ପ୍ରେମାନନ୍ଦଜୀ ମହାରାଜଙ୍କୁ କିଡନୀ ଦେବାକୁ ଲମ୍ବା ଲାଇନ୍‌

ସେଲିବ୍ରିଟିଙ୍କଠାରୁ ସାଧାରଣ ଭକ୍ତ ପର୍ଯ୍ୟନ୍ତ, ସାଧାରଣ ଜନତାମାନେ ଭାରତର ସବୁଠାରୁ ପୂଜ୍ୟ ଆଧ୍ୟାତ୍ମିକ ବ୍ୟକ୍ତିତ୍ୱ ପ୍ରେମାନନ୍ଦ ଜୀ ମହାରାଜଙ୍କ ସ୍ୱାସ୍ଥ୍ୟ ସମ୍ବନ୍ଧୀୟ ସୂଚନା ପାଇଁ ନିରନ୍ତର ଚେଷ୍ଟା କରୁଛନ୍ତି । ତାଙ୍କ ଆରୋଗ୍ୟ ପାଇଁ ଦେଶ ବିଦେଶରେ ଲୋକଙ୍କ ପ୍ରାର୍ଥନା ଜାରି ରହିଛି । ମହାରାଜ ସମ୍ପୂର୍ଣ୍ଣ କିଡନୀ ବିଫଳତା ସହିତ ଜୀବନ ସଂଘର୍ଷ ଜାରି ରଖିଛନ୍ତି । ତାଙ୍କ ପ୍ରତି ଏତେ ସମ୍ମାନ ଓ ଭକ୍ତି ଯେ ତାଙ୍କ ଅନୁଗାମୀମାନେ ପ୍ରେମାନନ୍ଦ ଜୀ ମହାରାଜଙ୍କୁ ସେମାନଙ୍କର କିଡନୀ ପ୍ରଦାନ କରିବାକୁ ଆଗେଇ ଆସିଥିଲେ ମଧ୍ୟ  ବୃନ୍ଦାବନସ୍ଥିତ ସନ୍ଥ ଏହାକୁ ଗ୍ରହଣ କରିବାକୁ ମନା କରିଦେଇଛନ୍ତି । ସେ କହିଛନ୍ତି ଯେ, ମୁଁ ଚାହେ ନାହିଁ ମୋ ଯୋଗୁଁ କେହି କଷ୍ଟ ଓ ଯନ୍ତ୍ରଣା ଭୋଗୁ । କଳିଯୁଗରେ ସବୁଠୁ ଆଶ୍ଚର୍ଯ୍ୟ ଓ ଅଲୌକିକତା ହେଉଛି ଯେ, ମହାରାଜଙ୍କ କିଡନୀ ଦୀର୍ଘ ୨୦ ବର୍ଷ ତଳୁ ନଷ୍ଟ ହୋଇଯାଇଛି । ଏହା ଜଣାପଡିବା ପରେ ଡାକ୍ତର ତାଙ୍କୁ ଆଉ କିଛି ମାସ ବଞ୍ôଚବେ ବୋଲି ଘୋଷଣା କରିଥିଲେ । କିନ୍ତୁ ଏସବୁକୁ ମାତ ଦେଇ ଆଜି ପର୍ଯ୍ୟନ୍ତ ମହାରଜା ଜୀବିତ ରହିବା ସହ ବିଜ୍ଞାନକୁ ଖୋଲା ଚ୍ୟାଲେଞ୍ଜ ଦେଇଛନ୍ତି । ଆଉ ତାଙ୍କର ଜୀବନକୁ ସମାଜର, ସାଧାରଣ ବ୍ୟକ୍ତିର ଉନ୍ନତି ପାଇଁ ସଂପୂର୍ଣ୍ଣ ଅର୍ପଣ କରିଦେଇଛନ୍ତି । ଖାଲି ହିନ୍ଦୁ ନୁହନ୍ତି, ମୁସଲିମ, ଖ୍ରୀଷ୍ଟିଆନ ଓ ଅନ୍ୟାନ୍ୟ ଧର୍ମାଲମ୍ବିମାନେ ତାଙ୍କୁ ସମ୍ମାନ ଓ ଆଦର କରନ୍ତି ।

 ଭାରତରେ କିଡନୀ ଦାନ ଓ ଟିସୁ ପ୍ରତିରୋପଣ ଆଇନ ଅନୁଯାୟୀ ନିୟନ୍ତ୍ରିତ ହୁଏ । କେବଳ ନିକଟ ସମ୍ପର୍କୀୟମାନେ କିଡନୀ ଦାନ କରିପାରିବେ । ଏଥିପାଇଁ ଚିକିତ୍ସା ଓ ସରକାରୀ କର୍ତ୍ତୃପକ୍ଷଙ୍କ ଅନୁମୋଦନ ଆବଶ୍ୟକ । କାନପୁରରେ ଜନ୍ମଗ୍ରହଣ କରିଥିବା ଅନିରୁଦ୍ଧ କୁମାର ପାଣ୍ଡେ ୧୩ ବର୍ଷ ବୟସରେ ସାଂସାରିକ ଜୀବନ ତ୍ୟାଗ କରିଥିଲେ ଓ ବୃନ୍ଦାବନର ରାଧାବଲ୍ଲଭୀ ସମ୍ପ୍ରଦାୟରେ ଯୋଗ ଦେଇଥିଲେ । ରାଧା-କୃଷ୍ଣଙ୍କ ପ୍ରତି ନିଜ ଜୀବନ ଉତ୍ସର୍ଗ କରିଥିଲେ । ବର୍ଷ ବର୍ଷ ଧରି ପ୍ରେମାନନ୍ଦ ଜୀ ମହାରାଜ ଆଧ୍ୟାତ୍ମିକ ଜ୍ଞାନ ପାଇଁ ଆଜି ସେ ଘରେ ଘରେ ସମସ୍ତଙ୍କ ଲୋକପ୍ରିୟ ହୋଇଯାଇଛନ୍ତି । ସତସଙ୍ଗ ମାଧ୍ୟମରେ ତାଙ୍କ ଶିକ୍ଷା ପ୍ରଦାନ କରାଯାଏ । ସେ ପ୍ରେମ, ନମ୍ରତା ଓ ଈଶ୍ୱରଙ୍କ ନିକଟରେ ଆତ୍ମସମର୍ପଣ ଉପରେ ଗୁରୁତ୍ୱାରୋପ କରନ୍ତି । ପ୍ରେମାନନ୍ଦ ଜୀ ମହାରାଜ ଭକ୍ତି ଯୋଗ ଏବଂ ରାଧା ଓ କୃଷ୍ଣଙ୍କ ମଧ୍ୟରେ ଦିବ୍ୟ ପ୍ରେମ ଉପରେ କେନ୍ଦ୍ରିତ ରସିକ ପରମ୍ପରାରେ ଗଭୀର ନିମଜ୍ଜିତ ହେବା ପାଇଁ ଜଣାଶୁଣା । ସେ ବ୍ରହ୍ମଚର୍ଯ୍ୟ, ସରଳତା ଓ ଭୌତିକ କାମନାରୁ ନିରପେକ୍ଷତା ଉପରେ ମଧ୍ୟ ଗୁରୁତ୍ୱାରୋପ କରନ୍ତି । ବିରାଟ କୋହଲି, ଅନୁଷ୍କା ଶର୍ମା, ହେମା ମାଳିନୀ, ଆଶୁତୋଷ ରାଣା, ଏଲଭିଶ ଯାଦବଙ୍କ ପରି ସେଲିବ୍ରିଟି ଓ ସାର୍ବଜନୀନ ବ୍ୟକ୍ତିତ୍ୱମାନେ ତାଙ୍କ ବୃନ୍ଦାବନ ଆଶ୍ରମ ପରିଦର୍ଶନ କରିଛନ୍ତି ।

 ଗତ କିଛି ବର୍ଷ ମଧ୍ୟରେ ସୋସିଆଲ ମିଡିଆ ଓ ୟୁଟ୍ୟୁବରେ ପ୍ରେମାନନ୍ଦ ମହାରାଜଙ୍କ ଉପସ୍ଥିତି ତାଙ୍କର ପ୍ରସାରକୁ ଆହୁରି ବୃଦ୍ଧି କରିଛି । ଯାହା ତାଙ୍କୁ ଘରେ ଘରେ ପରିଚିତ କରାଇଛି । ସମ୍ପ୍ରତି ସେ ଶଯ୍ୟାଶାୟୀ ହେବା ପୂର୍ବରୁ ସନ୍ଥ ପ୍ରତିଦିନ ରାତି ୨ଟାରେ ବୃନ୍ଦାବନରେ ପଦଯାତ୍ରାରେ ବାହାରୁଥିଲେ । ତାଙ୍କର ପଦଯାତ୍ରାରେ ହଜାର ହଜାର ଭକ୍ତ ତାଙ୍କ ଦର୍ଶନ ଓ ଆଶୀର୍ବାଦ ପାଇଁ ଏକାଠି ହେଉଥିଲେ । କିନ୍ତୁ ଗତ ସପ୍ତାହକ ତଳେ ତାଙ୍କ ସ୍ୱାସ୍ଥ୍ୟାବସ୍ଥା ଖରାପ ହୋଇଯାଇଥିଲା । ବର୍ତ୍ତମାନ ସେ କିଛିଟା ସୁସ୍ଥତା ଅନୁଭବ କରୁଥିବା ବେଳେ ପଦଯାତ୍ରାରେ ଯାଇନପାରି ତାଙ୍କ ଆଶ୍ରମରେ ଭକ୍ତଙ୍କୁ ଦର୍ଶନ ହେଉଛନ୍ତି ।