ଶୀତଋତୁରେ ସ୍ୱାସ୍ଥ୍ୟରକ୍ଷା

ଡ.ପ୍ରଫୁଲ୍ଲ କୁମାର ଦାସ : ଶୀତ ଆସିଲେ ଥଣ୍ଡା ଓ ସର୍ଦ୍ଦି ଆସିଯାଏ । ଶୀତର କୋପରୁ ରକ୍ଷା ପାଇବାକୁ କେତେକ ପ୍ରାଣୀ ମାଟିତଳେ ପୋତି ହୋଇ ରହିଥାନ୍ତି, କିନ୍ତୁ ମଣିଷକୁ ଶୀତର ପ୍ରକୋପ ଓ ତଜ୍ଜନିତ ବିଭିନ୍ନ ପ୍ରକାର ସ୍ୱାସ୍ଥ୍ୟ ସମସ୍ୟା ସହିତ ଲଢେ଼ଇ କରିବାକୁ ପଡ଼ିଥାଏ । ଶୀତ କାରଣରୁ ବେଶୀ ସମୟ ଘର ଭିତରେ ରହିବା ଫଳରେ ସ୍ୱାସ୍ଥ୍ୟଗତ ସମସ୍ୟାଗୁଡ଼ିକ ଧୀରେ ଧୀରେ ବଢ଼ିବାରେ ଲାଗେ । ବିଶେଷକରି ସଂକ୍ରମଣ ହେବାର ବେଶୀ ଆଶଙ୍କା ରହିଥାଏ । ସାଧାରଣତଃ ସର୍ଦ୍ଦି, ଥଣ୍ଡାର ପ୍ରାୟ ୨୦୦ ପ୍ରକାରର ଭୂତାଣୁ ସକ୍ରିୟ ହୋଇଯାନ୍ତି ଶୀତଦିନେ । ନାକ ଭିତରେ ଥିବା ସୂକ୍ଷ୍ମ ପରଦା ଶୁଷ୍କ ରହିବାରୁ ସହଜରେ ଭୂତାଣୁ ଦ୍ୱାରା ସଂକ୍ରମଣ ବ୍ୟାପିଥାଏ । ଥଣ୍ଡା ହେଲେ ପୁରା ଉପଶମ ପାଇଁ କୌଣସି ଔଷଧ ନାହିଁ, କିନ୍ତୁ ଏହାର ଲକ୍ଷଣ ଯଥା କାଶ, ଗଳାଫୁଲା, ନାକ ରୁନ୍ଧି ହୋଇଯିବା, ଛିଙ୍କ ଓ ଜ୍ୱରର ଚିକିତ୍ସା କରାଯାଇପାରେ । ଏଣୁ ଏଭଳି ସଂକ୍ରମଣରୁ କିଭଳି ରକ୍ଷା ପାଇବା ସେଥିପ୍ରତି ସତର୍କ ରହିବା ଜରୁରି ।

    ଶୀତରେ ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବା ପାଇଁ ସୁଷମ ଖାଦ୍ୟ ଉପରେ ଗୁରୁତ୍ୱ ଦେବାକୁ ପଡ଼ିବ । ପ୍ରତିରୋଧକ ଶକ୍ତି ଠିକ୍‌ ରହିଲେ ତାହା ଯେ କୌଣସି ସଂକ୍ରମଣକୁ ପ୍ରତିହତ କରିପାରିବ । ଏଣୁ ପ୍ରତିଦିନ ତୁଳସୀ ପତ୍ର ସେବନ କରିବା ଆବଶ୍ୟକ । ଏହାସହ ଖାଦ୍ୟରେ ଗୋଲମରିଚ ଓ ହଳଦୀ ବି ଖାଇବା ଦରକାର । ରସୁଣ ଓ ଚା'ର ବି ରୋଗ  ପ୍ରତିରୋଧକ ଶକ୍ତି ବୃଦ୍ଧି କରିବାର କ୍ଷମତା ରହିଛି । ପ୍ରତିଦିନ ଶୀତଦିନର ଖାଦ୍ୟରେ ଏହି ଖାଦ୍ୟଗୁଡ଼ିକୁ ସାମିଲ କରନ୍ତୁ, ଅନେକଗୁଡ଼ିଏ ସମସ୍ୟା ଦୂର ହୋଇଯିବ । ବର୍ଷା ଓ ଖରାଦିନ ଭଳି ଶୀତଦିନରେ ପେଟ ଗୋଳମାଳ ହେବା ବେଶୀ ଲକ୍ଷ୍ୟ କରାଯାଏନି । କିନ୍ତୁ ବିଭିନ୍ନ ପର୍ବ ଓ ଭୋଜିର ଆସର ଜମିଥାଏ ଯେଉଁଥିରେ ବେଶୀ ତେଲିଆ ଖାଦ୍ୟ ଖାଇବା ଦେଖାଯାଏ । ଦିନ ଛୋଟ ରହେ ଓ କମ୍‌ ସୂର୍ଯ୍ୟକିରଣ ମିଳେ । ଅନ୍ୟପକ୍ଷରେ ଶାରୀରିକ ପରିଶ୍ରମ ବି କମ୍‌ ହୁଏ । ଯାହାଦ୍ୱାରା ଆମେ ଯେତିକି କ୍ୟାଲୋରୀ ନେଉ ତାହା ସେହି ଅନୁପାତରେ କ୍ଷୟ ହୁଏନାହିଁ । ଏଣୁ ଅଳସୁଆ ଲାଗେ ଓ ଓଜନ ବି ବୃଦ୍ଧି ହୋଇଥାଏ । ଆଲକୋହଲ ନେବା ବଢ଼ିଯାଏ ଶୀତଦିନରେ ଯାହା ସମସ୍ୟା ଆଣେ । ଶୀତରେ ଚା, କଫି ସାଙ୍ଗକୁ ଧୂମପାନ ଅଭ୍ୟାସ ବି ବଢ଼ିଯାଏ । ଏଭଳି ସ୍ଥିତିରେ ଛାତିପୋଡ଼ା, ବଦହଜମି ଓ କୋଷ୍ଠବଦ୍ଧତା ଦେଖାଦିଏ । ଏଣୁ ଗରିଷ୍ଠ ଖାଦ୍ୟଠୁ ଯେତେ ଦୂରେଇ ରହିବେ ସେତେ ଉପକାର ।

      ଶୀତ ପୋଷାକ ଓ ହାତରେ ଗ୍ଲୋଭ୍‌ସ ପିନ୍ଧନ୍ତୁ । ଯେଉଁଠି ଗଣ୍ଠି ବେଶୀ ଫୁଲିଥିବ ସେଠି ଉଲ୍‌ର ଆଉ ଏକ କଭର ରଖନ୍ତୁ । ଘର ଭିତରେ ବ୍ୟାୟାମ କରନ୍ତୁ । ଏହାଦ୍ୱାରା ଶରୀର ସକ୍ରିୟ ରହିବ ଓ ବିନ୍ଧା କମ୍‌ ହେବ । ନଖ ଉଷୁମ ପାଣିରେ ଗାଧୋଇବା ହିତକର । ୱାର୍ମବାଥ ପରେ ହଠାତ୍‌ ବାହାରକୁ ଯିବା ଉଚିତ ନୁହେଁ । ଖରାରେ କିଛି ସମୟ ରୁହନ୍ତୁ ଯାହା ଭିଟାମିନ୍‌ ଡି ଯୋଗାଇଦେବ । ଯଦି ଏହା ସମ୍ଭବ ହୋଇପାରୁନାହିଁ ତେବେ ଭିଟାମିନ ଡି ସପ୍ଲିମେଣ୍ଟ ଖାଆନ୍ତୁ । ଯଦିଓ ଏହାର କୌଣସି ହର୍ବାଲ ସପ୍ଲିମେଣ୍ଟ ନାହିଁ ତଥାପି ଯନ୍ତ୍ରଣା କମାଇବାକୁ ଗ୍ଲୁକୋସମାଇନ ଏବଂ କୋଣ୍ଡ୍ରାଇଟିନ୍‌ ସପ୍ଲିମେଣ୍ଟ ସେବନ କରିବା କିଛି କ୍ଷତିକାରକ ନୁହେଁ । ପାଗ ଯେତେବେଳେ ପୁରା ଥଣ୍ଡା ଥାଏ ସେତେବେଳେ କେବେ ବି ବାହାରକୁ ବାହାରନ୍ତୁ ନାହିଁ । ଥଣ୍ଡା ଜାଗାରେ ଖାଲି ପାଦରେ ବି ଚାଲନ୍ତୁ ନାହିଁ । ଯଦି ବାହାରକୁ ଯିବା ନିହାତି ଦରକାର ତେବେ ଜୋତା ପିନ୍ଧନ୍ତୁ ଓ ଶୀତରୁ ଶରୀରକୁ ରକ୍ଷା କରିପାରୁଥିବା ଭଲ ପୋଷାକ ବ୍ୟବହାର କରନ୍ତୁ । ଓମେଗା-୩ଫ୍ୟାଟି ଏସିଡ଼୍‌ ଫୁଲା କମାଇବାରେ ସହାୟକ ହୋଇଥାଏ । ଦିନକୁ ୨ରୁ ୩ଗ୍ରାମ ଆବଶ୍ୟକ । ଏହା ନେବା ଆଗରୁ ଚିକିତ୍ସକଙ୍କ ପରାମର୍ଶ ଲୋଡ଼ନ୍ତୁ । କାରଣ ଏହା ବ୍ଲିଡିଂ ଭଳି ସମସ୍ୟା ସୃଷ୍ଟି କରିଥାଏ । ଲାଇଫ୍‌ଷ୍ଟାଇଲ ପରିବର୍ତ୍ତନ ଯଦି ନକରିପାରୁଛନ୍ତି ତେବେ ନନ୍‌ ଷ୍ଟିରଏଡ଼୍‌ ଆଣ୍ଟିଇନ୍‌ଫ୍ଲାମାଟୋରୀ ଡ୍ରଗ୍ସ ସେବନ କରିପାରିବେ । ଶୀତରେ ମସାଜ ମାଂସପେଶୀକୁ ସକ୍ରିୟ ରଖିବା ସହ ଗଣ୍ଠି ଯନ୍ତ୍ରଣା ହ୍ରାସ କରିଥାଏ । ଆକ୍ୟୁପଙ୍କଚର ମଧ୍ୟ ଅନେକ ଲାଭ ପହଞ୍ଚାଇଥାଏ । ନଖ ଉଷୁମ ପାଣିରେ ଗାଧାନ୍ତୁ । ଏହାପରେ ଶରୀରରେ ତେଲ ମାଲିସ୍‌ କରନ୍ତୁ । ପୁରା ଶୁଷ୍କ ସ୍କିନ ଲୋସନ କିମ୍ବା ମଇଶ୍ଚରାଇଜର ବ୍ୟବହାର କରିବା ଉଚିତ । ମୁହଁରେ ଫେସ୍‌ ଲୋସନ ଲଗାନ୍ତୁ । ଉଷୁମ ପାଣିରେ କେବେ ବି ମୁହଁ ଧୁଅନ୍ତୁ ନାହିଁ । ହାତ ଓ ପାଦର ସୁରକ୍ଷା ପାଇଁ ଚିଲ୍‌ବ୍ଲେନ୍‌ସରୁ ମୁକ୍ତ ହେବାକୁ ପଡ଼ିବ । ଏଥିପାଇଁ ଏକ ଲିଟର ଉଷୁମ ପାଣିରେ ଏକ ଚାମଚ ଲୁଣ ମିଶାଇ ହାତ ଓ ପାଦ ୫-୧୦ ମିନିଟ୍‌ ଯାଏ ବୁଡ଼ାଇ ରଖନ୍ତୁ । ଏହାପରେ ଟାୱଲରେ ଭଲ କରି ପୋଛି ସେଥିରେ ମଏଶ୍ଚରାଇଜର କ୍ରିମ ଲଗାନ୍ତୁ । ମୁଣ୍ଡରେ ରୁପି ହେଉଥିଲେ କିମ୍ବା ଶୁଷ୍କ ତ୍ୱଚା ଛାଡ଼ୁଥିଲେ ନଡ଼ିଆ, ଅଲିଭ ନଚେତ ଆଲମଣ୍ଡ ତେଲ ମୁଣ୍ଡର ତ୍ୱଚାରେ ଭଲ ଭାବେ ମାଲିସ୍‌ କରିବା ପରେ ଉଷୁମ ପାଣିରେ ସଫା କରନ୍ତୁ । ଓଠକୁ ଶୁଷ୍କ ନରଖିବା ପାଇଁ ମେଟାଲିକ୍‌ ଲିପ୍‌ଷ୍ଟିକ୍‌ ବ୍ୟବହାର ଛାଡ଼ନ୍ତୁ । ଲିପ୍‌ ଗ୍ଲାସ ବ୍ୟବହାର କରିବା ମଧ୍ୟ ଭଲ । ଏହାଦ୍ୱାରା ଓଠ ସୁନ୍ଦର ଓ ସତେଜ ଦିଶେ । ଶୀତକୁ ନେଇ ସେପରି ଭୟଭୀତ ହୁଅନ୍ତୁ ନାହିଁ । ବାସ୍ତବରେ ଶୀତ ଏକ ଆନନ୍ଦପୂର୍ଣ୍ଣ ଋତୁ କହିଲେ ଅତ୍ୟୁକ୍ତି ହେବନାହିଁ ।