ ଥିଲେ ହେଁ ଏହା କରାଯାଉନାହିଁ । ଜେଲ କର୍ମଚାରୀଙ୍କ ମିଲି ଭଗତରେ ଏଭଳି ନିଶା କାରାବାର ଚାଲିଥିବା ଅଭିଯୋଗ ହେଉଛି । 
ଗତ ୬ ମାସ ତଳେ ଜେଲ ଭିତରକୁ ଗଞ୍ଜେଇ ଚାଲାଣ ବେଳେ ଧରାପଡିଥିଲେ ହେଁ ଏହାକୁ ଚାପି ଦିଆଯାଇଥିଲା । ସେହିପରି ଗତ ମାର୍ଚ୍ଚ ମାସରେ ଏ ନେଇ ମାଜିଷ୍ଟ୍ରେଟଙ୍କ ନିକଟରେ ଆଜୀବନ ସଜା କାଟୁଥିବା ଦାରା ସିଂ ଅଭିଯୋଗ କରିଥିଲେ । ଏହା ପରେ ତନାଘନା ଆରମ୍ଭ ହୋଇଥିଲା । ଏହା ପରେ ତୁରନ୍ତ ପଦକ୍ଷେପ ନେବାକୁ ମାଜିଷ୍ଟ୍ରେଟ ଜେଲରଙ୍କୁ ନିଦେ୍ର୍ଦଶ ଦେବା ପରେ ଜେଲ କର୍ତ୍ତୃପକ୍ଷ ହରଡଘଣାରେ ପଡି ଚିଫ୍ ୱାର୍ଡର ଙ୍କୁ କାରଣ ଦର୍ଶାଅ ନୋଟିସ କରାଯାଇଥିଲା । ତେବେ ଏହି ଘଟଣାରେ ଅଦ୍ୟାବଧି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ଏହି ଘଟଣା ପରେ ମଧ୍ୟ ଜେଲକୁ ନିୟମିତ ମାଦକଦ୍ରବ୍ୟ ବେଧଡକ ଚାଲାଣ ହେଉଥିବା ସ୍ପଷ୍ଟ ହୋଇଛି । ୱାର୍ଡରମାନେ ବାହାରୁ ମାଦକଦ୍ରବ୍ୟ କ୍ରୟ କରି ଜେଲରେ ଥିବା କଏଦୀଙ୍କୁ ଅଧିକ ଦରରେ ବିକ୍ରୀ କରି ବେଶ ଲାଭବାନ ହେଉଛନ୍ତି । ପୋଲିସ ପକ୍ଷରୁ ଜେଲରେ ଅତର୍କିତ ଯାଂଚ କଲେ ଏହାର ପର୍ଦ୍ଦାଫାଶ ହୋଇପାରିବ ବୋଲି ମତପ୍ରକାଶ ପାଇଛି । ଜେଲରେ କଏଦୀଙ୍କ ପାଇଁ ଆସୁଥିବା ଗ୍ରୋସରୀ ମଧ୍ୟ କେତେକ ୱାର୍ଡର ବ୍ୟାଗରେ ନେଉଛନ୍ତି । ଜେଲ ଗେଟରେ ଥିବା କର୍ମଚାରୀ ଏହାର ଯାଂଚ କରୁନଥିବାରୁ ଏହି ନିଶା କାରବାର ବେଧଡକ ଚାଲିଛି । କେନ୍ଦୁଝର ଜିଲ୍ଲା କାରାଗାରରେ କଏଦୀଙ୍କ ପାଇଁ ଥିବା ଅଭିଯୋଗ ବାକ୍ସରେ ଅବ୍ୟବସ୍ଥା ଏବଂ ଅସୁବିଧା ନେଇ ଜଣାଇଲେ ପଦକ୍ଷେପ ନିଆଯାଉନାହିଁ । ତେବେ ଅଭିଯୋଗ ବାକ୍ସର ଆଉ ଏକ ଚାବି ଜେଲ କର୍ତ୍ତୃପକ୍ଷଙ୍କ ନିକଟରେ ଥିବାରୁ ଅଭିଯୋଗପତ୍ର କାଢି ନିଆଯାଉଥିବା ଅଭିଯୋଗ ହୋଇଛି । ଜେଲ ବଗିଚାରେ ଉତ୍ପାଦିତ ପନିପରିବା ଦୈନନ୍ଦିନ ବିକ୍ରୀ ହେଉଥିବାବେଳେ ବିକ୍ରୀର ବହୁ କମ ଅର୍ଥ ରସିଦ କଟାଯାଉଛି । ଜେଲରେ ଥିବା ଗାଈଙ୍କ ଖାଦ୍ୟପେୟ ପାଇଁ ଦାନା ଏବଂ ଅନ୍ୟ ଖର୍ଚ୍ଚ ବାବଦରେ କମ୍ ଖର୍ଚ୍ଚ କରି ଅଧିକ ସରକାରୀ ତହବିଲରୁ ନିଆଯାଉଛି । ପ୍ରତ୍ୟେକ ସପ୍ତାହରେ କଏଦୀମାନଙ୍କୁ ନିୟମିତ ଭାବେ ସାବୁନ ଦିଆଯାଉନାହିଁ । କେନ୍ଦୁଝର ପରି ଏକ ବଡ ଜେଲରେ ବର୍ଷର ସବୁ ସମୟରେ ୫୫୦ରୁ ଅଧିକ କଏଦୀ ରହୁଥିବାବେଳେ ଗତ ୬ ମାସ ହେବ ଜେଲ ଅଧିକ୍ଷକ ପଦବୀ ଖାଲି ପଡିଛି । ଅନ୍ୟ ପଟରେ ନିୟମ ଅନୁଯାୟୀ ଜେଲରମାନଙ୍କ ବଦଳି ୩ ବର୍ଷରେ ହେବାର ନିୟମ ଥିବାବେଳେ କେନ୍ଦୁଝର ଜେଲର ୩ ବର୍ଷରୁ ଅଧିକ ସମୟ ଧରି ରହିଛନ୍ତି । ରାଜ୍ୟର ବିଭିନ୍ନ ଜେଲରେ ବହୁ ଜେଲ ଅଧିକ୍ଷକ ପଦବୀ ଖାଲି ପଡିଥିବାବେଳେ ଏହି ପଦବୀ ପୂରଣ ହେଉନଥିବାରୁ ଅନେକ ଜେଲରେ ବ୍ୟାପକ ଅବ୍ୟବସ୍ଥା ପରିଲକ୍ଷିତ ହେଉଛି ।