ହାଇତିରେ ‘ମେଲିସା’ର ତାଣ୍ଡବ, ୨୫ ମୃତ

• ଜାମାଇକାରେ ରଚିଲା ଧ୍ୱଂସଲୀଳା

ନୂଆଦିଲ୍ଲୀ : ହାଇତିରେ ଘୂର୍ଣ୍ଣିବାତ୍ୟା ମେଲିସା ତାଣ୍ଡବ ରଚିଛି । ପ୍ରବଳ ବର୍ଷା ଓ ପବନ ଯୋଗୁ ଏକ ନଦୀ ତା'ର କୂଳ ଲଙ୍ଘି ଘରଗୁଡିକରେ ପାଣି ପଶି ଯାଇଥିଲା । ପାଣିର ତୀବ୍ରତା ଏତେ ପ୍ରଖର ଥିଲା ଯେ ଦକ୍ଷିଣ ଉପକୂଳବର୍ତ୍ତୀ ସହର ପେଟିଟ୍‌-ଗୋଭେରେ ସମଗ୍ର ପଡୋଶୀକୁ ଭସାଇ ନେବା ପରେ ଅତି କମରେ ୨୫ ଜଣଙ୍କର ମୃତ୍ୟୁ ହୋଇଛି । ସହରର ମେୟର ଜିନ୍‌ ବର୍ଟ୍ରାଣ୍ଡ ସବ୍ରେମ୍‌ କହିଛନ୍ତି ଯେ ଘୂର୍ଣ୍ଣିବାତ୍ୟାରୁ ପ୍ରବଳ ବର୍ଷା ହେବା ପରେ ଲା ଡିଗ ନଦୀ ପ୍ରବାହିତ ହୋଇ ଡଜନ ଡଜନ ଘର ବୁଡ଼ିଗଲା । ମୁଁ ଏପରି ପରିସ୍ଥିତିରେ ବିଚଳିତ ବୋଲି ସେ କହିଛନ୍ତି । ଉଦ୍ଧାର କାର୍ଯ୍ୟ ଜାରି ରହିଛି କିନ୍ତୁ ଅନେକ ଲୋକ ଭୁଶୁଡ଼ି ପଡ଼ିଥିବା ନିର୍ମାଣ ତଳେ ଫସି ରହିଛନ୍ତି । ଆମକୁ ପୀଡିତମାନଙ୍କୁ ଉଦ୍ଧାର କରିବା ପାଇଁ ତୁରନ୍ତ ସରକାରୀ ସାହାଯ୍ୟ ଆବଶ୍ୟକ ।

କାରିବିଆନରେ ରେକର୍ଡ ହୋଇଥିବା ସବୁଠାରୁ ଶକ୍ତିଶାଳୀ ଝଡ଼ ମଧ୍ୟରୁ ଏହା ପୂର୍ବରୁ ଜାମାଇକା ଓ ପୂର୍ବ କ୍ୟୁବାକୁ ଧ୍ୱଂସ କରିସାରିଛି । ଅନେକ ଦ୍ୱୀପପୁଞ୍ଜରେ ବିନାଶର ଏକ ଧାରା ଛାଡିଛି । ଆମେରିକାର ଦ୍ଭ ଜାତୀୟ ହରିକେନ୍‌ କେନ୍ଦ୍ର (ଏନଏଚସି) ଅନୁଯାୟୀ, ମେଲିସା ବୁଧବାର ପ୍ରତ୍ୟୁଷରେ ପୂର୍ବ କ୍ୟୁବାରୁ ଦକ୍ଷିଣ-ପଶ୍ଚିମ ଆଟଲାଣ୍ଟିକକୁ ସମୁଦ୍ରକୂଳକୁ ଚାଲିଯାଇଛି, ସର୍ବାଧିକ ନିରନ୍ତର ପବନ ବର୍ତ୍ତମାନ ୧୬୦ କିମି ବେଗରେ ରହିଛି, ଯାହାକି ମଙ୍ଗଳବାର ଦିନ ଜାମାଇକାରେ ଆଘାତ କରିବା ସମୟରେ ୨୧୦ କିମି ବେଗ ଥିଲା । ଯାହାକି ଦ୍ୱୀପର ଇତିହାସରେ ସବୁଠାରୁ ଶକ୍ତିଶାଳୀ । ସାମାନ୍ୟ ଦୁର୍ବଳ ହେବା ପୂର୍ବରୁ ଘୂର୍ଣ୍ଣିଝଡ଼ଟି ସାଣ୍ଟିଆଗୋ ଡି କ୍ୟୁବାରୁ ପ୍ରାୟ ୨୫ ମାଇଲ ପଶ୍ଚିମରେ ୧୨୦ ମାଇଲ (୧୯୫ କିଲୋମିଟର) ବେଗରେ ପବନ ସହିତ କ୍ୟୁବାର ଗୁଆମ ଅଞ୍ଚଳରେ ସ୍ଥଳଭାଗ ଛୁଇଁଥିଲା । ଏନଏଚସି ସମଗ୍ର ଅଞ୍ଚଳରେ "ଜୀବନଘାତକ ଝଡ଼, ଆକସ୍ମିକ ବନ୍ୟା, ଭୂସ୍ଖଳନ ଏବଂ କ୍ଷତିକାରକ ଘୂର୍ଣ୍ଣିଝଡ଼ ପବନ’ ବିଷୟରେ ସତର୍କ କରାଇ ଦେଇଥିଲା । କ୍ୟୁବା କର୍ତ୍ତୃପକ୍ଷ କହିଛନ୍ତି ଯେ ଝଡ଼ ଆସିବା ପୂର୍ବରୁ ୭୩୫,୦୦୦ ରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଥିଲା । ସରକାର ଗୁରୁତର ବନ୍ୟା ଓ ଭୂସ୍ଖଳନ ପାଇଁ ପ୍ରସ୍ତୁତ ଥିବାରୁ ପୂର୍ବ କ୍ୟୁବାର ଅଧିକାଂଶ ଅଞ୍ଚଳକୁ ବିଦ୍ୟୁତ୍‌ ବିଚ୍ଛିନ୍ନ କରାଯାଇଥିଲା, ବିଶେଷକରି ପାର୍ବତ୍ୟ ସିଏରା ମାଏଷ୍ଟ୍ରା ରେଞ୍ଜରେ । କିଛି ଘଣ୍ଟା ପୂର୍ବରୁ ମେଲିସା ପ୍ରଳୟଙ୍କରୀ ପବନ ଏବଂ ମୁଷଳଧାରା ବର୍ଷାରେ  ଜାମାଇକାରେ ଧ୍ୱଂସ ଲୀଳା ରଚିଥିଲା । ସ୍ଥାନୀୟ ଅଧିକାରୀଙ୍କ ଅନୁଯାୟୀ ସେଣ୍ଟ ଏଲିଜାବେଥର ଦକ୍ଷିଣ-ପଶ୍ଚିମ ପାରିସ "ପାଣି ତଳେ’ ଥିଲା, ପ୍ରମୁଖ ହସ୍ପିଟାଲ, ଘର ଏବଂ ରାସ୍ତା ନେଟୱାର୍କ ଗୁରୁତର ଭାବରେ କ୍ଷତିଗ୍ରସ୍ତ ହୋଇଛିା । ପ୍ରଧାନମନ୍ତ୍ରୀ ଆଣ୍ଡ୍ରୁ ହୋଲନେସ୍‌ କହିଛନ୍ତି ଯେ ପାଞ୍ଚ ଲକ୍ଷରୁ ଅଧିକ ବାସିନ୍ଦା ବିଦ୍ୟୁତ୍‌ ହରାଇଛନ୍ତି ଏବଂ କିଛି ମୃତ୍ୟୁର ଆଶଙ୍କା ରହିଛି ବୋଲି ଚେତାବନୀ ଦେଇଛନ୍ତି । "ଆମ ଦେଶ ମେଲିସା ଘୂର୍ଣ୍ଣିବାତ୍ୟା ଦ୍ୱାରା ଧ୍ୱଂସ ପାଇଛି, କିନ୍ତୁ ଆମେ ପୁନଃନିର୍ମାଣ କରିବୁ, ଏବଂ ଆମେ ପୂର୍ବ ଅପେକ୍ଷା ଆହୁରି ଭଲ କରିବୁ,’ ବୋଲି ହୋଲନେସ୍‌ ସିଏନଏନକୁ କହିଛନ୍ତି ।