ବିଜେପି ବିରୋଧରେ ରଣହୁଙ୍କାର ଦେବା ସମୟ: ଅରୁଣ ସାହୁ
Rasmita Behera
ବିଜେଡିର ଦଳୀୟ ବିବାଦ ଭିତରେ ମୁହଁ ଖୋଲିଲେ ଦଳର ସିନିୟର ଓ ଜୁନିୟର ନେତା । ଭେଟେରାନ୍ ନେତା ଅରୁଣ ସାହୁ କହିଲେ, ଦଳ ଭିତରେ ସଂସ୍କାର ଓ ବିଜେପି ବିରୋଧରେ ରଣହୁଙ୍କାର ଦେବା ସମୟ ଆସିଛି । ରାସ୍ତାରେ ଯିବାବେଳେ ଛୋଟ ଛୋଟ ଭୁଲ୍ ହୁଏ, କିନ୍ତୁ ତାକୁ ସୁଧାରିବାର ଆବଶ୍ୟକତା ରହିଛି । ନବୀନ ଆମର ଏକମାତ୍ର ନେତା । ତାଙ୍କ ନେତୃତ୍ବରେ ଦଳ ଚାଲିଛି, ଏଥିରେ କୌଣସି ଦ୍ବିମତ ନାହିଁ । ଅର୍ଥାତ୍ ଅରୁଣ ସାହୁ ପରୋକ୍ଷରେ, ଦଳ ଭିତରେ ସଂସ୍କାର ନଥିବା କଥା ସଙ୍କେତ ଦେଇଛନ୍ତି । ଆଉ ବିଜେଡିର ଆଭିମୁଖ୍ୟକୁ ନେଇ ମଧ୍ୟ ପ୍ରଶ୍ନ ଚିହ୍ନ ଛିଡ଼ା କରିଛନ୍ତି । ୱାକଫ୍ ବିଲରେ ଯେତେବେଳେ ବିଜେଡିର ସାଂସଦ ସମର୍ଥନ ଦେଇଛନ୍ତି, ସେତେବେଳେ ଅରୁଣ ସାହୁ ବିଜେପି ବିରୋଧରେ ରଣହୁଙ୍କାର ଦେବା କଥା କହୁଛନ୍ତି । ସେପଟେ ଜୁନିୟର ନେତା ତଥା ପୂର୍ବତନ ବିଧାୟକ ସମ୍ବିତ ରାଉତରାୟ ମୁହଁ ଖୋଲିଛନ୍ତି । ବଡ଼ ବୟାନ ଦେଇ କହିଛନ୍ତି, ନବୀନ ପଟ୍ଟନାୟକଙ୍କୁ କ୍ଷତି ପହଞ୍ଚାଇଲେ ସ୍ବର ଉତ୍ତୋଳନ ହେବ । ନବୀନ ସୁଦୃଢ ହେବା କଥା ସମସ୍ତେ ଚାହୁଁଛନ୍ତି । ସବୁ ନେତା ଆଶା ଆଶଙ୍କା ଭିତରେ ଅଛନ୍ତି, ଯାହାର ଖୁବ୍ ଶୀଘ୍ର ଯବନିକା ପଡିବ । ଆମର ନେତା ହେଉଛନ୍ତି ନବୀନ ପଟ୍ଟନାୟକ ବୋଲି କହିଛନ୍ତି ସମ୍ବିତ ରାଉତରାୟ ।
