ମହାସରସ୍ୱତୀ ବେଶରେ ପୂଜା ପାଇଲେ ମା’ ଭଦ୍ରକାଳୀ,  ଆଜି ମହାଯଜ୍ଞର ପୂର୍ଣ୍ଣାହୁତି ଓ ମହାଲକ୍ଷ୍ମୀ ବେଶ

ାା ପ୍ରଭାନୁ୍ୟଜ ।ା ଭଦ୍ରକ: ପୁରାଣ ପ୍ରସିଦ୍ଧ ଭଦ୍ରକର ଅଧିଷ୍ଠାତ୍ରୀ ଦେବୀ ମା’ ଭଦ୍ରକାଳୀ ସପ୍ତମାତୃକା ବେଶର ଷଷ୍ଠ ଦିବସରେ ମହାସରସ୍ୱତୀ ବେଶରେ ପୂଜା ପାଇଛନ୍ତି । ଆଜି ସକାଳ ଠାରୁ ପୀଠରେ ଶହ ଶହ ଭକ୍ତ ମାନଙ୍କର ଭିଡ଼ ଲାଗିଥିଲା । ଭକ୍ତ ମାନେ ଭକ୍ତି ଓ ନିଷ୍ଠାର ସହ ମାଙ୍କୁ ଧୂପ, ଦୀପ, ନୈବେଦ୍ୟ ଅର୍ପଣ କରି ଆଶିଷ କାମନା କରିଥିଲେ । ମହାସରସ୍ୱତୀ ବେଶରେ ମା’ ଶ୍ୱେତ ପାଟ ବସ୍ତ୍ର ପରିଧାନ କରି ସ୍ୱର୍ଣ୍ଣ, ରୌପ୍ୟ ଅଳଙ୍କାର ସହିତ ବିଭିନ୍ନ ଆଭୂଷଣରେ ସଜାଇ ହୋଇଥିଲେ । ମା’ଙ୍କର ମୁଖ ମଣ୍ଡଳ ଶ୍ୱେତ ବର୍ଣ୍ଣ ଥିବା ବେଳେ ମା’ ହଂସ ବାହନରେ ବିରାଜମାନ କରିଥିଲେ । ହସ୍ତ ଯୁଗଳରେ ବୀଣା ଧାରଣ କରିଥିବା ବେଳେ ଅନ୍ୟ ହସ୍ତ ରେ ଜପା ମାଳି ଓ ଶ୍ୱେତପଦ୍ମ ଧାରଣ କରିଥିଲେ । ଶ୍ୱେତପଦ୍ମାସନୀ, ହଂସବାହିନୀ, ବୀଣା ବଦନରତା ମା’ ମହା ସରସ୍ୱତୀଙ୍କର ଅପୂର୍ବ ଚତୁର୍ଦ୍ଧା ରୂପ ଭକ୍ତ ମାନଙ୍କୁ ଆକୃଷ୍ଟ କରିଥିଲା । ଭକ୍ତ ମାନେ ଦୁଇ ହାତ ଟେକି ମହସରସ୍ୱତିଙ୍କର ଜୟ ଗାନ କରୁଥିବା ବେଳେ ମହିଳା ମାନଙ୍କର ହୁଳହୁଳୀରେ ମନ୍ଦିର ପ୍ରକମ୍ପିତ ହେଉଥିଲା । ମା’ ମହା ସରସ୍ୱତୀ ବିଦ୍ୟା, ଜ୍ଞାନ ବୁଦ୍ଧି ଓ ସଙ୍ଗୀତର ପ୍ରତୀକ ଅଟନ୍ତି । ଭାଗବତ କଥା ଅନୁସାରେ ମଧୁର ବିନୟ ବଚନ, କହି ତୋଷିବ ଜନମନ ଏହା ମହସରସ୍ୱତୀଙ୍କ କୃପାରୁ ହିଁ ସମ୍ଭବ ହୋଇଥାଏ । ମହାଯଜ୍ଞର ଷଷ୍ଠ ଦିବସ ରେ ପୀଠ ରେ ଗୀତା ପାଠ, ଶତ ଚଣ୍ଡିପାଠ, ହୋମ, ବେଦପାଠ, ନାମସଙ୍କୀର୍ତ୍ତନ,ଭଜନ ସହ ଶାସ୍ତ୍ରୀୟ ବେଦବିତ୍ତ୍ ପଣ୍ଡିତ ମାନଙ୍କର ମନ୍ତ୍ର ଧ୍ୱନୀ ମନ୍ଦିର ରେ ଏକ ନିଆରା ଆଧ୍ୟାତ୍ମିକ ପରିବେଶ ସୃଷ୍ଟି କରିଛି । ସନ୍ଧ୍ୟା ଆଳତୀ ପରେ ପୁଲିସ ବିଭାଗର ଅବସର ପ୍ରାପ୍ତ ଅଧିକାରୀ ମୃତୁ୍ୟଞ୍ଜୟ ନାରାୟଣ ପଣ୍ଡା ଶ୍ରୀ ମତ ଭାଗବତ ଗୀତା ଓ ଜନ୍ମ ମୃତୁ୍ୟର ରହସ୍ୟ ଉପରେ ପ୍ରବଚନ ପ୍ରଦାନ କରିଥିଲେ । ସପ୍ତମାତୃକା ବେଶର ଅନ୍ତିମ ଦିବସ ବୁଧବାର ମା’ ମହାଲକ୍ଷ୍ମୀ ବେଶ ଧାରଣ କରିବେ । ମା’ ଙ୍କ ର ମହା ଲକ୍ଷ୍ମୀ ବେଶ ସହିତ ଦେବଭୂମି ଭାରତ ବର୍ଷ ହିତାର୍ଥେ ପୀଠ ରେ ଚାଲୁ ରହିଥିବା ମହାଯଜ୍ଞ ର ପୂର୍ଣ୍ଣାହୂତି ଅନୁଷ୍ଠିତ ହେବ । ପ୍ରାୟ ପନ୍ଦର ହଜାର ଶ୍ରଦ୍ଧାଳୁ ଭକ୍ତଙ୍କ ନିମନ୍ତେ ମନ୍ଦିର ପ୍ରଶାସନ ଏବଂ ସେବାୟତ ମାନଙ୍କ ଦ୍ୱାରା ପ୍ରସାଦ ଓ ପହୁଡ ଭୋଗର ଆୟୋଜନ କରାଯାଇଛି । ଶାନ୍ତି ଶୃଙ୍ଖଳାର ସହ ପୂଜା ରୀତି ନୀତି ଏବଂ ସମୟ ଅନୁସାରେ ପୂର୍ଣ୍ଣାହୁତି ସଂପନ୍ନ କରିବା ନିମନ୍ତେ ପ୍ରଶାସନ ତରଫରୁ ବ୍ୟାପକ ପ୍ରସ୍ତୁତିଚୂଡାନ୍ତ ହୋଇଛି  ।