ଗରମ ପ୍ରବାହ ପରିସ୍ଥିତିର ମୁକାବିଲା ପାଇଁ ଏସ୍ଓପି ଜାରି : ନିୟମ ଖିଲାପ କଲେ ଦଣ୍ଡ

 ଭୁବନେଶ୍ୱର : ଅସାଧାରଣ ବର୍ଷା ଏବଂ ଅନିୟମିତ ଜଳବାୟୁ ଯୋଗୁଁ ଗ୍ରୀଷ୍ମ ଋତୁରେ ତାପମାତ୍ରା ଅସ୍ୱାଭାବିକ ଭାବରେ ବୃଦ୍ଧି ପାଇବା ଆରମ୍ଭ କରିଛି । ଏହା ବ୍ୟତୀତ, ବଡ ବଡ  କୋଠା ପୃଷ୍ଠ, ଅଧିକ ରାସ୍ତା ପୃଷ୍ଠ ଏବଂ ସୌରତାପ ଶକ୍ତି ଶୋଷଣ କରୁଥିବା ଭିତ୍ତିଭୂମି ଯୋଗୁଁ ସହରାଞ୍ଚଳଗୁଡ଼ିକ ଗ୍ରୀଷ୍ମ ଋତୁରେ ଅଧିକ ତାପମାତ୍ରା ଅନୁଭବ କରୁଛନ୍ତି । ପରିସ୍ଥିତିକୁ ଦୃଷ୍ଟିରେ ରଖି ଗୃହ ଓ ନଗର ଉନ୍ନୟନ ବିଭାଗ ଏକ ବିସ୍ତୃତ ଏସ୍ଓପି  ଜାରି କରି ଏହାକୁ କଡାକଡି  ପାଳନ କରିବା ଏବଂ ସମସ୍ତ ପୌରାଞ୍ଚଳ ଦ୍ୱାରା ଆବଶ୍ୟକ ପଦକ୍ଷେପ ନେବା ପାଇଁ କଡ଼ା ନିଦେ୍ର୍ଦଶ ଦିଆଯାଇଛି । ସମସ୍ତ ସହରାଞ୍ଚଳରେ ପର୍ଯ୍ୟାପ୍ତ ପାନୀୟ ଜଳ ଯୋଗାଣ ନିଶ୍ଚିତ କରିବା ଆବଶ୍ୟକ । ଏହି ଉଦେ୍ଦଶ୍ୟରେ ଜଳ ଯୋଗାଣ ପାଇପଲାଇନଗୁଡ଼ିକୁ ସଠିକ୍ କାର୍ଯ୍ୟକ୍ଷମ ଅବସ୍ଥାରେ ରଖାଯିବା ଉଚିତ ଏବଂ ଏହାର ଯେକୌଣସି ଅଭିଯୋଗର ୨୪ ଘଣ୍ଟା ମଧ୍ୟରେ ସମାଧାନ କରାଯିବା ଆବଶ୍ୟକ ବୋଲି ଏଥିରେ କୁହାଯାଇଛି । ପାନୀୟ ଜଳ ଯୋଗାଣ ସୁନିଶ୍ଚିତ କରିବା ପାଇଁ ଜରୁରୀକାଳୀନ ପଦକ୍ଷେପ ଗ୍ରହଣ କରିବା, ପାନୀୟ ଜଳ ଯୋଗାଇବା ପାଇଁ ବିଭିନ୍ନ ଅଭାବୀ ପକେଟରେ ପାଣି ଟ୍ୟାଙ୍କର ନିୟୋଜିତ କରାଯିବା ଉଚିତ । ସମସ୍ତ ନଳକୂପ/ ହାତପମ୍ପଗୁଡ଼ିକୁ କାର୍ଯ୍ୟକ୍ଷମ ଅବସ୍ଥାରେ ରଖିବାକୁ ପଡିବ । ନିୟନ୍ତ୍ରଣ କକ୍ଷଗୁଡ଼ିକ ଯଥାରୀତି ଖୋଲାଯିବା ଉଚିତ । ଜଳ ଅଭାବ ସମ୍ପର୍କରେ ପ୍ରାପ୍ତ ଅଭିଯୋଗଗୁଡ଼ିକର ସମାଧାନ ପାଇଁ ଦାୟୀ ଅଧିକାରୀମାନଙ୍କ ଦ୍ୱାରା ପରିଚାଳିତ ହେବା ଉଚିତ । ଭାରତୀୟ ପାଣିପାଗ ବିଭାଗ  ଦ୍ୱାରା ଜାରି ହୋଇଥିବା ଗରମ ଲହରୀ ସତର୍କତାକୁ ନିୟମିତ ଭାବରେ ଟ୍ରାକ୍ କରାଯିବା ଉଚିତ । 
ପୌରାଞ୍ଚଳ ଗୁଡ଼ିକ ସ୍ୱେଛାସେବୀ ସଂଗଠନ ଗୁଡିକ ମାଧ୍ୟମରେ ରାସ୍ତା କଡ଼, ଛକ, ସରକାରୀ କାର୍ଯ୍ୟାଳୟ, ବସ୍ ଷ୍ଟାଣ୍ଡ, ରେଳ ଷ୍ଟେସନ, ବଜାର ଇତ୍ୟାଦି ରଣନୈତିକ ସ୍ଥାନରେ ଅଧିକ ଜଳ କିଓସ୍କ ପାନୀୟ ଜଳ ବିତରଣ କେନ୍ଦ୍ର ଅର୍ଥାତ୍ ପାନୀୟ ଜଳ ବଣ୍ଟନ କେନ୍ଦ୍ର ଖୋଲିବା ଆରମ୍ଭ କରିବା ଉଚିତ । ମୁ୍ୟନିସିପାଲିଟି କଠିନ ଅଳିଆ, ବଗିଚା/ଗଛର ଅବଶିଷ୍ଟାଂଶ ପୋଡିବା ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ । ନିର୍ମାଣ ସଂସ୍ଥା ଏବଂ ପରିବାରକୁ କାର୍ଯ୍ୟ କରିବା ସମୟରେ ଢାଙ୍କି କିମ୍ବା ମାଟି/ଧୂଳି ଏଡାଇବା ପାଇଁ ସେମାନଙ୍କର ନିର୍ମାଣ କ୍ଷେତ୍ରକୁ ଘୋଡାଇ ରଖିବାକୁ ସତର୍କ କରାଯିବା ଉଚିତ । ଖୋଲା ଅଂଶରେ ପାଣି ସିଞ୍ଚନ କରିବାକୁ କୁହାଯାଇଛି । ନଚେତ୍ ସେମାନଙ୍କୁ ଦଣ୍ଡିତ କରାଯିବା ଉଚିତ । ରାସ୍ତାପାର୍ଶ୍ୱ ହୋଟେଲ ଏବଂ ଖାଦ୍ୟ ଦୋକାନଗୁଡ଼ିକ ଦ୍ୱାରା ପୋଡ଼ି ଯାଇଥିବା କୋଇଲା/ବ୍ରିକେଟରୁ ଉତ୍ପନ୍ନ ହେଉଥିବା ଅବଶିଷ୍ଟ ଫ୍ଲାଏ ପାଉଁଶ ରାସ୍ତାରେ ଗଦା ହେଉଛି ଯାହା ଧୂଳି ପ୍ରଦୂଷଣ ଏବଂ ତାପମାତ୍ରା ବୃଦ୍ଧି କରୁଛି । ସମସ୍ତ ସହରାଞ୍ଚଳରେ କୋଇଲା କିମ୍ବା କୋଇଲା ବ୍ରିକେଟ ବ୍ୟବହାର ନିଷେଧ କରାଯିବା ଉଚିତ । ସହରାଞ୍ଚଳ ଏବଂ ଏହାର ଆଖପାଖରେ ଥିବା ସମସ୍ତ ଜଳାଶୟଗୁଡ଼ିକୁ ପୁନରୁଦ୍ଧାର ଏବଂ ମରାମତି କରାଯିବା ଉଚିତ । ସହରାଞ୍ଚଳ ପରିବେଶର ଉନ୍ନତି ସମ୍ବନ୍ଧୀୟ ସମସ୍ତ ପରିବେଶଗତ ଆଇନ/ନିୟମ, ନିଦେ୍ର୍ଦଶାବଳୀକୁ କଡାକଡ଼ି ପାଳନ କରାଯିବା ଉଚିତ ଏବଂ ପୋଲିସ, ଜଙ୍ଗଲ, ସ୍ୱାସ୍ଥ୍ୟ ବିଭାଗ ଇତ୍ୟାଦି ସମ୍ପୃକ୍ତ କର୍ତ୍ତୃପକ୍ଷମାନେ ସେମାନଙ୍କ ନିଜ ନିଜ କାମ ପରିଚାଳନା କରିବାକୁ ପରାମର୍ଶ ଦିଆଯାଇଛି ।