୩୨ କୁଇଣ୍ଟାଲ ବିସ୍ଫୋରକ ଜବତ : ୨ ଡାକ୍ତର ଗିରଫ
Henamanjaree Swain
- ମିଳିଲା ରାଇଫଲ୍ସ
- ଚାରିଦିନରେ ଗିରଫ ହେଲେଣି ୪ ଆତଙ୍କୀ ଡାକ୍ତର
ନୂଆଦିଲ୍ଲୀ : ଦେଶରେ ଆତଙ୍କବାଦୀଙ୍କ ଏକ ବଡ ଆକ୍ରମଣ ଯୋଜନା ପଣ୍ଡ କରିଛି ଜମ୍ମୁ-କାଶ୍ମୀର ଓ ହରିୟାଣା ପୁଲିସର ଏକ ମିଳିତ ଦଳ । ନିଷିଦ୍ଧ ଆତଙ୍କବାଦୀ ସଂଗଠନ ସହିତ ଜଡିତ ଏକ ଆନ୍ତଃରାଜ୍ୟ ଆତଙ୍କବାଦୀ ନେଟୱାର୍କକୁ ପର୍ଦ୍ଦାଫାଶ କରାଯାଇଛି । ହରିୟାଣା ଫରିଦାବାଦର ଏକ ମେଡିକାଲ୍ କଲେଜ ଡାକ୍ତରଙ୍କଠାରୁ ୩,୨୦୦ କିଲୋଗ୍ରାମରୁ ଅଧିକ ସନ୍ଦିଗ୍ଧ ଆମୋନିୟମ୍ ନାଇଟ୍ରେଟ ଜବତ କରାଯାଇଛି । ଏହାସହିତ ଏକ ଆସଲ୍ଟ ରାଇଫଲ୍ ଓ ବିପୁଳ଼ ଅସ୍ତ୍ରଶସ୍ତ୍ର ସହିତ ଜବତ କରାଯାଇଛି । ପ୍ରଥମେ ୩୬୦ କିଲୋଗ୍ରାମ ଆମୋନିୟମ୍ ନାଇଟ୍ରେଟ୍ ଉଦ୍ଧାର ପରେ ଅତିରିକ୍ତ ୨,୯୦୦ କିଲୋଗ୍ରାମ ବିସ୍ଫୋରକ ତିଆରି ରାସାୟନିକ ପଦାର୍ଥ ଜବତ କରାଯାଇଛି । ଅଧିକାରୀମାନେ କହିଛନ୍ତି ଯେ ଉଦ୍ଧାର ସାମଗ୍ରୀରୁ ତିଆରି ଶହ ଶହ ଶକ୍ତିଶାଳୀ ଆଇଇଡି ବ୍ୟବହାର କରି ଦିଲ୍ଲୀରେ ଭୟଙ୍କର ବିସ୍ଫୋରଣ କରିବାର ଷଡ଼ଯନ୍ତ୍ର ଥିଲା ।
ରବିବାର ଦିନ ଅଲ୍ ଫଲାହ ହସ୍ପିଟାଲ୍ ନିକଟରେ ପୁଲିସ ଡାକ୍ତର ମୁଜାମିଲ ଶକିଲଙ୍କ ଭଡା ଘରୁ ଏହି ବିସ୍ଫୋରକ ଜବତ ପରେ ତାଙ୍କୁ ଗିରଫ କରାଯାଇଛି । ସେହି ହସ୍ପିଟାଲ୍ରେ କାର୍ଯ୍ୟରତ ଜଣେ ମହିଳା ଡାକ୍ତରଙ୍କ ଏକ କାରରୁ ଏକ କ୍ୟାରମ୍ କକ୍ ଆସଲ୍ଟ ରାଇଫଲ୍ ମଧ୍ୟ ମିଳିଛି । ତାଙ୍କୁ ପଚରାଉଚରା ପାଇଁ ଅଟକ ରଖାଯାଇଛି । ସେ ଲକ୍ଷେ୍ନøର ଲାଲ ବାଗର ବାସିନ୍ଦା ଡାକ୍ତର ଶାହିନ ବୋଲି ଚିହ୍ନଟ ହୋଇଛନ୍ତି । ଅଧିକାରୀଙ୍କ ଅନୁଯାୟୀ ଡାକ୍ତର ଶାହିନ ଶାହିଦଙ୍କ କାରଟି ଡାକ୍ତର ମୁଜାମ୍ମିଲ ବ୍ୟବହାର କରୁଥିଲେ । ଏହି କାରରୁ ଏକ ରାଇଫଲ୍ ଏବଂ ଜୀବନ୍ତ କାର୍ଟ୍ରିଜ୍ ଉଦ୍ଧାର କରାଯାଇଛି । ଆଉ ଜଣେ ଡାକ୍ତର ଅଦିଲ୍ ଅହମ୍ମଦ ରାଥରଙ୍କୁ ପୂର୍ବରୁ ଉତ୍ତର ପ୍ରଦେଶର ସହାରନପୁରରୁ ଶ୍ରୀନଗରରେ ଆତଙ୍କବାଦୀ ସଂଗଠନ ଜୈସ୍-ଏ-ମହମ୍ମଦର ସମର୍ଥନରେ ପୋଷ୍ଟର ଲଗାଇବା ଅଭିଯୋଗରେ ଗିରଫ କରାଯାଇଥିଲା । ତାଙ୍କୁ ପଚରାଉଚରା ସମୟରେ ମିଳିଥିବା ଗୁରୁତ୍ୱପୂର୍ଣ୍ଣ ସୂଚନା ଆଧାରରେ ଏହି ଚଢାଉ କରାଯାଇଥିଲା । ଅଧିକାରୀମାନେ କହିଛନ୍ତି ଯେ ଫରିଦାବାଦର ଏକ ମସଜିଦର ଜଣେ ଇମାମ୍ (ମୁଖ୍ୟ ଧର୍ମଗୁରୁ) ଯିଏକି ଇସ୍ତିଆକ୍ ଭାବରେ ଚିହ୍ନଟ ହୋଇଛନ୍ତି, ମୁଜାମ୍ମିଲଙ୍କ ସହିତ ନିୟମିତ ଯୋଗାଯୋଗରେ ଥିଲେ, ତାଙ୍କୁ ମଧ୍ୟ ତଦନ୍ତ ଦଳ ଗିରଫ କରିଛି ।
ଜବତ ସାମଗ୍ରୀରେ ତିନୋଟି ମ୍ୟାଗାଜିନ୍ ଏବଂ ୮୩ ଜୀବନ୍ତ ରାଉଣ୍ଡ ସହିତ ଗୋଟିଏ ଆସଲ୍ଟ ରାଇଫଲ୍, ଆଠ ଜୀବନ୍ତ ରାଉଣ୍ଡ ସହିତ ଗୋଟିଏ ପିସ୍ତଲ, ଦୁଇଟି ଖାଲି କାର୍ଟ୍ରିଜ୍, ଦୁଇଟି ଅତିରିକ୍ତ ମ୍ୟାଗାଜିନ୍, ୮ଟି ବଡ଼ ସୁଟକେସ୍, ୪ଟି ଛୋଟ ସୁଟକେସ୍ ଏବଂ ସନ୍ଦିଗ୍ଧ ବିସ୍ଫୋରକ ରାସାୟନିକ ଅନ୍ତର୍ଭୁକ୍ତ । ପୁଲିସ ବ୍ୟାଟେରୀ ସହିତ ୨୦ଟି ଟାଇମର୍, ୨୪ଟି ରିମୋଟ୍ କଣ୍ଟ୍ରୋଲ୍, ପାଞ୍ଚ କିଲୋଗ୍ରାମ ଭାରି ଧାତୁ, ୱାକି-ଟକି ସେଟ୍, ବୈଦ୍ୟୁତିକ ତାର, ବ୍ୟାଟେରୀ ଏବଂ ଅନ୍ୟାନ୍ୟ ନିଷିଦ୍ଧ ସାମଗ୍ରୀ ମଧ୍ୟ ଜବତ କରିଛି । ମହିଳା ଡାକ୍ତରଙ୍କ ମାରୁତି ସ୍ୱିଫ୍ଟ କାର ଜବତ କରାଯାଇଛି । ତଦନ୍ତରୁ ଜଣାପଡିଛି ଯେ ଡାକ୍ତର ଶକିଲ୍ ଫରିଦାବାଦର ଧୋଜ ଅଞ୍ଚଳରେ ଏକ କୋଠରୀ ଭଡା ନେଇଥିଲେ, ଯେଉଁଠାରେ ଆମୋନିୟମ୍ ନାଇଟ୍ରେଟ୍ ସଂରକ୍ଷଣ କରାଯାଇଥିଲା । ପ୍ରାୟ ୧୫ ଦିନ ପୂର୍ବେ ବିତରଣ କରାଯାଇଥିବା ରାସାୟନିକ ପଦାର୍ଥ ଆଠଟି ବଡ଼ ଏବଂ ଚାରୋଟି ଛୋଟ ସୁଟକେସ୍ରେ ଲୁଚାଇ ରଖାଯାଇଥିଲ ବୋଲି ସୂଚନା ଦେଇଛନ୍ତି ଫରିଦାବାଦ ପୁଲିସ କମିଶନର ସତ୍ୟେନ୍ଦ୍ର କୁମାର ଗୁପ୍ତା । ପୁଲିସ ପୂର୍ବରୁ କାଶ୍ମୀର ଉପତ୍ୟକାରେ ଡାକ୍ତର ରାଥରଙ୍କ ଏକ ଲକରରୁ ଏକ ଇକ-୪୭ ରାଇଫଲ୍ ଏବଂ ଗୁଳି ଜବତ କରିଥିଲା । ଗତକାଲି ଗୁଜରାଟ ଏଟିଏସ ଆତଙ୍କବାଦ କାର୍ଯ୍ୟକଳାପରେ ସଂପୃକ୍ତି ନେଇ ତେଲେଙ୍ଗାନାର ଜଣେ ଡାକ୍ତରଙ୍କୁ ମଧ୍ୟ ଗିରଫ କରିଥିଲା ।
