ବିପୁଳ ପରିମାଣର ଗଞ୍ଜେଇ ଜବତ
Rasmita Behera
ସମ୍ବଲପୁର: ସ୍ଥାନୀୟ ଧନୁପାଲି ଥାନା ପୁଲିସ କୁଲୁଥକାନୀ ନିକଟରେ ଥିବା ଏକ କବାଡ଼ି ଗୋଦାମରେ ଚଢ଼ଉ କରି ବିପୁଳ ପରିମାଣର ଚୋରା ଗଞ୍ଜେଇ ଜବତ କରିଛି । ଏଥିରେ ଦୁଇ ଜଣଙ୍କୁ ଗିରଫ କରାଯାଇ ଏନ୍ଡିପିଏସ୍ ଆଇନ୍ର ବିଭିନ୍ନ ଦଫାରେ ମାମଲା ରୁଜୁ ସହିତ କୋର୍ଟଚାଲାଣ କରାଯାଇଥିବା ପ୍ରକାଶ । ଥାନାର ଏକ ଟିମ୍ ଏସ୍ଆଇ ଇନ୍ଦ୍ରଦେବ ଓରାମ୍ଙ୍କ ସହିତ ପାଟ୍ରୋଲିଂ କରୁଥିବା ସମୟରେ କୁଲୁଥକାନୀର କବାଡ଼ି ଗୋଦାମରେ ବେଆଇନ ଗଞ୍ଜେଇ କାରବାର ଚାଲୁଥିବା ଜାଣି ଚଢ଼ଉ କରିଥିଲେ । ଏହି ସମୟରେ ସେଠାରୁ ସମୀର ମହାନନ୍ଦିଆ (୨୮), ଜିଲ୍ଲା ଅନୁଗୁଳ ଏବଂ ସୋମା ଦାଶ, ଅଇଁଠାପାଲି, ସମ୍ବଲପୁରଙ୍କୁ ନିର୍ବାହୀ ମାଜିଷ୍ଟ୍ରେଟଙ୍କ ଉପସ୍ଥିତିରେ ଗିରଫ କରିଥିଲେ । ସେଠାରେ ଥିବା ତିନୋଟି ଗାଡ଼ିରେ ରଖା ଯାଇଥିବା ୧୨୨ କେଜି ୭୬୦ ଗ୍ରାମ୍ ଗଞ୍ଜେଇ ଜବତ କରାଯାଇଥିଲା । ଏଥି ସହିତ ଗୋଟିଏ ମିନି ଟ୍ରକ୍, ଅଶୋକ ଓ ଟାଟା କମ୍ପାନୀର ଆଉ ଦୁଇଟି ଗାଡ଼ିକୁ ମିଶାଇ, ତିନୋଟି ଗାଡ଼ି, ଦୁଇଟି ମୋବାଇଲ ଫୋନ୍, ନଗଦ ୩ଶହ ୯୦ ଟଙ୍କା ଜବତ କରାଯାଇଛି ।
