୧୨ ବର୍ଷର ଝିଅକୁ ଚାକରାଣୀ ବନାଇଲା ବାପା ; ଉଦ୍ଧାର କଲା ଚାଇଲ୍ଡ ଲାଇନ୍
Jitendra Sahu
5782
ଭୁବନେଶ୍ୱର, ୧୧ା୯ : ମଦ ପିଇବା ପାଇଁ ୧୨ ବର୍ଷର ନାବାଳିକା ଝିଅକୁ ଅନ୍ୟ ଘରେ ଚାକରାଣୀ ବନାଇଲା ବାପା । ବର୍ଷେ ପରେ ଭୁବନେଶ୍ୱର ଏୟାରପୋର୍ଟ ଥାନା ଅଧିନ ପଲାସପଲ୍ଲୀର ଏକ ଘରୁ ନାବାଳିକାଙ୍କୁ ଉଦ୍ଧାର କଲା ଚାଇଲ୍ଡ ଲାଇନ୍ସ ଟିମ । ପରେ ତାଙ୍କୁ ଖୋର୍ଦ୍ଧା ସିଡବ୍ଲୁସିରେ ହାଜର କରାଇ ଭିଜେଏସ୍ଏସ୍ ଓପନ ସେଲ୍ଟରରେ ଛଡ଼ାଯାଇଛି ।
ସୂଚନା ଯୋଗ୍ୟଯେ, ଯାଜପୁର ଜିଲ୍ଲା କୁଆଖାଇ ଅଞ୍ଚଳରେ ରହୁଥିବା ଜଣେ ବ୍ୟକ୍ତି ଓ ତାଙ୍କ ସ୍ତ୍ରୀ ଦିନ ମଜୁରିଆ ଭାବେ କାମ କରନ୍ତି । ହେଲେ ଯାହା କାମ କରି ଟଙ୍କା ଆଣନ୍ତି ତାହାକୁ ମଦପି ଉଡାଇ ଦେଇଥାନ୍ତି ଉଦ୍ଧାର ନାବାଳିକାଙ୍କ ବାପା । ଯାହାଫଳରେ ଘରେ ଖାଇବା ପିଇବା ଅସୁବିଧା ଦେଖାଯାଇଥିଲା । ଫଳରେ ସେ ମଦ ପିଇବା ପାଇଁ ତାଙ୍କର ୧୨ ବର୍ଷର ନାବାଳିକା ଝିଅକୁ ପାଠ ପଢ଼ା ବଦଳରେ ତାଙ୍କୁ ଭୁବନେଶ୍ୱର ଏୟାରପୋର୍ଟ ଥାନା ଅଧିନ ପଲାସପଲ୍ଲୀ ଅଞ୍ଚଳ ଲେନ୍-୯ ପ୍ଲଟ ନମ୍ବର-୧୫୪୬ରେ ରହୁଥିବା ତନ୍ମୟ ମହାପାତ୍ରଙ୍କ ଘରେ କାମ କରିବାକୁ ଛାଡି ଦେଇଥିଲେ ଓ ବର୍ଷେ ହବ ମିଳୁଥିବା ଦରମା ଟଙ୍କାକୁ ନିଜେ ନେଇଯାଉଥିଲେ ବାପା । ହେଲେ ବାପା କେତେଟଙ୍କା ମାଲିକଙ୍କ ଠାରୁ ନିଅନ୍ତି ତାହା ନାବାଳିକା ଜାଣିନଥାନ୍ତି । କିନ୍ତୁ ଘର କାମରେ ଟିକିଏ ଭୁଲ ହେଲେ ନାବାଳିକାଙ୍କୁ ମାଲିକାଣୀଙ୍କ ଠାରୁ ମାଡ ଖାଇବାକୁ ପଡୁଥିଲା । ଏହି ଖବର ଆଜି ରୁଚିକା ଚାଇଲ୍ଡ ଲାଇନ୍ ସଦସ୍ୟ ମାନେ ଖବର ପାଇଥିଲେ । ପରେ ଏୟାରପୋର୍ଟ ଥାନା ସହାୟତାରେ ଚଢ଼ାଉ କରି ନାବାଳିକାଙ୍କୁ ଉଦ୍ଧାର କରିଥିଲେ । ପରେ ତାଙ୍କୁ ସିଡବ୍ଲୁସିରେ ହାଜର କରାଇ ଏକ ମାମଲା ରୁଜୁକରି ଭିଜେଏସ୍ଏସ୍ ଓପନ ସେଲ୍ଟରରେ ଛାଡିଥିଲେ ।
