ସକ୍ରିୟ ହୋଇଉଠିଲେଣି ମୋରମ ଲୁଟେରା ;  ଲୁଟ ଉଦ୍ୟମ ବେଳେ ଦୁଇ ହାଇୱା ଜବତ 

 କଳିଙ୍ଗନଗର ଶିଳ୍ପାଞ୍ଚଳରେ ବେଧଡକ ଭାବେ ଲୁଟ ହେଉଛି ମୋରମ । କିଛି ଦିନ ଚୁପ୍ ବସିବା ପରେ ପୁଣି ସକ୍ରିୟ ହୋଇ ଉଠିଛନ୍ତି ଲୁଟେରା । ମୋରମ ବିକ୍ରି କରି ଲୁଟେରା କୋଟି କୋଟି ଟଙ୍କା ରୋଜଗାର କରିଚାଲିଛନ୍ତି । ସେପଟେ ମୋରମ ଲୁଟେରା ସକ୍ରିୟ ହୋଇଥିବା ବେଳେ ଲଘୁ ଖଣିଜ ବିଭାଗ ଚୁପ୍ ବସିଛି । ଦାନଗଦୀ ତହସିଲ୍ ଅଧୀନସ୍ଥ ମାଣତୀରା ରାଜସ୍ୱ ସର୍କଲରେ ବ୍ୟାପକ ମୋରମ ଲୁଟ ଚାଲିଛି । ଦାନଗଦୀ ତହସିଲଦାର, ଯଖପୁରା ପୁଲିସ ନାକ ତଳୁ ପ୍ରତି ଦିନ ଶହଶହ ଟ୍ରିପ୍ ମୋରମ ବାହାର ଜିଲାକୁ ପଠାଉଛନ୍ତି ଲୁଟେରା । ରାତିରେ ମୋରମ ଗାଡ଼ି ସବୁ ଭଦ୍ରକ, ବାଲେଶ୍ୱର, ଧାମରାକୁ ଯାଉଥିବା ବେଳେ ତାହା କିପରି ପ୍ରଶାସନ ଅଧିକାରୀ ଏବଂ ପୁଲିସ ନଜରକୁ ଆସୁନାହିଁ ତାହା ସାଧାରଣରେ ସନେ୍ଦହ ସୃଷ୍ଟି କରିଛି । ଦାନଗଦୀ ତହସିଲ୍ ମାଣତୀରା ଆରଆଇ ସର୍କଲ ପଙ୍କପାଳ ମୌଜାର ଦିଗାମ୍ବରପୁର, ପଙ୍କପାଳ କାଜୁ ବାଦାମ ପଡ଼ିଆରୁ ବ୍ୟାପକ ମୋରମ ଲୁଟ ହେବାରେ ଲାଗିଛି । ବାଲି, ମୋରମ ଲୁଟ ପଛରେ ଅସାଧୁ ବ୍ୟବସାୟୀ ଓ ପ୍ରଶାସନର ମିଲିଭଗତରେ ସମ୍ଭବ ହେଉଛି ବୋଲି ଅଭିଯୋଗ ହୋଇଛି । କେବେ କେବେ ଯଦି ଥାନା ଅଧିକାରୀଙ୍କ ନଜରରେ ମୋରମ ଲୁଟ ହେଉଥିବାର ପଡୁଛି ତେବେ ସେ ଜବତ ହେଉଥିବା ଗାଡ଼ି ଉପରେ ଜରିମାନା କରି ଛାଡ଼ି ଦେଉଛନ୍ତି । ଦୃଢ଼ କାର୍ଯ୍ୟାନୁଷ୍ଠାନ ନହେବା ଫଳରେ ପୁଣି ମୋରମ ଲୁଟେରା ସକ୍ରିୟ ହେଉଛନ୍ତି ଆଉ ପୁନର୍ବାର ଲୁଟ କରୁଛନ୍ତି । ସେମିତି ଗତକଲି ରାତି ୩ଟା ସମୟରେ ପଙ୍କପାଳ ପଞ୍ଚାୟତର ମନୋହରପୁର ଠାରୁ ମୋରମ ଲୁଟ କରିବା ପାଇଁ ଉଦ୍ୟମ ହେଉଥିବା ବେଳେ ଯଖପୁରା ପୁଲିସ ଗାଡ଼ି ନମ୍ବର (ଓଡ଼ି୦୪ଏଚ-୦୯୩୭ ଓ ଓଡ଼ି୦୪ପି-୫୨୫୫)ଦୁଇଟି ହାଇୱା ଜବତ କରି ଥାନାକୁ ଆଣିଛି । ଘଟଣା ସ୍ଥଳରୁ ମୋରମ ତାଡ଼ିବା ଆସିଥିବା ଜେସିବି ଚମ୍ପଟ୍ ମାରି ଚାଲିଯାଇଥିଲା । ପ୍ରତିଦିନ ଏହି ଅଞ୍ଚଳରୁ ମୋରମ ଲୁଟ ହେଉଛି । ମୋରମ ଲୁଟ କରୁଥିବା ମାଫିଆ ସବୁ ସରକାରୀ ଦଳର ତଥା ମନ୍ତ୍ରୀଙ୍କ ଖାସ୍ ଲୋକ ହେଇଥିବାରୁ ମୋରମ ଲୁଟ କରିବା ତାଙ୍କ ପାଇଁ ସହଜ ହେଉଛି ବୋଲି ଅଭିଯୋଗ ହୋଇଛି । ବଡ଼କଥା ହେଉଛି ଯେଉଁ ସବୁ ଦିନରେ ସରକାରୀ କାର୍ଯ୍ୟାଳୟ ଛୁଟି ରହୁଛି ସେସବୁ ଦିନ ମାନଙ୍କରେ ଅଧିକ ପରିମାଣର ମୋରମ ଲୁଟ ହେଉଛି ପୁଣି ସରକାରୀ ଜମି ଉପରେ ନିର୍ମାଣ କାର୍ଯ୍ୟ ହେଉ ସବୁଚାଲୁଛି । ଯେପରି ସେ କାର୍ଯ୍ୟକୁ ବନ୍ଦ କରିବା ପାଇଁ କେହି ଆସିବେ ନାହିଁ । ଛୁଟି ଦିନ ମାନଙ୍କର ସୁଯୋଗ ନେଇ ବେଆଇନ କାର୍ଯ୍ୟ ସବୁ ତିବ୍ର ଭାବରେ ହେଉଛି । ପରବର୍ତୀ ସମୟରେ ତାହା ଜଣାପଡ଼ିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହେଉନାହିଁ । ବାବୁ ମାନେ ଗୋଡ଼ ଉପରେ ଗୋଡ଼ ପକାଇ ବସିଯାଉଛନ୍ତି । ଦୃଷ୍ଟାନ୍ତ ମୂଳକ କାର୍ଯ୍ୟାନୁଷ୍ଠାନ ହେଉ ନଥିବାରୁ ମୋରମ ଲୁଟେରା ପୁଣି ଲୁଟ କରିବା ପାଇଁ ସାହାସ କରୁଛନ୍ତି । ଆଗାମୀ ଦିନରେ ଏପରି ଯଦି ଲାଗି ରହେ ତେବେ ଦାନଗଦୀ ତହସିଲ୍ ଅଧୀନସ୍ଥ ସମସ୍ତ ଅଞ୍ଚଳ ମୋରମ ଲୁଟର ଭୂସ୍ୱର୍ଗ ପାଲଟିବ ଏହାକୁ କେହି ଅଟକାଇ ପାରିବେନି ।