ଭୋଟ୍‌ ବଢ଼ାଇବ କି ଭକ୍ତଙ୍କ ରଣନୀତି?

ଭୁବନେଶ୍ୱର: କଂଗ୍ରେସିଆଙ୍କ ମନରେ ଫୁଲ୍‌ ଯୋଶ୍‌ ଭରି ଦେଇଛନ୍ତି ପିସିସି ସଭାପତି ଭକ୍ତ ଚରଣ ଦାସ । ଦାୟିତ୍ୱ ନେବା ଦିନ ଠାରୁ ସେ ଆକ୍ରମଣାତ୍ମକ ଆଭିମୁଖ୍ୟ ପୋଷଣ କରିଛନ୍ତି । ବ୍ଳକରୁ ନେଇ ବିଧାନସଭା ପର୍ଯ୍ୟନ୍ତ କଂଗ୍ରେସ ଚଳଚଞ୍ଚଳ ହୋଇଯାଇଛି । ଗଣମାଧ୍ୟମର ଶିରୋନାମାରେ ଏବେ କଂଗ୍ରେସ ହିଁ ରହିଛି  । ଗୋଟିଏ ପଟେ ମୁଖ୍ୟ ବିରୋଧୀ ଦଳ ବିଜେଡ଼ି ଦୋଛକିରେ ଥିବାରୁ ଏହାର ଫାଇଦା ନେଇଛି କଂଗ୍ରେସ  । କମ୍‌ ସଂଖ୍ୟା ସତ୍ତେ୍ୱ ବିଧାନସଭାରେ ବି ଦଳ ଭଲ ସ୍କୋର କରିଛି କହିଲେ ଅତ୍ୟୁକ୍ତି ହେବନି  । ସେପଟେ ନିଆରା ଢଙ୍ଗରେ କଂଗ୍ରେସର ଯୁବ ଓ ଛାତ୍ର ୟୁନିଟ୍‌ ମଧ୍ୟ ପ୍ରତିବାଦ, ବିକ୍ଷୋଭ ଆରମ୍ଭ କରିଦେଇଛି  । ତଥାପିବି କଂଗ୍ରେସର ଭୋଟ୍‌ ବଢ଼ିବ କି ନାହିଁ ସେନେଇ ସଂଶୟ ସୃଷ୍ଟିହେବା ସ୍ୱାଭାବିକ  ।
୨୦୦୦ରୁ କ୍ଷମତାର ସ୍ୱାଦ ଚାଖି ପାରିନାହିଁ କଂଗ୍ରେସ  । ଦଳର ସ୍ଥିତି ପ୍ରତି ନିର୍ବାଚନରେ ତଳକୁ ତଳ ଚାଲିଛି  । କଂଗ୍ରେସର ସଂଗଠନ ବି ଘୁଣ ଖାଇଯାଇଛି  । ଗତ ନିର୍ବାଚନରେ କଂଗ୍ରେସ ପୂର୍ବାପେକ୍ଷା ଭଲ ଆସନ ପାଇଥିଲେବି ଭୋଟ୍‌ ହାର କିନ୍ତୁ ନୈରାଶ୍ୟଜନକ ରହିଛି  । ଦଳର ଭୋଟ୍‌ ହାର ଏବେ ୧୩.୨୬% ଥିବାବେଳେ ଭୋଟ୍‌ ୩୪ ଲକ୍ଷରୁ କମ୍‌ ଅଛି  । ଶାସକ ବିଜେପି ଓ ବିଜେଡ଼ିର ଭୋଟ୍‌ ହାର ୪୦% ଥିବାବେଳେ ତୃତୀୟ ଦଳ ଭାବେ ବହୁ ପଛକୁ ଠେଲି ହୋଇଯାଇଛି କଂଗ୍ରେସ  । ଗତ ନିର୍ବାଚନରେ ଦଳ ଶତାଧିକ ଆସନରେ ଅମାନତ ବି ହରାଇଥିଲା  । ଏଭଳି ସ୍ଥିତିରେ ଭକ୍ତ ଦାସଙ୍କ ଉପରେ ଭରସା କରିଛନ୍ତି ରାହୁଲ ଗାନ୍ଧୀ  ।

ଗତ ଫେବୃଆରୀ ୧୧ରେ ଭକ୍ତଙ୍କୁ ପିସିସି ସଭାପତି ଭାବେ ନିଯୁକ୍ତି ମିଳିଥିଲା  । ଏହାର ସାତ ଦିନ ପରେ ଦିଲ୍ଲୀରୁ ଭକ୍ତ ଓଡ଼ିଶା ଫେରିଥିଲେ  । ସାଧାରଣତଃ ପିସିସି ସଭାପତି ନିଯୁକ୍ତି ହେବା ପରେ ଦଳୀୟ କାର୍ଯ୍ୟାଳୟରେ ବଡ଼ ଧରଣର ସଭା ହୁଏ  । କିନ୍ତୁ ଭକ୍ତ ସେଭଳି ନକରି ସେ ଭୁବନେଶ୍ୱରରେ ପହଁଚି ତୁରନ୍ତ ସଂକଳ୍ପ ଯାତ୍ରାରେ ଯାଇଥିଲେ  । ସବୁଠାରୁ ବଡ଼ କଥାଟି ହେଉଛି ବିମାନବନ୍ଦରରେ ପଡ଼ିଯିବାରୁ ତାଙ୍କର ହାତ ଭାଙ୍ଗିଯାଇଥିଲା  । ଭଙ୍ଗା ହାତରେ ସେ ତିନି ଦିନ ଧରି ସଂକଳ୍ପ ଯାତ୍ରାରେ ବାହାରିବା ଘଟଣା କଂଗ୍ରେସ କର୍ମୀମାନଙ୍କୁ ଉତ୍ସାହିତ କରିଦେଇଥିଲା  । ଖାଲି ସେତିକିନୁହେଁ ସବୁ ନେତାଙ୍କ ଉପରୁ ସେ ବହିଷ୍କାର ଓ ନିଲମ୍ବନ ଆଦେଶ ବି ଉଠାଇ ଦେଇଥିଲେ  । ଆଶା କରାଯାଉଥିଲା ବହୁ ନେତା ପୁଣି ଦଳରେ ସାମିଲ୍‌ ହୋଇଯିବେ  । କିନ୍ତୁ ସେଭଳି ବଡ଼ ଧରଣର ଘଟଣା ଦେଖିବାକୁ ମିଳିନାହିଁ  । ମାନସ ଚୌଧୁରୀ ଓ ସୁରେଶ ରାଉତରାୟ ହିଁ କେବଳ ସକ୍ରିୟ ଥିବା ଦେଖିବାକୁ ମିଳିଛି  । ଭକ୍ତ ଇତିମଧ୍ୟରେ ବରିଷ୍ଠ ନେତାମାନଙ୍କୁ ନେଇ ବେଶ୍‌ କେଇ ଦଫା ଆଲୋଚନା କରିସାରିଛନ୍ତି  । କିନ୍ତୁ ଦେଢ଼ ମାସ ପରେ ବି ସେ ନିଜର ନୂଆ ଟିମ୍‌ ଗଢ଼ି ପାରିନାହାନ୍ତି  । ଏକଥା ଉଲ୍ଳେଖ କରିବାର ଉଦ୍ଦେଶ୍ୟ ହେଉଛି ପିସିସି ସଭାପତିମାନେ ନୂଆ ଟିମ୍‌ ଗଢ଼ିବା ପରେ ହିଁ ଦଳରେ ଗୋଷ୍ଠୀକନ୍ଦଳ ଜୋର ହୋଇଥାଏ  । ଏସବୁ ଭିତରେ ଆଶ୍ୱସ୍ତର କଥା ହେଉଛି ଭକ୍ତଙ୍କ କାର୍ଯ୍ୟକାଳ ପ୍ରାୟ ଦେଢ଼ ମାସ ହୋଇଥିଲେବି କୌଣସି ଆଗଧାଡ଼ିର ନେତା ତାଙ୍କ ଉପରେ ନକରାତ୍ମକ ଟିପ୍ପଣୀ ଦେଇନାହାନ୍ତି  । ପୂର୍ବରୁ ବିଧାୟକ ଦଳ ସହ ପିସିସି ସଭାପତିଙ୍କ ସୁସମ୍ପର୍କ ସେଭଳି ଦେଖିବାକୁ ମିଳୁନଥିଲା  । ଏବେ କିନ୍ତୁ ପ୍ରତିଦିନ ବିଧାୟକ ଦଳ ସହ ଆଲୋଚନା କରୁଛନ୍ତି  । ଗତ ମାର୍ଚ୍ଚ ୭ରୁ କଂଗ୍ରେସ ନାରୀ ସୁରକ୍ଷା ପ୍ରସଙ୍ଗକୁ କାନ୍ଧେଇ ବିଧାନସଭାରେ ହଟ୍ଟଗୋଳ କରୁଛି  । ବାରବାର ଗୃହ ଅଚଳ ବି କରିଛି  । ଯେଉଁଥିପାଇଁ ସମସ୍ତ ୧୪ ବିଧାୟକ ବିଧାନସଭାରୁ ନିଲମ୍ବିତ ହୋଇଥିବାବେଳେ ଏବେବି ବିଧାନସଭା ସାମ୍ନାରେ କଂଗ୍ରେସ ବିଧାୟକଙ୍କ ଡ୍ରାମା ଦେଖିବାକୁ ମିଳୁଛି  । 

ଏସବୁ ଭିତରେ ୨୭ରେ ନାରୀ ନ୍ୟାୟ ସମାବେଶ ଚର୍ଚ୍ଚାରେ ରହିଛି  । କଂଗ୍ରେସର ପାରମ୍ପରିକ ଷ୍ଟାଇଲ୍‌ରେ ଏହି ସମାବେଶ ହୋଇଥିଲା  । ବିନା ଗଣ୍ଡଗୋଳରେ କଂଗ୍ରେସର ସମାବେଶ ହେବାର ନଜିର ହିଁ ନାହିଁ  । ତେଣୁ ଗତ ମାର୍ଚ୍ଚ ୨୭ରେ ହୋଇଥିବା ସମାବେଶରେ କଂଗ୍ରେସ କର୍ମୀ ଓ ପୁଲିସ୍‌ ମୁହାଁମୁହିଁ ହୋଇଥିଲେ  । ପୁଲିସ୍‌, କର୍ମୀ, ସାମ୍ବାଦିକ ସମସ୍ତଙ୍କ ଦେହରୁ ରକ୍ତ ବି ବାହାରିଛି  । ଏହି ପ୍ରସଙ୍ଗକୁ ନେଇ ରାଜନୀତିକ ସମୀକ୍ଷକମାନେ ଭିନ୍ନ ମତ ଦେଇଛନ୍ତି  । କେତେକ ଏହା କଂଗ୍ରେସକୁ ମାଇଲେଜ୍‌ ଦେଉଛି ବୋଲି କହୁଥିବାବେଳେ ଅନ୍ୟ କେତେକଙ୍କ ମତରେ ଏହାଦ୍ୱାରା କଂଗ୍ରେସର ନକରାତ୍ମକ ଛବି ଦେଖିବାକୁ ମିଳିଛି  । ଗାଏମୋଟ୍‌ କହିଲେ ଭକ୍ତଙ୍କ କଂଗ୍ରେସ ସିନେମାର ଟିଜର ଭଲ ହୋଇଛି  । ତେବେ ଅନେକ ସମୟରେ ଟିଜର ଓ ଟ୍ରେଲରର କ୍ରେଜ୍‌ ଥିଲେବି ସିନେମା କିନ୍ତୁ ବକ୍ସ ଅଫିସରେ ପିଟି ହୋଇଯିବାର ନଜିର ରହିଛି  । ଭକ୍ତଙ୍କ ଏଭଳି ଆକ୍ରମଣାତ୍ମକ ରଣନୀତି ଏବେ ରାଜଧାନୀ ଓ ଗଣମାଧ୍ୟମରେ ହିଁ ସୀମିତ ରହିଛି  । ଏହାଦ୍ୱାରା ଭୋଟ୍‌ କେତେ ବଢ଼ିବ ତାହା ଉପରେ ହିଁ କଂଗ୍ରେସର ଭବିଷ୍ୟତ ନିର୍ଭର କରେ । ଦିନ ଥିଲା ଗାଁରେ ବିଜେଡ଼ି ଓ କଂଗ୍ରେସ ଭିତରେ ହିଁ ଲଢେ଼ଇ ହେଉଥିଲା  । ଏବେ କିନ୍ତୁ ବିଜେପି ସରକାର ଆସିବା ପରେ ସ୍ଥିତି ବଦଳି ଯାଇଛି  । ବିଜେପିର ଶକ୍ତି ଧିରେଧିରେ ବଢ଼ିବାରେ ଲାଗିଛି  । କଂଗ୍ରେସ ଗାଁରେ ବି ତିନି ନମ୍ବର ସ୍ଥାନକୁ ଠେଲି ହୋଇଯାଇଛି  । ଆଗାମୀ ପଞ୍ଚାୟତ ନିର୍ବାଚନରେ ବିଜେଡ଼ି ଓ ବିଜେପି ମଧ୍ୟରେ ହିଁ ଅସଲ ଲଢେ଼ଇ ହେବାର ସମ୍ଭାବନା ରହିଛି । କଂଗ୍ରେସ ପାଇଁ ଆଜିକା ଦିନରେ ବଡ଼ ଆହ୍ୱାନ ହେଉଛି ପୁଞ୍ଜି । ଗୋଟିଏ ପଟେ ବିଜେଡ଼ି ପାଖରେ ୬୨୫ କୋଟିର ଧଳା ଧନ ଥିବାବେଳେ ସରକାରରେ ଥିବାରୁ ଆଉ ରାଜ୍ୟ ବିଜେପି ପାଖରେ ଅର୍ଥର ଅଭାବ ରହିବ ନାହିଁ  । ବିନା ଅର୍ଥରେ ସଂଗଠନ ଆଗକୁ ବଢ଼ିବାର ପ୍ରଶ୍ନ ହିଁ ଉଠୁନାହିଁ  । ଏମିତିବି ଏଆଇସିସି ବି ଆର୍ଥିକ ସଂକଟ ଦେଇ ଗତି କରୁଥିବାରୁ ଓଡ଼ିଶାକୁ କେବଳ ପରିଚାଳନା ଖର୍ଚ୍ଚ ବ୍ୟତୀତ ଅନ୍ୟ ଅର୍ଥ ମିଳିବାର ସମ୍ଭାବନା ନାହିଁ  । ଅର୍ଥ ଅଭାବକୁ ମେଣ୍ଟାଇବା ପାଇଁ ଭକ୍ତ ନେତାଙ୍କ ଚାନ୍ଦା ଉପରେ ଭରସା କରିଛନ୍ତି  । ଅତୀତରେ ପିସିସି ସଭାପତି ଥିବା ପ୍ରସାଦ ହରିଚନ୍ଦନଙ୍କ ସେଭଳି ରଣନୀତି ମଧ୍ୟ କାମ କରିନାହିଁ  । ସେହିପରି ଭକ୍ତ ପିସିସି ସଭାପତି ହୋଇଥିବାରୁ ନିରଞ୍ଜନ ପଟ୍ଟନାୟକ କିମ୍ବା ମହମ୍ମଦ ମୋକିମଙ୍କ ଭଳି ବିତ୍ତଶାଳୀ ନେତା ଟଙ୍କା ଦେବେେ ବାଲି ମନେ ହେଉନାହିଁ  । ଅତଏବ ଭକ୍ତଙ୍କ ରଣନୀତି ଦଳକୁ ଚର୍ଚ୍ଚାର ଶିରୋନାମାରେ ରଖିଥିବାବେଳେ ତୃଣମୂଳସ୍ତରରେ କଂଗ୍ରେସର ସଂଗଠନ ବୃଦ୍ଧି ହିଁ ଦଳର ଭୋଟ ବୃଦ୍ଧି କରିପାରିବ  । ତେଣୁ ଭକ୍ତ କେତେ ସଫଳ ହେବେ, ସବୁ ନେତା ଏକାଠି ହୋଇ କଂଗ୍ରେସକୁ ମଜବୁତ କରିପାରିବେ କି ନାହିଁ ତାହା ଉପରେ ନଜର ରହିବା ସ୍ୱାଭାବିକ  ।