ଦିଲ୍ଲୀ ପୁଲିସର ଏନକାଉଣ୍ଟର : ୪ ବିହାରୀ ଗ୍ୟାଙ୍ଗଷ୍ଟର ସଫା

ନୂଆଦିଲ୍ଲୀ : ଦିଲ୍ଲୀର ରୋହିଣୀରେ ଏକ ବଡ଼ ଏନକାଉଣ୍ଟର ହୋଇଛି । ଯେଉଁଥିରେ ଆଗାମୀ ବିହାର ନିର୍ବାଚନ ପୂର୍ବରୁ ରାଜ୍ୟରେ ଆତଙ୍କ ଖେଳାଇବାକୁ ଷଡ଼ଯନ୍ତ୍ର କରୁଥିବା ବିହାରର ଚାରି ଜଣ ମୋଷ୍ଟ ୱାଣ୍ଟେଡ୍‌ ଗ୍ୟାଙ୍ଗଷ୍ଟରଙ୍କ ମୃତ୍ୟୁ ଘଟିଛି । ଅଧିକାରୀଙ୍କ ଅନୁଯାୟୀ, ବୁଧବାର ରାତି ପ୍ରାୟ ସାଢେ ୨ଟା ସମୟରେ ଏହି ଭୟଙ୍କର ଗୁଳିବିନିମୟ ହୋଇଥିଲା । ଦିଲ୍ଲୀ ପୁଲିସ କ୍ରାଇମବ୍ରାଞ୍ଚ ଓ ବିହାର ପୁଲିସର ଏକ ମିଳିତ ଟିମ ଏବଂ ୪ ଜଣ ସନ୍ଦିଗ୍ଧ ଅପରାଧୀଙ୍କ ମଧ୍ୟରେ ଗୁଳିବିନିମୟ ହୋଇଥିଲା । ନିହତ ଗ୍ୟାଙ୍ଗଷ୍ଟରଙ୍କୁ ଚିହ୍ନଟ କରାଯାଇଛି । ସେମାନେ ହେଲେ ମନୋଜ ପାଠକଙ୍କ ପୁଅ ରଞ୍ଜନ ପାଠକ (୨୫), ବିମଲେଶ ମହତୋ ଓରଫ ବିମଲେଶ ସାହଣୀ (୨୫), ମନୀଷ ପାଠକ (୩୩), ଅମନ ଠାକୁର (୨୧) । ପୁଲିସ କହିଛି ଯେ ଏହି ୪ ଜଣ ବିହାରରେ ବହୁ ହତ୍ୟା ସମେତ ଅନେକ ଜଘନ୍ୟ ଅପରାଧରେ ଜଡିତ ଥିଲେ ବୋଲି ଏକ ସାମ୍ବାଦିକ ସମ୍ମିଳନୀରେ ଯୁଗ୍ମ ପୁଲିସ କମିଶନର (ଅପରାଧ) କହିଛନ୍ତି । 
ରଞ୍ଜନ ପାଠକ ସୀତାମାଢ଼ିର ଜଣେ କୁଖ୍ୟାତ ଗ୍ୟାଙ୍ଗଷ୍ଟର । ଯିଏ ତାଙ୍କ ସହଯୋଗୀମାନଙ୍କ ସହିତ ନିର୍ବାଚନ ପୂର୍ବରୁ ବିହାରରେ ହିଂସା ଘଟାଇବା ପାଇଁ ଯୋଜନା କରୁଥିଲେ ବୋଲି ଅଭିଯୋଗ ହୋଇଥିଲା । ପାଠକ "ସିଗ୍ମା ଆଣ୍ଡ କମ୍ପାନୀ’ ନାମକ ଏକ ଗ୍ୟାଙ୍ଗର ନେତୃତ୍ୱ ନେଇଥିଲେ, ଯାହା ନେପାଳରୁ କାର୍ଯ୍ୟ କରୁଥିଲା ଓ ନେପାଳ  ସୀମା ପାର କରି ଅପରାଧ ଘଟାଉଥିଲା ।

    ସୂତ୍ର ଅନୁଯାୟୀ ଏହି ଗ୍ୟାଙ୍ଗ ସମ୍ପ୍ରତି ବିହାର ପୁଲିସର ରାଡାରକୁ ଆସିଥିଲା । ଏକ ଅଡିଓ କଲ୍‌ ପ୍ରକାଶ ପାଇଥିଲା । ଯେଉଁଥିରେ ନିର୍ବାଚନ ପୂର୍ବରୁ ବିହାରରେ ଆତଙ୍କ ସୃଷ୍ଟି କରିବା ପାଇଁ ସେମାନଙ୍କର ଯୋଜନା ଥିଲା । ବିହାର ପୁଲିସ ପାଞ୍ଚଟି ପଛକୁ ପଛ ହତ୍ୟା ଘଟଣାରେ ଏହି ଗ୍ୟାଙ୍ଗକୁ ଖୋଜୁଥିଲା । ଯାହା ସମଗ୍ର ଜିଲ୍ଲାରେ ଭୟ ସୃଷ୍ଟି କରିଥିଲା । ପାଠକଙ୍କ ଗ୍ୟାଙ୍ଗ ପ୍ରାୟ ୨୦-୨୫ ଦିନ ପୂର୍ବରୁ ବ୍ରହ୍ମର୍ଷି ସମାଜର ଜିଲ୍ଲା ସଭାପତି ଗଣେଶ ଶର୍ମାଙ୍କୁ ହତ୍ୟା କରିଥିବା ଅଭିଯୋଗ ହୋଇଛି । ରଞ୍ଜନ ପାଠକର ଗିରଫଦାରୀ ପାଇଁ ସୂଚନାକାରୀଙ୍କୁ ୫୦ ହଜାର ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିଲା । ଡିଜିପି କହିଛନ୍ତି ଯେ ରଞ୍ଜନ ପାଠକ ଓ ତାଙ୍କ ଗ୍ୟାଙ୍ଗ ଗତ ଛଅ ବର୍ଷ ଧରି ସକ୍ରିୟ ଥିଲେ । ସେମାନେ ଠିକା ହତ୍ୟାକାରୀ ଭାବରେ ଜଣାଶୁଣା ଥିଲେ । ବିହାରର ସୀତାମାଢ଼ି ଜିଲ୍ଲାରେ ପାଞ୍ଚଟି ହତ୍ୟା କରି ସେମାନେ ଆତଙ୍କ ସୃଷ୍ଟି କରିଥିଲେ । ପାଠକ, ଯିଏକି ତାଙ୍କ ନିଷ୍ଠୁରତା ଓ ସାହସିକତା ପାଇଁ ଜଣାଶୁଣା, ହତ୍ୟା କରିବା ପରେ ତାଙ୍କର ବାୟୋଡାଟା ଗଣମାଧ୍ୟମକୁ ପଠାଉଥିଲା ।