ସହରରେ ସ୍ୱେରେଜ୍‌ ଫେଲ୍‌

ଭୁଲ୍‌ ଡିପିଆର ପାଇଁ ଅଧିକ ୩ ହଜାର କୋଟି ଖର୍ଚ୍ଚ
ରାଜଧାନୀବାସୀ ପିଉଥିଲେ ଦୂଷିତ ପାଣି
ଭୁବନେଶ୍ୱର : ସହରାଞ୍ଚଳ ବିକାଶ ପାଇଁ ପୂର୍ବ ସରକାର କେବଳ ବାହାସ୍ଫୋଟ ମାରୁଥିଲେ  । ସଠିକ ଯୋଜନାର ଅଭାବ ଓ ଡିପିଆରରେ ତ୍ରୁଟି ପାଇଁ ୩ ହଜାର କୋଟି ଟଙ୍କାର ଅତିରିକ୍ତ ବ୍ୟୟ ହୋଇଥିଲା  । ସ୍ୱେରେଜ ବିକାଶରେ ନବୀନ ସରକାରଙ୍କ ବିଫଳତାର ହିସାବ ଦେଇଛନ୍ତି ଭାରତର ମହାଲେଖା ନିୟନ୍ତ୍ରକ ତଥା ମହାସମୀକ୍ଷକ (କାଗ୍‌)  । ମହାନଗର ନିଗମରେ ବର୍ଷା ଜଳ ନିଷ୍କାସନ ଓ ସ୍ୱେରେଜ୍‌ ପରିଚାଳନା ନେଇ କାଗ୍‌ ରିପୋର୍ଟ ପ୍ରଦାନ କରିଛନ୍ତି  । ସେଥିରେ ସ୍ପଷ୍ଟ ଭାବେ ଉଲ୍ଳେଖ ରହିଛିଯେ, ଉପଯୁକ୍ତ ଯୋଜନା ଅଭାବରୁ ହଜାର ହଜାର କୋଟିର ଅତିରିକ୍ତ ବ୍ୟୟବରାଦ ହୋଇଥିଲା  । ଏବାବଦରେ ପ୍ରାୟ ୩ ହଜାର କୋଟି ଟଙ୍କା ଅଧିକ ବ୍ୟୟ ବରାଦ କରିବାକୁ ପଡ଼ିଥିଲା  । 

ଏତଦବ୍ୟତୀତ ଅନେକ ତ୍ରୁଟି ବିଚ୍ୟୁତି ବାହାର କରିଛନ୍ତି କାଗ୍‌  । ସମ୍ବଲପୁର ଓ ରାଉରକେଲା ମହାନଗର ନିଗମରେ ସ୍ୱେରେଜ ବ୍ୟବସ୍ଥା ପାଇଁ ଠିକାଦାରଙ୍କୁ ୬୨୨ କୋଟି ଟଙ୍କା ଦିଆଯାଇଥିଲା  । ବିଏମସି ଓ ସିଏମସି ପାଇଁ ପ୍ରଥମେ ୯୪୫ କୋଟି ଟଙ୍କା ବ୍ୟୟରେ ତିନୋଟି ସ୍ୱେରେଜ ଏବଂ ଡ୍ରେନେଜ୍‌ ପାଇଁ ଡିପିଆର କରାଯାଇଥିଲା  ।  ପରେ ସଂଶୋଧିତ ପ୍ରସ୍ତାବ ଆସିବାରୁ ପ୍ରକଳ୍ପ ମୂଲ୍ୟ ୨୯୭୪ କୋଟି ଟଙ୍କାକୁ ବୃଦ୍ଧି ପାଇଥିଲା  । 

ଗାଏମୋଟ୍‌ କହିଲେ ବାରବାର ଡିପିଆର ବଦଳିଥିଲା  । ଅର୍ଥାତ୍‌ ଏଥିରେ ଦୂରଦୃଷ୍ଟିର ଅଭାବ ସହ ଅଧିକାରୀମାନେ ଅବହେଳା ପ୍ରଦର୍ଶନ କରିଥିଲେ  । ଚାରୋଟି ପ୍ରକଳ୍ପ ୯ ବର୍ଷରୁ ଅଧିକ ସମୟ ଧରି ସମ୍ପୂର୍ଣ୍ଣ ହୋଇପାରିନଥିଲା  । ଅପରପକ୍ଷରେ ବାରବାର ଯୋଜନା, ନକ୍ସା ଓ ଡିପିଆର ଆଦି ବଦଳିବାରୁ ବ୍ୟୟବରାଦ ବି ବଢ଼ିବଢ଼ି ଚାଲିଥିଲା  । ଅହେତୁକ ବିଳମ୍ବ ଯୋଗୁଁ ସହରବାସୀ ଜଳବନ୍ଦୀ ସମସ୍ୟାରୁ ମୁକ୍ତି ପାଇପାରିଲେ ନାହିଁ  । 

ଅପରପକ୍ଷରେ କାଗ୍‌ ଉଲ୍ଳେଖ କରିଛନ୍ତିଯେ, ଭୂତଳ ଜଳସ୍ତର ହ୍ରାସ ପାଇଥିଲେବି ମହାନଗର ନିଗମ ପକ୍ଷରୁ ଭୂତଳ ଜଳ ଭରଣା ପାଇଁ ପଦକ୍ଷେପ ନିଆଯାଇନଥିଲା  । ମହାନଗର ନିଗମଗୁଡ଼ିକ ଡ୍ରେନକୁ ସ୍ଳାବରେ ଢାଙ୍କି ଲୋକମାନଙ୍କୁ ପର୍ଯ୍ୟାପ୍ତ ସୁରକ୍ଷା ଯୋଗାଇ ପାରିନଥିଲେ  । ସହରଗୁଡ଼ିକରେ ଜଳବନ୍ଦୀ ଏକ ବଡ଼ ସମସ୍ୟା  । ହେଲ ବର୍ଷା ଜଳ ନିଷ୍କାସନ ଓ ପରିଚାଳନା ପାଇଁ ମାଷ୍ଟର ପ୍ଳାନ ପ୍ରସ୍ତୁତ ହୋଇନଥିବାରୁ ବନ୍ୟା ସ୍ଥିତି ଉପୁଜିଥିଲା  । ସବୁଠାରୁ ବଡ଼ କଥାଟି ହେଉଛି ଭୁବନେଶ୍ୱରକୁ ଜଳଯୋଗାଣ ପାଇଁ କୁଆଖାଇ ନଦୀର କୂଅ ପାଣି ଅତ୍ୟନ୍ତ ଦୂଷିତ ଥିଲା  । ଅତଏବ ରାଜଧାନୀ ବାସୀ ଦୂଷିତ ପାଣି ପିଇବାକୁ ବାଧ୍ୟ ହୋଇଥିଲେ  । ଅନଭିଜ୍ଞ ଠିକାଦାରଙ୍କୁ କାର୍ଯ୍ୟାଦେଶ ଯୋଗୁଁ ପ୍ରକଳ୍ପ ବିଳମ୍ବିତ ହେବା ସହ ଶହ ଶହ କୋଟି ଟଙ୍କା ଅଯଥା ଖର୍ଚ୍ଚ ହୋଇଥିଲା  । କଟକରେ ଏଥିପାଇଁ ପ୍ରାୟ ୨୯୪ କୋଟି ଟଙ୍କାର ବ୍ୟୟ ବୃଦ୍ଧି ହୋଇଥିବାବେଳେ ଭୁବନେଶ୍ୱରରେ ପ୍ରାୟ ୫୫୦ କୋଟି ଟଙ୍କାର ବ୍ୟୟ ବୃଦ୍ଧି ହୋଇଥିଲା  ।