ପାଣ୍ଡିଆନଙ୍କ ବିରୁଦ୍ଧରେ ସାଂଘାତିକ ଅଭିଯୋଗ : ପାଟ୍ଟଶାଣୀ
Rasmita Behera
ଭୁବନେଶ୍ୱର:ଭିକେ ପାଣ୍ଡିଆନଙ୍କ ବିରୁଦ୍ଧରେ ପୁଣିଏକ ସାଂଘାତିକ ଅଭିଯୋଗ । ପ୍ରବାଦପୁରୁଷ ବିଜୁ ପଟ୍ଟନାୟକ ଓ ତାଙ୍କ କନ୍ୟା ଗୀତା ମେହେଟ୍ଟାଙ୍କୁ ଜାତୀୟସ୍ତରରେ ସମ୍ମାନ ମିଳୁ ବୋଲି ପାଣ୍ଡିଆନ ଚାହୁଁନଥିଲେ । ଏଭଳି ଅଭିଯୋଗ ଆଣିଛନ୍ତି ବିଜେଡିର ପ୍ରତିଷ୍ଠାତା ସଦସ୍ୟ ତଥା ବରିଷ୍ଠ ନେତା ପ୍ରସନ୍ନ ପାଟ୍ଟଶାଣୀ । ବିଜୁବାବୁଙ୍କୁ ‘ଭାରତରତ୍ନ’ ମିଳିବା ଦାବିକୁ ମଧ୍ୟ ପାଣ୍ଡିଆନ ବିରୋଧ କରୁଥିଲେ ବୋଲି ଶ୍ରୀ ପାଟ୍ଟଶାଣୀ କହିଛନ୍ତି ।
ଏକ ସାକ୍ଷାତକାର ଦେଇ ଶ୍ରୀ ପାଟ୍ଟଶାଣୀ କହିଛନ୍ତି ଯେ, ବିଜୁବାବୁଙ୍କୁ ‘ଭାରତ ରତ୍ନ’ ମିଳୁ ବୋଲି ସେ ସଂସଦରେ ଦାବି ଉପସ୍ଥାପନ କରିଥିଲେ । ଯାହାକୁ ପାଣ୍ଡିଆନ ବିରୋଧ କରିଥିଲେ । ଆଉ ଫୋନ୍ କରି କାହିଁକି ଏଭଳି ଦାବି କରୁଛ ବୋଲି ପ୍ରଶ୍ନ କରିଥିଲେ । ଭବିଷ୍ୟତରେ ଏଭଳି ଦାବି ନକରିବାକୁ ମଧ୍ୟ ପାଣ୍ଡିଆନ ତାଗିଦ୍ କରିଥିଲେ । କେବଳ ସେତିକି ନୁହେଁ ବିଜୁବାବୁଙ୍କ କନ୍ୟା ଗୀତା ମେହେଟ୍ଟାଙ୍କୁ ରାଜ୍ୟସଭା ପଠାଯାଉ ବୋଲି ଦାବି କରିଥିଲି । ତାହା ମଧ୍ୟ ପାଣ୍ଡିଆନଙ୍କୁ ପସନ୍ଦ ହୋଇନଥିଲା । କାହିଁକି ଏସବୁ କଥା କହୁଛନ୍ତି ବୋଲି ପଚାରିବା ସହ ମୋତେ ଚୁପ୍ ରହିବାକୁ ବାଧ୍ୟ କରାଯାଇଥିଲା ବୋଲି ଶ୍ରୀ ପାଟ୍ଟଶାଣୀ କହିଛନ୍ତି । ଆଉ ‘ଭଗବାନ’ଙ୍କ ନାଁ ନେଇ ଏସବୁ ସତ ବୋଲି ମଧ୍ୟ କହିଥିଲେ । ଏହାସହିତ ପାଣ୍ଡିଆନଙ୍କ ଔଦ୍ଧତ୍ୟ ଓ ଗର୍ବ ପାଇଁ ବିଜେଡିକୁ ଏଭଳି ଫଳ ଭୋଗିବାକୁ ପଡ଼ିଲା ବୋଲି ପାଟ୍ଟଶାଣୀ କହିଛନ୍ତି ।
