ଆମେରିକାରେ ଗଣେଶ ପୂଜା ପାଳିଲେ ପ୍ରବାସୀ ଓଡ଼ିଆ
Ganesh pIuja
Ramachandi Prasad
ଭୁବନେଶ୍ୱର(): ପ୍ରତିବର୍ଷ ପରି ଏବର୍ଷ ମଧ୍ୟ ଯୁକ୍ତରାଷ୍ଟ୍ର ଆମେରିକାରେ ଖୁବ୍ ଧୁମଧାମ୍ରେ ପାରମ୍ପରିକ ପଦ୍ଧତିରେ ଗଣେଶ ପୂଜା ପାଳିଛନ୍ତି ପ୍ରବାସୀ ଓଡ଼ିଆ। ଦକ୍ଷିଣ କାଲିଫୋର୍ନିଆ ସ୍ଥିତ ପ୍ରବାସୀ ଓଡ଼ିଆ ସମାଜ ପକ୍ଷରୁ ବିଘ୍ନବିନାଶକଙ୍କ ପୂଜା ଆୟୋଜିତ ହୋଇଛି। ଏହି ଅବସରରେ ମୁମ୍ବାଇ ନିବାସୀ ଓଡ଼ିଆ ସଙ୍ଗୀତଜ୍ଞ ତଥା ପଦ୍ମ ବିଭୂଷଣ ପଣ୍ଡିତ ହରିପ୍ରସାଦ ଚୌରାସିଆଙ୍କ ଶିଷ୍ୟ ଶୁଭ୍ରଦୀପ ସାହୁ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ। ପୂଜା ସମେତ ଖଡ଼ି ଛୁଆଁ, ପ୍ରସାଦ ସେବନ ଓ ଛୋଟ ପିଲାମାନଙ୍କର ଦ୍ୱାରା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମମାନ ଅନୁଷ୍ଠିତ ହୋଇଥିଲା। ବିଶେଷ ଭାବରେ ମହାପ୍ରଭୁ ଶ୍ରୀଗଣେଶଙ୍କ ୨୧ଟି ନାମ ଓ ଏହାର ମାହାତ୍ମ୍ୟକୁ ନେଇ ଛୋଟ ପିଲାଙ୍କ ମଧ୍ୟରେ ଏକ ପ୍ରତିଯୋଗିତା ମଧ୍ୟ ଅନୁଷ୍ଠିତ ହୋଇଥିଲା। ଦୀର୍ଘ ୫ ଦିନ ଧରି ଅନୁଷ୍ଠିତ ହୋଇଥିବା ଏହି ପୂଜାରେ ସ୍ଥାନୀୟ ଅଞ୍ଚଳ ସମେତ ଆଖପାଖ ଅଞ୍ଚଳର ପ୍ରାୟ ୩୦୦ ପ୍ରବାସୀ ଓଡ଼ିଆ ଯୋଗଦେଇଥିଲେ। କାଲିଫୋର୍ନିଆ ପ୍ରବାସୀ ଓଡ଼ିଆ ସମାଜର ପୂଜା ଓ ସାଂସ୍କୃତିକ ମୁଖ୍ୟ ଗଣେଶ ରଥ ଓ ପ୍ରଚେତା ପଣ୍ଡା କାର୍ଯ୍ୟକ୍ରମର ସୁପରିଚାଳନା କରିଥିଲେ। ଏହାସହ ବିଶେଷ ଭାବରେ ଯୁବଗୋଷ୍ଠୀ କାର୍ଯ୍ୟକ୍ରମର ସୁପରିଚାଳନା ପାଇଁ ସହଯୋଗ ମଧ୍ୟ କରିଥିଲେ।
