ଅଧା ବାଟରେ ଆଣ୍ଠେଇଛି ମେଗା ପାନୀୟଜଳ ପ୍ରକଳ୍ପ ; ପାଣି ପାଇଁ କଲବଲ ବ୍ରହ୍ମବରଦା ବାସୀ

 
ବ୍ରହ୍ମବରଦା ଗାଁ ଠୁ ସହର କେଉଁଠି ବି ବିଶୁଦ୍ଧ ପାନୀୟ ଜଳର ଅଭାବ ରହିବନି । ବସୁଧା ଯୋଜନା ମାଧ୍ୟମରେ ହେଉ କି ମେଗା ପାନୀୟ ଜଳ ପ୍ରକଳ୍ପ ମାଧ୍ୟମରେପାଇପ ଯୋଗେ ପ୍ରତି ଘରକୁ ଘର ଶୁଦ୍ଧ ପାନୀୟ ଜଳ ଯୋଗାଇ ଦିଆଯିବ । ଗୋଟିଏ ବି ପରିବାର ଶୁଦ୍ଧ ପାନୀୟଜଳ ପାଇବାରୁ ବଞ୍ଚିତ ହେବେ ନାହିଁ । ଏମିତି ନାରା ଉଭୟ କେନ୍ଦ୍ର ଓ ରାଜ୍ୟ ସରକାର ଦେଇ ଚାଲିଥିବା ବେଳେ ରସୁଲପୁର ବ୍ଲକ ଅଭିଭକ୍ତ ବ୍ରହ୍ମବରଦା ପଞ୍ଚାୟତ ଅଞ୍ଚଳରେ କିନ୍ତୁ ଏହାର ବହୁ ବ୍ୟତିକ୍ରମ ଦେଖିବାକୁ ମିଳିଛି । 
ଏଠାରେ ସରକାରଙ୍କ ଦ୍ୱାରା ନିର୍ମିତ ମେଗା ପାନୀୟ ଜଳ ପ୍ରକଳ୍ପ ଯୋଜନା କାର୍ଯ୍ୟ ଅଧା ବାଟରେ ଆଣ୍ଠେଇବା ସଦୃଶ ହୋଇଛି । ଲୋକେ ବିଶୁଦ୍ଧ ପାଣି ଟୋପାଏ ପାଇଁ କଲବଲ ହେଉଥିବା ବେଳେ ମେଗା ପାନୀୟ ଜଳ ପ୍ରକଳ୍ପ କାମ ଅଧାପନ୍ତରିଆ ହୋଇ ପଡିରହିଛି । ଫଳରେ ଉଭୟ ବ୍ରହ୍ମବରଦା ଓ ମହେଶ୍ୱରପୁର ପଞ୍ଚାୟତର ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେବା ସହ ପାଣି ମୁନ୍ଦାଏ ପାଇବାପାଇଁ ଡହଳବିକଳ ହେଉଛନ୍ତି । ବ୍ରହ୍ମବରଦା କଲେଜ ନିକଟରେ ପାଖାପାଖି କୋଟିଏ ଟଙ୍କାରେ ନିର୍ମିତ ହୋଇଥିବା ୨.୫ଲକ୍ଷ ଲିଟର ବିଶିଷ୍ଟ ଓଭରହେଡ ପାଣି ଟାଙ୍କିର ଅନେକ କାମ ବାକି ଥିବା ବେଳେ ମହେଶ୍ୱରପୁର ପଞ୍ଚାୟତର ଚାନ୍ଦପୁର ଠାରେ ଓଭରହେଡ ଟାଙ୍କିର ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲିଛି । ତା ସହିତ ଟାଙ୍କି ଗୁଡିକୁ ପାଇପ ସଂଯୋଗ କାମ ବି ଶେଷ ହୋଇନାହିଁ । ଏହା କେବେ ସମ୍ପୂର୍ଣ୍ଣ ହେବ ତାହାର କିଛି ସୂଚନା ମଧ୍ୟ ଫଳକ ମାଧ୍ୟମରେ ନାହିଁ । ଗୋଟେ ପ୍ରକାରରେ କହିବାକୁ ଗଲେ ଅଞ୍ଚଳବାସୀଙ୍କ ପାଇଁ ଶୁଦ୍ଧ ପାନୀୟଜଳ ପାଇବା ଏବେ ସ୍ୱପ୍ନ ପାଲଟି ଯାଇଛି । ତା ଛଡା ଗ୍ରାମର ପ୍ରତି ଅଞ୍ଚଳକୁ ମାଟିତଳେ ପାଇପ ବିଛା କାମ ମଧ୍ୟ ଅସମ୍ପୂର୍ଣ୍ଣ ହୋଇ ପଡିରହିଛି । ସବୁ ଅଞ୍ଚଳକୁ ମାଟିତଳ ପାଇପ ସଂଯୋଗ ହୋଇପାରିନଥିବାରୁ ଗ୍ରାମବାସୀ ମାନଙ୍କ ମନରେ ଏବେ ଅସନ୍ତୋଷ ପ୍ରକାଶ ପାଇଛି । ଏହାଛଡ଼ା ବହୁ ସ୍ଥାନରେ ପାଇପ ଗୁଡିକ ରାସ୍ତା ଉପରକୁ ବାହାରିକି ରହିଛି । ଯାହାଦ୍ୱାରା ଅନେକ ସମୟରେ ଗାଡି ମୋଟର ସବୁ ଉକ୍ତ ପାଇପ ସଂସ୍ପର୍ଶରେ ଆସି ଅକାରଣରେ ଦୁର୍ଘଟଣାର ଶିକାର ହେଉଛନ୍ତି । ତା ସହିତ ସାରା ବିଶ୍ୱରେ ଏବେ ଜଳବାୟୁର ଅବିଶ୍ୱସନୀୟ ପରିବର୍ତନ ଘଟିଛି । ଯାହାର ପ୍ରଭାବରେ ବ୍ରହ୍ମ୍ବରଦା ଅଞ୍ଚଳ ଦେଇ ବହି ଯାଇଥିବା ବ୍ରାହ୍ମଣୀ ନଦୀ ଠାରୁ ଆରମ୍ଭ କରି ଗଡ଼ିଆ, ପୋଖରି, ନାଳ ସବୁ ଆଷାଢ଼ ମାସରେ ବି ଶୁଖିଲା ପଡିଛି । ଯେଉଁଥି ପାଇଁକି ଅଭିଭକ୍ତ ବ୍ରହ୍ମବରଦା ଅଞ୍ଚଳରେ ମାଟିତଳୁ ଜଳସ୍ତର ଧିରେ ଧିରେ କମିବାରେ ଲାଗିଛି । ଗ୍ରାମରେ ନଳକୂପ ଜଳ ଏବେ ଲୋକଙ୍କ ଭରସା ସାଜିଛି । କିନ୍ତୁ ବ୍ରହ୍ମବରଦା ଅଞ୍ଚଳରେ ମାଟିତଳ ଜଳସ୍ତର କମ ରହୁଥିବାରୁ ଅଧିକାଂଶ ନଳକୂପରୁ ହଳଦିଆ ସାଙ୍ଗକୁ ଆଇରନ ଯୁକ୍ତ ପାଣି ବାହାରୁଛି । ଯାହାକୁ ଲୋକେ ବ୍ୟବହାର କରିବା ଦ୍ୱାରା କିଡ଼ନୀ ଜନିତ ରୋଗରେ ପୀଡ଼ିତ ହେବା ସହ ବିଭିନ୍ନ ଚର୍ମ ରୋଗରେ ଆକ୍ରାନ୍ତ ହେଉଥିବା ଏବେ ଦେଖିବାକୁ ମିଳିଛି । ସୂଚନା ଅନୁଯାୟୀ ଅଭିଭକ୍ତ ବ୍ରହ୍ମବରଦା ପଞ୍ଚାୟତ ଅଞ୍ଚଳରେ ପାଖାପାଖି ୪୦ହଜାରରୁ ଉର୍ଦ୍ଧ ଲୋକେ ବସବାସ କରନ୍ତି । ଏହା ମୁଖ୍ୟତଃ ବ୍ୟବସାୟିକ ପେଣ୍ଠସ୍ଥଳୀ ଭାବେ  ଜଣାଶୁଣା । ଏଠାରେ ବହୁ ବଡବଡ ବ୍ୟବସାୟ ପ୍ରତିଷ୍ଠାନ ସହିତ ବାହାର ଜିଲା ଓ ରାଜ୍ୟର ବହୁ ଲୋକେ ଏଠାରେ ବସବାସ କରନ୍ତି । କିନ୍ତୁ ଦୈନନ୍ଦିନ ଜୀବନରେ ବ୍ୟବହାର୍ଯ୍ୟ ପାଇଁ ବହୁ ପରିମାଣରେ ଶୁଦ୍ଧ ପାନୀୟ ଜଳର ଆବଶ୍ୟକତା ରହିଛି । ଏଠାରେ କିନ୍ତୁ ପାନୀୟ ଜଳର ସେତେଟା ସୁବିଧା ନଥିବାରୁ କିନ୍ତୁ ଦୀର୍ଘ ଦିନ ହେବ ଅଞ୍ଚଳବାସୀ ଜଳ ଜନିତ ସମସ୍ୟା ଦେଇ ଗତି କରିଆସୁଛନ୍ତି  । ଏଠାରେ ଦୀର୍ଘ ୩୦ବର୍ଷ ପୂର୍ବରୁ ରାଜ୍ୟ ସରକାରଙ୍କ ପଞ୍ଚାୟତିରାଜ ଓ ପାନୀୟ ଜଳଯୋଗାଣ ବିଭାଗ ଦ୍ୱାରା ନିର୍ମିତ ଗ୍ରାମ୍ୟ ପାନୀୟ ଜଳଯୋଗାଣ ପ୍ରକଳ୍ପ ନିର୍ମିତ ହୋଇଥିଲା । କିନ୍ତୁ ଏହା ଏବେ ସମୁଦ୍ରକୁ ଶଙ୍ଖେ ସଦୃଶ ହୋଇଛି । କାରଣ ପୂର୍ବ ଅପେକ୍ଷା ଏବେ ବ୍ରହ୍ମବରଦାର ଜନସଂଖ୍ୟା ବହୁ ଗୁଣରେ ବୃଦ୍ଧି ଘଟିଛି । ଉକ୍ତ ପାନୀୟ ପ୍ରକଳ୍ପ ମାଧ୍ୟମରେ ଅଭିଭକ୍ତ ବ୍ରହ୍ମବରଦାର କେତେକ ନିର୍ଦ୍ଦିଷ୍ଟ ସ୍ଥାନକୁ ଛାଡିଦେଲେ ଅନ୍ୟ ଅଞ୍ଚଳ ମାନଙ୍କୁ ପାଣି ସଠିକ ଉପାୟରେ ପହଁଚି ପାରୁନି । ଆଉ ଯେଉଁ ପାଣି ଆସୁଛି ତାହା ଗୋଳିଆ ଯାହା ବ୍ୟବହାର ଯୋଗ୍ୟ ନୁହେଁ । ବିଭାଗୀୟ ଅଧିକାରୀମାନଙ୍କ ରକ୍ଷଣାବେକ୍ଷଣ ଅଭାବରୁ ପାଇପ ଯୋଗେ ଆସୁଥିବା ପାଣି ଦୂଷିତ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି । ମେଗା ପାନୀୟ ଜଳ ପ୍ରକଳ୍ପ କାର୍ଯ୍ୟ ଶେଷ ହେଲେ ଯାଇ ଜଳସମସ୍ୟାର ସମାଧାନ ହୋଇପାରିବ । ଏକଥାକୁ ଭଲ ଭାବେ ବୁଝିଥିବା ଅଞ୍ଚଳବାସୀ ବିଶୁଦ୍ଧ ପାନୀୟ ଜଳ ଯୋଗାଇଦେବା ପାଇଁ ଜିଲା ପ୍ରଶାସନ ନିକଟରେ ଦାବି କରିଛନ୍ତି ।