ଶାହ-ଦିଦି ବୟାନବାଜୀ : ଶାହ-ମୋଦି ଦୁଃଶାସନ ଓ ଦୁର୍ଯ୍ୟୋଧନ

କୋଲକାତା : ଆଗକୁ ଆସୁଛି ପଶ୍ଚିମବଙ୍ଗ ବିଧାନସଭା ନିର୍ବାଚନ । ତେବେ ଏବେ ଠୁ ପଶ୍ଚିମବଙ୍ଗରେ ଦେଖା ଦେଲାଣି ନିର୍ବାଚନୀ ତାତି । ଏବେ ପଶ୍ଚିମବଙ୍ଗ ଗସ୍ତରେ ରହିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଅନୁପ୍ରବେଶକୁ ନେଇ ଶାହ ଆଜି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ଖୁବ ବର୍ଷିଛନ୍ତି । ଏହାର କଡା ଜବାବ ମଧ୍ୟ ଦେଇଛନ୍ତି ଦିଦି। ଉଭୟଙ୍କ ଆକ୍ଷେପ ଓ ପ୍ରତିଆକ୍ଷେପ ପ୍ରବଳ ଶୀତରେ ବି ପଶ୍ଚିମବଙ୍ଗର ରାଜନୀତିକୁ ସରଗରମ କରିଛି । ଆଜି ଶାହ ଅଭିଯୋଗ କରିଥିଲେ ଯେ, ଆଗକୁ ନିର୍ବାଚନ ହେବାକୁ ଥିବା ପଶ୍ଚିମବଙ୍ଗରେ ଆତଙ୍କବାଦୀ ନେଟୱାର୍କ କାର୍ଯ୍ୟ କରୁଛି । ଏହାର ଦୃଢ ଜବାବ ଦେବାକୁ ଯାଇ ମୁଖ୍ୟମନ୍ତ୍ରୀ ମମତା ବାନାର୍ଜୀ ପହଲଗାମ ଆକ୍ରମଣକୁ "କେନ୍ଦ୍ର ଦ୍ୱାରା କାର୍ଯ୍ୟକାରୀ’ ବୋଲି ଗୃହମନ୍ତ୍ରୀ  ଅମିତ ଶାହଙ୍କୁ ତୀବ୍ର ସମାଲୋଚନା କରି ପ୍ରଶ୍ନ କରିଛନ୍ତି । ବଙ୍ଗଳାର ବାଙ୍କୁରାର ବୀରସିଂହପୁରରେ ଏକ ରାଲିକୁ ସମ୍ବୋଧିତ କରି ତୃଣମୂଳ ସୁପ୍ରିମୋ ଶାହ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମହାକାବ୍ୟ ମହାଭାରତର ଦୁଇ ବିରୋଧୀ ଦୁଃଶାସନ ଏବଂ ଦୁର୍ଯ୍ୟୋଧନ ବୋଲି କହିଛନ୍ତି ।

   ଶକୁନିଙ୍କ ଶିଷ୍ୟ ଦୁଃଶାସନ ସୂଚନା ସଂଗ୍ରହ କରିବାକୁ ବଙ୍ଗଳା ଆସିଛନ୍ତି । ନିର୍ବାଚନ ଆସିବା ମାତ୍ରେ ଦୁଃଶାସନ ଓ ଦୁର୍ଯ୍ୟୋଧନ ଦେଖାଦେବା ଆରମ୍ଭ କରନ୍ତି ବୋଲି ମମତା କହିଛନ୍ତି । ମୋଦି ଡିସେମ୍ବର ୨୦ ରେ ବଙ୍ଗଳା ଗସ୍ତ କରିଥିବା ବେଳେ ଶାହା ବର୍ତ୍ତମାନ ୨୦୨୬ ବଙ୍ଗଳା ନିର୍ବାଚନ ପୂର୍ବରୁ ତିନି ଦିନିଆ ରାଜ୍ୟ ଗସ୍ତରେ ଅଛନ୍ତି । ବଙ୍ଗ ଆତଙ୍କବାଦୀଙ୍କ ପାଇଁ ଏକ କେନ୍ଦ୍ର ପାଲଟିଛି ବୋଲି ଗୃହମନ୍ତ୍ରୀଙ୍କ ଦାବି ଉପରେ ପ୍ରତିକ୍ରିୟା ଦେଇ ମମତା ପାଲଟା ଜବାବ ଦେଇଥିଲେ, ଯଦି ଜମ୍ମୁ-କାଶ୍ମୀରରେ କୌଣସି ଆତଙ୍କବାଦୀ ନାହାନ୍ତି, ତେବେ ପହଲଗାମ ଆକ୍ରମଣ କିପରି ଘଟିଲା ? ଆପଣ କ'ଣ ପହଲଗାମରେ ଆକ୍ରମଣ କରିଥିଲେ? ଦିଲ୍ଲୀରେ ଘଟିଥିବା ଘଟଣା ପଛରେ କିଏ ଥିଲା? ବୋଲି ପ୍ରଶ୍ନ କରିଛନ୍ତି । ଏହା ପୂର୍ବରୁ ଏକ ସାମ୍ବାଦିକ ସମ୍ମିଳନୀରେ ଉଦବୋଧନ ଦେଇ ଶାହ ଅଭିଯୋଗ କରିଥିଲେ ଯେ ମମତା ବାନାର୍ଜୀ ସରକାର ବାଂଲାଦେଶୀମାନଙ୍କ ଅନୁପ୍ରବେଶକୁ ପ୍ରୋତ୍ସାହିତ କରୁଛନ୍ତି, ଯାହା ଗତ କିଛି ବର୍ଷ ମଧ୍ୟରେ ରାଜ୍ୟର ଜନସଂଖ୍ୟାକୁ "ବିପଜ୍ଜନକ ଭାବରେ ପରିବର୍ତ୍ତନ’ କରିଛି । ଆମେ କେବଳ ଅନୁପ୍ରବେଶକାରୀଙ୍କୁ ଚିହ୍ନଟ କରିବୁ ନାହିଁ, ବରଂ ସେମାନଙ୍କୁ ବାହାର କରିବୁ । ୨୦୨୬ ଏପ୍ରିଲ ୧୫ ପରେ ବଙ୍ଗଳାରେ ଦୁଇ-ତୃତୀୟାଂଶ ବହୁମତ ସହିତ ବିଜେପି ସରକାର ଗଠନ କରିବ, କାରଣ ଲୋକମାନେ ସେମାନଙ୍କର ମନ ସ୍ଥିର କରିସାରିଛନ୍ତି ବୋଲି ସେ କହିଥିଲେ । ଏହାର ଜବାବରେ ମମତା ଶାହଙ୍କ ଇସ୍ତଫା ଦାବି କରିଛନ୍ତି । ଏସଆଇଆରକୁ ନେଇ ମଧ୍ୟ ଶାହଙ୍କ ଉପରେ ବର୍ଷିଛନ୍ତି ମମତା । ଆମେ ୨୦୨୬ ମସିହାରେ ମଧ୍ୟ ପୁଣି ଥରେ ବଙ୍ଗଳାରେ କ୍ଷମତାକୁ ଆସିବୁ ଓ ଗଣତାନ୍ତ୍ରିକ ଭାବରେ ତୁମକୁ ଦେଶରୁ ତଡିବୁ ବୋଲି ଶାହଙ୍କୁ ଖୋଲା ଚାଲେଞ୍ଜ ଦେଇଛନ୍ତି ମମତା ।