ପୀତବାସଙ୍କ ପରିବାରକୁ ହତ୍ୟା ଧମକ : ପୁଲିସ୍‌ର ୨୪ ଘଣ୍ଟିଆ ସୁରକ୍ଷା

ଭୁବନେଶ୍ୱର : ଆଇନଜୀବୀ ପୀତବାସ ପଣ୍ଡାଙ୍କ ହତ୍ୟାର ପ୍ରାୟ ଗୋଟିଏ ମାସ ପରେ ତାଙ୍କ ପରିବାରକୁ ମିଳିଛି ହତ୍ୟା ଧମକ । ତାଙ୍କ ପତ୍ନୀ ଅଭିଯୋଗ କରିଛନ୍ତି ଯେ ତାଙ୍କୁ ଓ ତାଙ୍କ ପୁଅକୁ ଅଜ୍ଞାତ ଲୋକଙ୍କଠାରୁ ହତ୍ୟା ଧମକ ମିଳୁଛି । ସମାନ ନମ୍ବରରୁ ଦୁଇଟି ଫୋନ୍‌ କଲ୍‌ ମାଧ୍ୟମରେ ଦିଆଯାଇଥିବା ଧମକରେ ମୁଖ୍ୟ ଅଭିଯୁକ୍ତ ତଥା ପୂର୍ବତନ ବିଜେଡି ବିଧାୟକ ବିକ୍ରମ ପଣ୍ଡାଙ୍କ ସପକ୍ଷରେ ଅପମାନଜନକ ଭାଷା ଏବଂ ଗାଳି କରାଯାଇଛି । ସ୍ଥାନୀୟ ପୁଲିସ ଷ୍ଟେସନରେ ଦାଖଲ ହୋଇଥିବା ଅଭିଯୋଗ ଅନୁଯାୟୀ, ପ୍ରଥମେ ପୀତବାସଙ୍କ ପୁଅ ଗୋଟିଏ କଲ ପାଇଥିଲେ, ତାଙ୍କୁ ଧମକ ଦିଆଯାଇଥିଲା ଏବଂ ପରିବାର ମାମଲା ଜାରି ରଖିଲେ ହତ୍ୟା କରାଯିବ ବୋଲି ଚେତାବନୀ ଦିଆଯାଇଥିଲା । ଅନ୍ୟ ଏକ ଫୋନରେ ସେହି କଲର ପଣ୍ଡାଙ୍କ ସ୍ତ୍ରୀଙ୍କୁ ଡାଏଲ କରିଥିଲେ ଏବଂ ସେମାନଙ୍କୁ ହତ୍ୟା କରିବାକୁ ଧମକ ଦେଇଥିଲେ ବୋଲି ଅଭିଯୋଗ ହୋଇଥିଲା । କଲର ତାଙ୍କୁ ଏହା ମଧ୍ୟ କହିଥିଲେ ଯେ ଯଦି କେସ୍‌ ପ୍ରତ୍ୟାହାର ନକରିବ  ସେ ଏବଂ ତାଙ୍କ ପୁଅ ବର୍ତ୍ତମାନ ଟାର୍ଗେଟରେ ଅଛନ୍ତି ଏବଂ ପୀତବାସଙ୍କ ପରି ତୁମମାନଙ୍କୁ ବି ହତ୍ୟା କରାଯିବ ।

     ପୀତବାସଙ୍କ ସାନ ଭାଇ ପୂର୍ଣ୍ଣ ଚନ୍ଦ୍ର ପଣ୍ଡା ମଧ୍ୟ ଅପରାଧ ସିନ ରିକ୍ରିଏସନ  ଦିନ ଧମକପୂର୍ଣ୍ଣ ଫୋନ୍‌ ପାଇଥିବା ଦାବି କରିବାର କିଛି ଦିନ ପରେ ଏହି ଘଟଣା ଘଟିଛି । ଏନେଇ ସାମ୍ବାଦିକ ସମ୍ମିଳନୀ କରି କହିବା ପରେ ତତ୍ପର ହୋଇ ଉଠିଛି ପ୍ରଶାସନ । ତାଙ୍କ ପରିବାରକୁ ୨୪ ଘଣ୍ଟିଆ ପୁଲିସ ସୁରକ୍ଷା ଯୋଗାଇ ଦିଆଯାଇଛି । ତାଙ୍କ ଘର ଚାରିପାଖରେ ଦିନରାତି ସାଧା ପୋଷାକରେ ପୁଲିସ ମୁତୟନ ରହିବେ । ହତ୍ୟା ଧମକ ଆସିଥିବା ଫୋନକୁ ନେଇ ପୁଲିସ ମଧ୍ୟ ତନାଘନା ଆରମ୍ଭ କରିଛି । ଏହି ମାମଲାରେ ଏପର୍ଯ୍ୟନ୍ତ ୧୬ ଜଣଙ୍କୁ ଗିରଫ କରାଯାଇଛି । ଏହି ହତ୍ୟାକାଣ୍ଡକୁ ନେଇ ବ୍ରହ୍ମପୁର ଓକିଲ ଦୁଇଭାଗରେ ବିଭକ୍ତ ହୋଇଛନ୍ତି । ମୁଖ୍ୟ ଅଭିଯୁକ୍ତ ତଥା ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କ ସପକ୍ଷରେ ୪୦ ଜଣ ଓକିଲ ସେ ନିର୍ଦ୍ଦୋଷ ବୋଲି କହି ବ୍ରହ୍ମପୁର ଏସ୍‌ଡିଜିଏମ୍‌ କୋର୍ଟରେ ତାଙ୍କ ଜାମିନ ପାଇଁ ଆବେଦନ କରିଛନ୍ତି । ଏହାର ଦିନକ ପରେ ବିକ୍ରମ ପଣ୍ଡାଙ୍କ ବିରୋଧରେ ୨୦୯ ଜଣ ଓକିଲ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କୋର୍ଟରେ ଏକ ପିଟିସନ୍‌ ଦାଖଲ କରିଛନ୍ତି ।