ଜାଲିଆତିରେ ମାହିର ‘ଅଲ ଫଲାହ’ ଠକିଛି ୪୧୫ କୋଟି 

ନୂଆଦିଲ୍ଲୀ : ଦିଲ୍ଲୀ ଲାଲକିଲ୍ଲା ବିସ୍ଫୋରଣର ତଦନ୍ତ ମଧ୍ୟରେ ଫରିଦାବାଦସ୍ଥିତ ଅଲ୍‌ ଫଲାହ ଚାରିଟେବୁଲ୍‌ ଟ୍ରଷ୍ଟ ଓ ଏହାର ସହଯୋଗୀ ସଂସ୍ଥାଗୁଡ଼ିକରେ ବ୍ୟାପକ ଅନିୟମିତତା ସାମ୍ନାକୁ ଆସିଛି । ଏହି ସଂସ୍ଥାଗୁଡ଼ିକ ମିଥ୍ୟା ମାନ୍ୟତା ଦେଖାଇ ବିପୁଳ ଲାଭ କରିଥିବା ଅଭିଯୋଗ ହୋଇଛି । ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କୋର୍ଟରେ ଦାବି କରିଛି ଯେ ଏହା ମିଛ ଦାବି ମାଧ୍ୟମରେ ପ୍ରାୟ ୪୧୫ କୋଟି ଟଙ୍କା ରୋଜଗାର କରିଛି । ଅଲ୍‌ ଫଲାହର ପ୍ରତିଷ୍ଠାତା ତଥା ଅଧ୍ୟକ୍ଷ ଜୱାଦ ଅହମ୍ମଦ ସିଦ୍ଦିକିଙ୍କୁ ଆତଙ୍କବାଦ ପାଣ୍ଠି-ସଂଯୁକ୍ତ ମନି ଲଣ୍ଡରିଂ ତଦନ୍ତରେ ଇଡି ଗିରଫ କରିଛି ।  କୋର୍ଟ ତାଙ୍କୁ ୧୩ ଦିନ ପାଇଁ ଇଡି ହେପାଜତକୁ ପଠାଇ ଦେଇଛି । ମନି ଲଣ୍ଡରିଂ ନିବାରଣ ଆଇନ (ପିଏମଏଲଏ) ଅନୁଯାୟୀ ହୋଇଥିବା କଥିତ ଉଲ୍ଲଂଘନର ତଦନ୍ତରୁ ଜଣାପଡିଛି ଯେ ପ୍ରତିଷ୍ଠାନଗୁଡ଼ିକର ବ୍ୟାଙ୍କ ଆକାଉଣ୍ଟ ଓ ଆୟକର ରିଟର୍ଣ୍ଣ (ଆଇଟିଆରଏସ) ଗୋଟିଏ ସ୍ଥାୟୀ ଆକାଉଣ୍ଟ ନମ୍ବର (ପାନ) ଅଧୀନରେ ଥିଲା, ଯାହା ସୂଚାଇ ଦିଏ ଯେ ଆର୍ଥିକ ନିୟନ୍ତ୍ରଣ ଗୋଟିଏ ଟ୍ରଷ୍ଟରେ ନ୍ୟସ୍ତ କରାଯାଇଥିଲା ।

     ୨୦୧୪-୧୫ ପରଠାରୁ ଆଇଟିଆର୍‌ ତଦନ୍ତରେ ଆଶ୍ଚର୍ଯ୍ୟଜନକ ସଂଖ୍ୟା ଦେଖାଯାଇଥିଲା । ଆଇଟିଆର୍‌ ପ୍ରକାଶ କରିଥିଲା ଯେ ୨୦୧୪-୧୫ ଓ ୨୦୧୫-୧୬ ମଧ୍ୟରେ ୩୦.୮୯ କୋଟି ଏବଂ ୨୯.୪୮ କୋଟି ଟଙ୍କା ଦାନ ଭାବରେ ଦର୍ଶାଯାଇଥିଲା । ୨୦୧୬-୧୭ ପରଠାରୁ ବିଶ୍ୱବିଦ୍ୟାଳୟ ଏହାର ଆୟକୁ ଶିକ୍ଷାଗତ ଆୟ ଭାବରେ ଦେଖାଇବା ଆରମ୍ଭ କରିଥିଲା । ୨୦୧୮-୧୯ ପରଠାରୁ ଆୟରେ ଆକାଶ ଛୁଅାଁ ବୃଦ୍ଧି ଲକ୍ଷ୍ୟ କରାଯାଇଛି । ୨୦୧୮-୧୯ରେ ଆୟ ୨୪.୨୧ କୋଟି ଟଙ୍କାରୁ ବୃଦ୍ଧି ପାଇ ୨୦୨୪-୨୫ରେ ୮୦.୦୧ କୋଟି ଟଙ୍କାରେ ପହଞ୍ଚିଛି । ଏହି ସାତ ବର୍ଷ ମଧ୍ୟରେ ଏହା ମୋଟ ୪୧୫ କୋଟି ଟଙ୍କା ରହିଛି ।

      ବିଶ୍ୱବିଦ୍ୟାଳୟ ବିନା ମାନ୍ୟତାରେ ବି ଛାତ୍ରମାନଙ୍କଠାରୁ ପୂରା ଫି ଆଦାୟ କରିଥିଲା । ଏହା ଠକେଇ ଏବଂ ଜାଲିଆତି ପରିସରଭୁକ୍ତ । ବିଶ୍ୱବିଦ୍ୟାଳୟ ବିରୁଦ୍ଧରେ ଦାୟର ମାମଲାଗୁଡ଼ିକ ଅଭିଯୋଗ କରିଛି ଯେ ଛାତ୍ରମାନଙ୍କୁ ମିଥ୍ୟା ମାନ୍ୟତା ବ୍ୟବହାର କରି ପ୍ରବେଶ କରାଯାଇଥିଲା, ନକଲି ଡକ୍ୟୁମେଣ୍ଟ ପ୍ରସ୍ତୁତ କରାଯାଇଥିଲା ଓ ଏହି ଅଭିଯୋଗ ଆଧାରରେ "ଅବୈଧ ଆୟ’ ସୃଷ୍ଟି କରାଯାଇଥିଲା । ପିଏମଏଲଏ ତଦନ୍ତ ସମୟରେ ଠୋସ୍‌ ପ୍ରମାଣ ମିଳିଥିଲା । ଯାହା ଦର୍ଶାଉଥିଲା ଯେ ବିଶ୍ୱବିଦ୍ୟାଳୟ ଜନସାଧାରଣଙ୍କୁ ଠକିଥିଲା ଏବଂ ଛାତ୍ରଛାତ୍ରୀଙ୍କ ଫି ବ୍ୟକ୍ତିଗତ ଉଦ୍ଦେଶ୍ୟରେ ବ୍ୟବହାର କରାଯାଇଥିଲା ବୋଲି ଇଡି ଅଭିଯୋଗ କରିଛି । ଏହା ମଧ୍ୟ ସ୍ୱୀକାର କରାଯାଇଛି ଯେ ଜୱାଦ ସିଦ୍ଦିକି, ଯିଏକି ବିଶ୍ୱବିଦ୍ୟାଳୟର କୁଳପତି ମଧ୍ୟ ସମସ୍ତ ପ୍ରମୁଖ ଆର୍ଥିକ ନିଷ୍ପତ୍ତି ନେଉଥିଲେ । ଫରିଦାବାଦର ୭୦ ଏକର ଜମିରେ ବିସ୍ତାରିତ ଅଲ୍‌ ଫଲାହ ବିଶ୍ୱବିଦ୍ୟାଳୟ  ଲାଲକିଲ୍ଲା ନିକଟରେ ହୋଇଥିବା ବିସ୍ଫୋରଣରେ ୧୫ ଜଣଙ୍କ ଜୀବନ ନେଇଥିବା ଅନେକ ଆତଙ୍କବାଦୀ ସନ୍ଦିଗ୍ଧଙ୍କ ମଧ୍ୟରେ ଏହାର ସାଧାରଣ ସଂଯୋଗ ରହିଛି ।ଡକ୍ଟର ଉମର ମହମ୍ମଦ ଓରଫ ଡକ୍ଟର ଉମର ଉନ୍‌-ନାଇବ, ଯିଏ ଆଇ୨୦ କାରରେ ନିଜକୁ ବିସ୍ଫୋରଣ କରିଥିଲେ ଏବଂ ତାଙ୍କ ସହଯୋଗୀ ଶାହିନ ଶାହିଦ, ମୁଜାମ୍ମିଲ୍‌ ଶକିଲ୍‌ ଏବଂ ଆଦିଲ୍‌ ରାଥର ଅଲ୍‌ ଫଲାହରେ କାମ କରୁଥିଲେ । ସେମାନେ ଲାଲ କିଲ୍ଲା ନିକଟରେ ମହମ୍ମଦ ଦ୍ୱାରା ବିସ୍ଫୋରଣ କରାଯାଇଥିବା ବିସ୍ଫୋରକ ପାଇଁ ବିଶ୍ୱବିଦ୍ୟାଳୟ ପରୀକ୍ଷାଗାରରୁ ରାସାୟନିକ ପଦାର୍ଥ ଚୋରା ଚାଲାଣ କରୁଥିବା ମଧ୍ୟ ଅଭିଯୋଗ ହୋଇଛି ।