ଦକ୍ଷିଣ ଆଫ୍ରିକାରୁ ବିଶ୍ୱକୁ ସନ୍ଦେଶ 

ସୌମେନ୍ଦ୍ର ଜେନା : ଚଳିତବର୍ଷ ଜି୨୦ ରାଷ୍ଟ୍ର ସମୂହର ୨୦ତମ ଶିଖର ବୈଠକ ଦକ୍ଷିଣ ଆଫ୍ରିକାର ଜୋହାନ୍ସବର୍ଗଠାରେ  ସଫଳତାର ସହ ଅନୁଷ୍ଠିତ ହୋଇଯାଇଛି । ୨୨-୨୩ ନଭେମ୍ବର ୨୦୨୫ରେ ଅନୁଷ୍ଠିତ ଏହି ବୈଠକରେ ଏହାର ସଦସ୍ୟରାଷ୍ଟ୍ର ଏବଂ ନିମନ୍ତ୍ରିତ ରାଷ୍ଟ୍ରଗୁଡିକର ନେତାମାନେ ଅଂଶଗ୍ରହଣ କରିଥିଲେ । ଆମେରିକାର ରାଷ୍ଟ୍ରପତି ଡୋନାଲଡ୍‌ ଟ୍ରମ୍ପ ବେଇଜ୍ଜତି ହେବାର ଭୟରେ ଦକ୍ଷିଣ ଆଫ୍ରିକାର ରାଷ୍ଟ୍ରପତିଙ୍କ ବିରୁଦ୍ଧରେ ବର୍ଣ୍ଣବୈଷମ୍ୟ ଘୃଣା ଓ ହିଂସାର ଅଭିଯୋଗ ଆଣି ବୈଠକରେ ଯୋଗଦାନ କରିନଥିଲେ। ରୁଷିଆର ରାଷ୍ଟ୍ରପତି ଭ୍ଲାଦିମିର ପୁତିନ ଏବଂ ଚୀନର ରାଷ୍ଟ୍ରପତି ସି ଜିନପିଙ୍ଗ ମଧ୍ୟ ଅସୁବିଧା ଯୋଗୁ ଏହି ବୈଠକରେ ଯୋଗଦାନ କରିନଥିଲେ ମଧ୍ୟ ସେମାନଙ୍କ ପ୍ରତିନିଧି ଭାବେ ରାଷ୍ଟ୍ରର ଉପନେତାଙ୍କୁ ପଠାଇଥିଲେ । ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ ରାମଫୋସା ଏହି ବୈଠକରେ ଅଧ୍ୟକ୍ଷତା କରିଥିଲେ । ୨୪ ନଭେମ୍ବର ଦିନ ମିଳିତ ଘୋଷଣାନାମା ପ୍ରକାଶ ପାଇଥିଲା । ୩୦ ନଭେମ୍ବର ୨୦୨୫ ଯାଏଁ ଦକ୍ଷିଣ ଆଫ୍ରିକା ହାତରେ ଜି୨୦ର ଅଧ୍ୟକ୍ଷ ଦାୟିତ୍ୱ ରହିଥିଲା ବେଳେ ପରବର୍ତ୍ତୀ କାଳରେ ତାହା ଆମେରିକା ହାତକୁ ଯିବ । ଏଥିରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଂଶଗ୍ରହଣ କରିଥିଲେ । 

   

    ଜି୨୦ ସଦସ୍ୟ ରାଷ୍ଟ୍ର ଭାବେ ଆର୍ଜେଣ୍ଟିନା, ଅଷ୍ଟ୍ରେଲିଆ, ବ୍ରାଜିଲ, କାନାଡା, ଚୀନ, ଫ୍ରାନ୍ସ, ଜର୍ମାନୀ, ଭାରତ, ଇଣ୍ଡୋନେସିଆ, ଇଟାଲୀ, ଜାପାନ, ଦକ୍ଷିଣ କୋରିଆ, ମେକ୍ସିକୋ, ରୁଷିଆ, ସାଉଦି ଆରବ, ଦକ୍ଷିଣ ଆଫ୍ରିକା, ତୁର୍କୀ, ଆମେରିକା, ବ୍ରିଟେନ, ୟୁରୋପୀୟ ସଂଘ, ଆଫ୍ରିକୀୟ ସଂଘ ଆଦି ରହିଛନ୍ତି । ଜି୨୦ର ଅଧ୍ୟକ୍ଷ ରାଷ୍ଟ୍ରକୁ ଏହାର ଶିଖର ବୈଠକ ଆୟୋଜନ କ୍ଷମତା ଦିଆଯାଇଥାଏ । ଜି୨୦ରେ ସମାନ୍ତରାଳ ଭାବେ ଦୁଇଟି ଗୋଷ୍ଠୀର କାର୍ଯ୍ୟଲିଥାଏ । ଗୋଟିଏ ହେଲା ଆର୍ôଥକ ଧାରା , ଅନ୍ୟଟି ସେର୍ପାଧାରା । ଆର୍ôଥକ ଧାରାର ଆଲୋଚନାରେ ସଦସ୍ୟ ରାଷ୍ଟ୍ର ସମୂହର ଅର୍ଥମନ୍ତ୍ରୀ ଏବଂ କେନ୍ଦ୍ରୀୟ ବ୍ୟାଙ୍କର ଗଭର୍ଣ୍ଣରମାନେ ଥିଲାବେଳେ ସେର୍ପା ଧାରାର ଆଲୋଚନାରେ ରାଷ୍ଟ୍ରମୁଖ୍ୟମାନଙ୍କ ପ୍ରତିନିଧି ରହିଛନ୍ତି । ଆର୍ଥକ ଗୋଷ୍ଠୀର ଆଲୋଚନା ଅର୍ଥ ମନ୍ତ୍ରଣାଳୟ ଦ୍ୱାରା ହୋଇଥାଏ । ଏହି ଗୋଷ୍ଠୀର ଆଲୋଚନା ନିୟମିତ ଭାବେ ଅଧ୍ୟକ୍ଷ ବଦଳିବା ସହ ସଂପୃକ୍ତ ରାଷ୍ଟ୍ରରେ ହୋଇଥାଏ । ସେର୍ପାଙ୍କ ବୈଠକରେ ତତ୍‌କାଳୀନ ଗୁରୁତ୍ୱପୂର୍ଣ୍ଣ ବିଷୟଗୁଡିକ ଆଲୋଚନାରେ ସ୍ଥାନ ପାଇଥାଏ, ଯେଉଁଥିରେ ସଦସ୍ୟ ରାଷ୍ଟ୍ରଗୁଡିକ ନିଜର ଆଭିମୁଖ୍ୟ ପ୍ରକାଶ କରିଥାନ୍ତି । ଏହାଛଡା ଅନ୍ୟ ଗୋଷ୍ଠୀଗତ ଆଲୋଚନାରେ ସିଭିଲ ସୋସାଇଟୀ, ସାଂସଦ, ବୁଦ୍ଧିଜୀବୀ, ମହିଳା, ଯୁବଗୋଷ୍ଠୀ, ଶ୍ରମିକ, ବ୍ୟବସାୟୀ, ଗବେଷକଗଣ ଜି୨୦ ରାଷ୍ଟ୍ରଗୁଡିକରୁ ଯୋଗଦାନ କରିଥାନ୍ତି । ଏମାନଙ୍କର ବୈଠକ ଭିନ୍ନ ଭିନ୍ନ ଗୋଷ୍ଠୀର ଭିନ୍ନ ଭିନ୍ନ ସମୟରେ ଆୟୋଜିତ ହୋଇଥାଏ । ଜି୨୦ର କୋଣସି ସ୍ଥାୟୀ ସଚିବାଳୟ ଖୋଲାଯାଇ ନାହିଁ । ଏହା ସବୁବେଳେ ତ୍ରିଶକ୍ତିକୁ ନେଇ କାର୍ଯ୍ୟକରେ । ପୂର୍ବ ଅଧ୍ୟକ୍ଷ ରାଷ୍ଟ୍ର, ଅଧ୍ୟକ୍ଷ ରାଷ୍ଟ୍ର ଏବଂ ପରବର୍ତ୍ତୀ ଅଧ୍ୟକ୍ଷ ରାଷ୍ଟ୍ରର ତ୍ରିଶକ୍ତି ଜି୨୦କୁ ଆଗକୁ ନେଇଥାନ୍ତି । ଜି୨୦ର ଅଧ୍ୟକ୍ଷ ୧ ଡିସେମ୍ବରରୁ ପରବର୍ତ୍ତୀ ବର୍ଷ ୩୦ ନଭେମ୍ବର ପର୍ଯ୍ୟନ୍ତ ଦାୟିତ୍ୱ ହାତରେ ରଖିଥାନ୍ତି । ଜି୨୦ର ଅଧ୍ୟକ୍ଷ ବିଶ୍ୱର ଅନେକଗୁଡିଏ ସମସ୍ୟା ଏବଂ ତକ୍ରାଳିକ ବିଷୟଗୁଡିକ ଯେପରି ଜଳବାୟୁ ପରିବର୍ତ୍ତନ, ଅସମାନତା, ଦାରିଦ୍ର୍ୟ, ଅନାହାର, ବେରୋଜଗାରୀ, ଟେକ୍ନୋଲୋଜୀ ଯୋଗୁ ପରିବର୍ତ୍ତନ, ବିଶ୍ୱର ଅସ୍ଥିରତା ପରି ଅନେକଗୁଡିଏ ବିଷୟକୁ ଆଲୋଚନାରେ ପ୍ରାଧାନ୍ୟ ଦେଇଥାନ୍ତି । ଜାତିସଂଘର ଲକ୍ଷ୍ୟ ଅନୁଯାୟୀ ଜି୨୦ର ଅଧ୍ୟକ୍ଷ ବିକାଶମୁଖୀ କାର୍ଯ୍ୟକୁ ତ୍ୱରାନ୍ୱୀତ କରିବା ପାଇଁ ପ୍ରୟାସ କରିଥାନ୍ତି । ୨୦୨୫ ପାଇଁ ଜି୨୦ର ବିଷୟ ଥିଲା ଏକତା ସମାନତା ଓ ନିରନ୍ତର ବିକାଶ । ଜୋହାନ୍ସବର୍ଗର ଏକ୍ସପୋ ସେଣ୍ଟରଠାରେ ଅନୁଷ୍ଠିତ ଏହି ଶିଖର ବୈଠକରେ ଯେଉଁ ସବୁ ନିମନ୍ତ୍ରିତ ରାଷ୍ଟ୍ର ଯୋଗଦାନ କରିଥିଲେ ସେମାନେ ହେଲେ ଅଲଜେରିଆ, ଇଜିପଟ୍‌, ଇଥିଓପିଆ, ଫିନଲାଣ୍ଡ, ଆୟର୍ଲାଣ୍ଡ, ଜାମାଇକା, ମାଲେସିଆ, ନାମିବିଆ, ନେଦରଲାଣ୍ଡ, ନାଇଜେରିଆ, ନରୱେ, କାତାର, ସିଓରାଲିଓନ୍‌, ସିଙ୍ଗାପୁର, ସ୍ପେନ, ୟୁନାଇଟେଡ୍‌ ଆରବ ଏମିରେଟସ, ଭିଏତନାମ, ଜିମ୍ବାୱେ । ଏହାଛଡା ଏହାର ସଦସ୍ୟ ରାଷ୍ଟ୍ର ସମୂହ ହେଲେ ଆର୍ଜେଣ୍ଟିନା, ଅଷ୍ଟ୍ରେଲିଆ, ବ୍ରାଜିଲ, କାନାଡା, ଚୀନ, ଫ୍ରାନ୍ସ, ଜର୍ମାନୀ, ଭାରତ, ଇଣ୍ଡୋନେସିଆ, ଇଟାଲୀ, ଜାପାନ, ଦକ୍ଷିଣ କୋରିଆ, ମେକ୍‌ସିକୋ, ରୁଷିଆ, ସାଉଦି ଆରବ, ଦକ୍ଷିଣ ଆଫ୍ରିକା, ତୁର୍କୀ, ବ୍ରିଟେନ, ଆମେରିକା ।